00:00:00 IGIHE NETWORK KN KINYARWANDA EN ENGLISH FR FRANCAIS

Bahujwe n’ubukwe: Ibyo wamenya kuri Patmos Choir igiye gukora igitaramo ya kane

Yanditswe na Mahoro Vainqueur
Kuya 2 November 2023 saa 11:46
Yasuwe :

Patmos Choir imaze imyaka 27 ikorera umurimo w’ivugabutumwa mu Itorero ry’Abadiventisiti b’Umunsi wa Karindwi, igiye gukora igitaramo cy’ishimwe kizabera muri Kigali Convention Centre.

Iyi korali yavutse mu 1996 yaherukaga igitaramo mu 2016. Kuri iyi nshuro yagarukanye icyo yise “The Highest Praise” giteganyijwe tariki 25 Ugushyingo 2023 guhera saa kumi n’imwe z’umugoroba.

Perezida wa Patmos Choir Vincent Ngirikiringo, yavuze ko iki gitaramo ari icy’ishimwe nyuma y’ibihe banyuzemo ubwo Isi yari yugarijwe na Covid-19.

Ati “Ni igitaramo cyo guhimbaza Imana twahaye izina rya ‘The Highest Praise’. Ni uguhimbaza Imana mu buryo buhanitse. Gitumiwemo abantu bose si Abadivantiste gusa kuko indirimbo zacu ni iz’abantu bose.”

“Izina ryaje nyuma yo kureba ku bihe bya Covid-19 twarimo aho benshi muri twe hari umwaka twamaze tudakorana. Nka korali twumvaga ko bitazashoboka ko twakongera guhura ngo dutarame.”

Ni igitaramo ubuyobozi bw’iyi korali buvuga ko kizafasha abakirisito kwinjira mu minsi mikuru bari mu mwuka wo kuramya no gihimbaza Imana. Kizaba kirimo imbyino zihariye zizakorwa n’abana bato bazabyina bagaragaza ibyo korali iririmba (Choreography).

Iki gitaramo kizaba kirimo n’andi makorali arimo Elevate na Echos du Ciel mu ndirimbo zitandukanye zo guhimbaza Imana.

Kwinjira muri iki gitaramo cyabo ni 10.000Frw na 15.000Frw mu myanya y’icyubahiro. Ni itike ushobora kugura unyuze ku rubuga rwa www.ishema.rw cyangwa *797*30#.

Igitaramo cyabo cya mbere yagikoze mu mpera ya 1996, mu 2002 bakorera muri Hôtel des Mille Collines ndetse no mu 2016 bataramiye muri Kigali Convention Centre.

Inkomoko y’iyi korali

Patmos Choir yatangiye muri 1996 i Kigali itangizwa n’abanyeshuri baririmbanaga aho bita Lukanga muri Repubulika Iharanira Demokarasi ya Congo.

Nyuma ya Jenoside yakorewe Abatutsi abo banyeshuri bongeye guhurira mu Rwanda, bakomeza umurimo wo kuririmba babifashijwemo n’umwe muri bo.

Abo banyeshuri batangiye biga indirimbo y’umwe muri bagenzi babo wari ufite ubukwe. Nyuma yo kuyiririmba mu bukwe bikagenda neza bafashe umwanzuro wo gukomeza. Ubu ni korali igizwe n’abaririmbyi 24.

Patmos Choir imaze imyaka 27 ikorera umurimo w’ivugabutumwa mu Itorero ry’Abadiventisiti b’Umunsi wa Karindwi
Patmos Choir igiye gukora igitaramo cy’amashimwe kizafasha abakristo kwinjira mu bihe by’iminsi mikuru isoza umwaka bari mu mwuka wo guhimbaza Imana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .