00:00:00 IGIHE NETWORK KN KINYARWANDA EN ENGLISH FR FRANCAIS

Arenga miliyoni 61 Frw yakusanyijwe mu gitaramo cya ‘Ambassadors of Christ Choir’ (Amafoto)

Yanditswe na Uwiduhaye Theos
Kuya 18 September 2023 saa 07:40
Yasuwe :

Abitabiriye igitaramo cyateguwe na ‘Ambassadors of Christ Choir’ bitanze miliyoni 61 Frw nk’inkunga yo kuvugurura urusengero i Remera rugomba kuzatwara arenga miliyari 1 Frw.

Ni igitaramo iyi korali yakoze kuri iki Cyumweru tariki 17 Nzeri 2023 yise “Umubyeyi Remera”. Yahuriyemo n’andi makorali arimo ‘The Way of Hope’ na ‘Junior Ambassadors of Christ Choir’.

Iki gitaramo cyari gitegerejwe na benshi cyane ko iyi korali ifite abakunzi cyane.

Cyari kigamije gukusanya inkunga yo kuvugurura urusengero iri hagati ya miliyoni 80 Frw na 100 Frw.

‘Ambassadors of Christ Choir’ yaririmbye ibihangano byayo bitandukanye binyura benshi.

Yageze hagati itangira gukusanya inkunga aho yafataga buri umwe mu baririmbyi bakundwa na benshi akabanza akayobora mu ndirimbo yagiye agaragaramo yarangiza agahamagara abantu bakajya imbere bakajya gushyigikira iki gikorwa cyo kuvugurura urusengero.

Sarah Sanyu ni we wabanje. Uyu muhanzikazi akundwa na benshi kubera uburyo yagiye abafasha kwiyegereza Imana no kwihanganira ibigeragezo.

Uyu mugore yakurikiwe na Mwalimu Ssozi Joram. Uyu mugabo nawe ni umwe mu bakundwa cyane biturutse ku ndirimbo yagiye ahimbira iyi korali.

Yamamaye mu ndirimbo “Imirindi y’Uwiteka’ iri mu zo yabanje kuririmba mbere yo gutangiza gahunda yo gukusanya inkunga biturutse ku bantu bagiye bishimira uko yabafashije mu bihangano bya ‘Ambassadors of Christ Choir’.

Umwe mu bagore bagiye imbere yabanje kumushimira cyane biturutse ku ndirimbo ‘Ibyo unyuramo’ yamamaye ya ‘Ambassadors of Christ Choir’ yanditswe na we.

Arangije ati “Ibyo unyuramo ni iby’igihe gito. Iyo ndirimbo yantunze buri munsi igihe kinini […] ndashima Imana ku bw’umwanditsi wayo ari we Mwalimu Ssozi.’’

Yakomeje asaba Imana guha uyu mugabo amagambo menshi yo gufashisha no guhumuriza imitima y’abantu.

Uyu mugabo abantu benshi bitanze yaba abari hanze no mu Rwanda bashima uburyo yagiye abafasha mu buryo butandukanye.

Avuye ku rubyiniro abaririmbyi barimo aba ‘The Way of Hope’ na ‘Junior Ambassadors of Christ Choir’ bahise bakurikiraho bashimisha benshi mu bihangano bitandukanye.

Iki gitaramo cyasojwe na Reuben Muvunyi uri mu bayobozi ba Ambassadors of Christ Choir. Uyu mugabo yashimiye abantu bitabiriye ku bwitange bwabo.

Ati “Ndashima Imana, ndayishima byimazeyo. Ndashima Imana ko yaduhaye abantu beza. Gutumira ni kimwe kwitabira ni ikindi. Ndabashimira ko mutaje imbokoboko ahubwo mukaba mwaje gushyigikira ‘Umubyeyi Remera’.’’

Yasoje avuga ko amafaranga yakusanyijwe arenga miliyoni 61 Frw.

Muri iki gitaramo Paul Muvunyi wayoboye Rayon Sports usanzwe asengera mu Itorero ry’Abadivantisiti b’umunsi wa karindwi ni umwe mu bitanze ndetse we n’umuryango we muri rusange batanze miliyoni 3 Frw.

Ambassadors of Christ isanzwe ikora ibikorwa by’isanamitima ibinyujije mu ndirimbo ziramya zikanahimbaza Imana.

Ikunzwe cyane yaba mu Rwanda no hanze yarwo binyuze mu ndirimbo zitandukanye zirimo Minekupata Yesu, Yatupasa kushukuru,Yesu we, Ni kwanini, Hoziyana n’izindi zitandukanye.

Amafoto: Kasiro Claude


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .