00:00:00 IGIHE NETWORK KN KINYARWANDA EN ENGLISH FR FRANCAIS

Umuramyi unywa ibiyobyabwenge? Ibidasanzwe kuri Rose Muhando utegerejwe mu Rwanda

Yanditswe na Uwiduhaye Theos
Kuya 23 February 2022 saa 12:19
Yasuwe :

Mu bakurikirana umuziki wo kuramya no guhimbaza Imana bategerezanyije amatsiko umuhanzikazi wo muri Tanzania wamenyekanye nka Rose Muhando mu gitaramo cyo gusoza ibihembo bya Rwanda Gospel Stars Live.

Ni mu gitaramo cyiswe ‘Praise & Worship Live Concert’ kizaba ku wa 6 Werurwe 2022 kuri Canal Olympia ku i Rebero.

Uyu muhanzikazi azahuriramo n’abandi bo mu Rwanda barimo Gaby Kamanzi, Israël Mbonyi, Rata Jah, Gisèle Precious, Annette Murava, Serge Iyamuremye, Aline Gahongayire, Kingdom of God Ministries, MD, Tonzi, Aime Frank, James na Daniella, Theo Bosebabireba, True Promises na Gisubizo Ministries.

Rose Muhando watumiwe muri iki gitaramo ni umwe mu bahanzi baririmba indirimbo zihimbaza Imana ukomeye mu karere ka Afurika y’Uburasirazuba.

Yamenyekanye mu ndirimbo zitandukanye zirimo “Nibebe”, “Mteule Uwe Macho”, “Kitimutimu”, “Jipange Sawasawa”, “Nyota ya Ajabu”, “Utamu Wa Yesu”, “Nampenda Yesu” n’izindi zitandukanye.

Rose Muhando yabeshye Abanyarwanda kenshi ...

Rose Muhando si inshuro ya mbere atumiwe mu Rwanda ariko mu zabanje eshatu nta n’imwe yigeze azamo.

Byahereye mu 2014, Muhando yatumiwe mu gitaramo cyabereye i Nyagatare aho yagombaga gutaramira abari bitabiriye. Kuva tariki ya 13 na 16 Ugushyingo uwo mwaka, abari bamutumiye bayobowe na Pasiteri Isaie Baho Uwihirwe baramutegereza amaso ahera mu kirere.

Mu mwaka wakurikiyeho wa 2015 yongeye gutumirwa mu giterane cy’Umunyamerika Jennifer Wilde cyabereye i Muhanga tariki 23 kugeza 26 Nyakanga 2015, yishyurwa amafaranga yose yari yasabye ariko birangira nabwo atahakandagije ikirenge.

Ni nako byagenze mu 2017, aho uyu mugore yari yatumiwe mu Rwanda mu giterane cyabereye mu mujyi wa Kigali, muri KIE ahazwi nk’ishami rya Kaminuza y’u Rwanda ry’Uburezi. Iki giterane cyatangiye kuwa 30 kanama 2017 cyagombaga kumara iminsi ine. Cyararangiye kuwa 2 kanama, Rose Muhando atahakandagiye.

Yari yatumiwe n’Umushumba w’Itorero Foursquare Gospel Church mu Rwanda, Bishop Dr. Fidèle Masengo. Hari hatumiwe n’abandi bahanzi batandukanye ndetse ntibamutenguha bo baza kwitabira no kubahiriza gahunda.

Bamwe mu bari batumiwe harimo Uwiringiyimana Théogène [Theo Bosebabireba], Liliane Kabaganza, Aline Gahongayire na Tonzi ndetse n’amatsinda akomeye hano mu Rwanda ari yo Alarm Ministries, Gisubizo Ministries na Healing worship team. Itsinda ry’abaririmbyi b’i Mwanza ndetse n’umunyabitangaza Rev. Simon waje abaherekeje ari nawe wabwirije ijambo ry’Imana.

Rose Muhando yagombaga kugera mu Rwanda kuwa 29 kanama 2017[umunsi umwe mbere y’uko igiterane gitangira], yakomeje kugenda abwira abari bamutumiye ko yahuye n’uburwayi gusa abizeza ko azaza biza kugera ku munsi wa nyuma w’igiterane atahageze.

Yashinjwe kunywa ibiyobyabwenge!

Mu 2017 Rose Muhando wo muri Tanzania yamaze iminsi yaraburiwe irengero, nyuma yongera kwigaragaza ndetse asobanura ko hari byinshi byari bihangayikishije ubuzima bwe birimo n’umugabo ushaka kumwica amuryoza ko yanze ko baryamana.

Muri uwo mwaka byatangajwe ko ibiyobyabwenge byasaritse uyu muhanzi ndetse ngo yashakishijwe igihe kinini kugira ngo ajyanwe mu kigo ngororamuco ariko inzego z’umutekano n’umuryango baramubura.

Hari hashize iminsi ashyirwa mu majwi ko ashobora kuba asigaye akoresha ibiyobyabwenge, gusa yabyamaganiraga kure avuga ko ababivuga ari abahereye kera bamurwanya.

Mu kiganiro yigeze kugirana n’ikinyamakuru Ijumaa Wikienda, Rose Muhando w’imyaka 46 y’amavuko yavuze ko yari amaze iminsi yihishe kuko ngo ‘hari umuntu washakaga kwivugana ubuzima bwe’ amuryoza ko yanze ko baryamana.

Yashimangiye ko uyu mugabo ari we wari uri inyuma y’ibibazo byose Muhando yavuzwemo birimo kumuhimbira ibinyoma by’uko yakuyemo inda, kunywa ibiyobyabwenge n’ibindi.

Uyu mugabo ngo yari asanzwe afasha Rose Muhando, yamuhaga amafaranga yo gukora indirimbo ndetse akamufasha mu bikorwa bitandukanye by’umuziki bigeze igihe amusaba ko baryamana undi amubera ibamba.

Muhando icyo gihe atanga ikiganiro yagize ati “Ibi byose rero, ni uko nanze kuryamana na we. Narashavujwe bihagije, nabyaranye n’abagabo baransiga […] Ubu ntewe ubwoba n’uko hari ushaka kunyica, ndumva ntagishaka kuba mu gihugu. Mu by’ukuri kuba ndi muri Kenya [icyo gihe niho yarahungiye] ni byo bimushimishije?”

Uyu mubyeyi muri iyo minsi yatangaje ko ubuzima bwe bumaze kunanizwa ku rwego rukomeye ku buryo yumva amaze kurambirwa kubaho avugwa mu bibazo kandi by’ibihimbano.

Muhando kuva mu 2016 yagiye agarukwaho cyane mu bitangazamakuru byo muri Tanzania. Yavuzweho gushaka gusubira mu Idini ya Islam yahozemo nyuma arabihakana.

Yagaragaye yikurunga hasi bikurura impaka!

Mu mezi asatira impera za 2018 Rose Muhando ni umwe mu bahanzi bakwirakwiye ku mbuga nkoranyambaga zitandukanye.

Icyo gihe yagaragaye mu mashusho yikurunga hasi, ari gusengerwa n’umupasiteri witwa James Maina Ng’ang’a. Rose Muhando yasakuzaga avuga ko umujyanama we yamwoherereje roho mbi 10 ngo zimutware ibye byose birimo imodoka, inzu n’amafaranga, asigare ari umuhirimbiri.

Gusa bamwe bahise bongera kumushinja gukoresha ibiyobyabwenge akaba ari byo byatumaga yitwara atyo.

Nyuma Rose Muhando yongeye kugaragara ari kumwe n’abandi baririmbyi b’indirimbo zihimbaza Imana, Solomon Mkubwa, Annastacia Mukabwa na Nancy Chebet bose bavuga ko yamaze kongera kugarura ubuyanja.

Annastacia Mukabwa mu bahanzi bari bamujyanye kwa muganga mu 2018 ubwo yagiraga icyo kibazo, yari abwiye Radiyo Citizen ko nyirubwite atari azi ibyamubayeho. Icyo gihe ngo Rose Muhando yajyanwe mu bitaro bibagoye cyane.

Yakomeje ati “Kujyana Rose Muhando ku bitaro kari akazi katoroshye. Imana yaramfashije. Nagombaga gukora ibishoboka byose ngo ajyanwe kwa muganga ahabwe ubuvuzi bwihariye. Tekereza iyo biriya bimubaho atari mu maboko y’abaganga! Hari igihe yari kwiyahura.”

Mu mwaka ushize uyu muhanzikazi yabwiye ikinyamakuru The Standard ko atabasha gusobanura ikintu cyari cyabaye ubwo yagaragaraga muri aya mashusho gusa yemeza ko yaribwaga mu nda.

Rose Muhando mu cyerekezo gishya...

N’ubwo yashaririwe mu myaka yashize. Guhera mu 2019 Rose Muhando yongeye kwigarurira imitima ya benshi muri Tanzania. Yakoze ibihangano bitandukanye birimo nka ‘Wanyamazishe Bwana’, ‘Yesu karibu kwangu’, ‘Kimbembe’, ‘Wanyamazishe’, ‘Ombi Langu’ aheruka mu kwezi gushize n’izindi.

Yagiye akorera ibitaramo ahantu hatandukanye muri Tanzania mu myaka ishize kandi byose yagiye yitwara neza. Mu mezi make ashize yakoreye igitaramo gikomeye ahitwa Kahama, Songea n’ahandi.

Rose Muhando yamenyekanye mu myaka irenga 10 mu ndirimbo zitandukanye zirimo “Nibebe”, “Mteule Uwe Macho”, “Kitimutimu”, “Jipange Sawasawa”, “Nyota ya Ajabu”, “Utamu Wa Yesu”, “Nampenda Yesu” n’izindi zitandukanye.

Yatangiye kumenyekana guhera mu myaka ya 2004 na 2005. Byari y’uko yari igihe ari umuyobozi wa korali yaririmbagamo yitwa Saint Mary’s Choir yo muri Dodoma mu rusengero rwa Chimuli Anglican Church.

Mu 2011 yasinye amasezerano yo gukorana na Sony Music.

Rose Muhando ategerejwe mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .