Korali Hoziana, imaze imyaka irenga 50, ikaba ibarizwa mu itorero rya ADEPR Nyarugenge, kuri ubu imaze gushyira hanze album zirenga 10 z’amajwi n’izindi ebyiri z’amashusho. Muri izo ndirimbo harimo nyinshi cyane zikunzwe zirimo ‘Tugumane’, ‘Turagutegereje’ na ‘Mugeni wa Yesu’.

Uretse izi ndirimbo zo hambere, zakunzwe n’abatari bake, iyi korali imaze gushyira hanze izindi ndirimbo nyinshi nshya zirimo ‘Dufite Ibihamya’ ikomeje gufasha benshi mu rugendo rwabo rwo kwizera.

Korali Hoziana yavutse mu mwaka wa 1967, itangirira ahitwa i Gasave ku Gisozi bigizwemo uruhare na Rev. Kayihura Jacob.

Mu 1978, Korali Hoziana yakomeje kwaguka, bigeze aho igabanywamo amatsinda abiri: abo ku Gisozi bitwa Korali Gasave na ho abagiye gukorera umurimo w’Imana i Nyarugenge bitwa Korali ya Kigali.

Iri tsinda rya Nyarugenge ryakomeje gukura, hanyuma mu mwaka wa 1980 rihindura izina ryitwa Korali Hoziana. Kuri ubu Hoziana ifite abaririmbyi barenga 100.

Igiterane cy’uyu mwaka kirihariye, kuko kizibanda ku kwibutsa abantu kongera kugarukira Imana, binyuze mu ntego iri mu Byakozwe n’Intumwa 3:19, aho abantu bahamagarirwa kwihana no kugarukira Imana.

Korali Hoziana izafatanya na Korali Shalom na yo ibarizwa kuri ADEPR Nyarugenge, hazaba hari kandi Ntora Worship Team ndetse na Papy Clever na Dorcas.

Umuyobozi wa Korali Hoziana, Lea Mukandangizi, yabwiye IGIHE ko abantu bose bahawe ikaze, kandi ko yiteguye kubakira ndetse no kugirana na bo ibihe byiza byuzuye gusabana n’Imana.

Mukandangizi yongeyeho ko iki giterane kije muri gahunda yo kwizihiza no kwamamaza ubutumwa bwiza bwa Yesu Kristo, ngo abataramenya Yesu bamumenye bamwizere.

Iki gitaramo kizaba ku wa Gatanu guhera saa kumi, na ho ku wa Gatandatu no ku Cyumweru kikazatangira saa munani z’amanywa kuri ADEPR Nyarugenge, aho kwinjira bizaba ari ubuntu.

Mu minsi itatu y’igitaramo cya ‘Hoziana Gospel Celebration – Tugumane 2024’, abantu bose bazagira umwanya wo kwibuka ibyo Imana yakoze mu buzima bwabo, no guharanira kugumana n’Uwiteka mu rugendo rwabo rwa buri munsi.

Korali Hoziana yateguye igitaramo ‘Hoziana Gospel Celebration – Tugumane 2024’

Iki gitaramo kizamara iminsi itatu

Korali Hoziana imaze imyaka irenga 50