Pasiteri wo mu itorero MMCC (Mount Moriah Christian Church) ku wa 26 Ukuboza 2014 yakuriye inzira ku murima abageni bari babukereye bageze ku rusengero abaziza ko umukobwa atwite bo bakavuga ko bazize kudatanga icya cumi.

Aba bageni bageze aho bagombaga gusezeranira ku rusengero rwitwa “God is Power” hafi ya Rwandex basanga abakirisito bo mu itorero ryabo na pasiteri nta bahari.

Aba bageni bavuga ko batazi impamvu Pasiteri yanze kubasezeranya kuko ibyangombwa byose bari babyujuje. Gusa bavuga ko basabwe gutanga icyacumi bakakibura kuko bose ngo nta kazi bafite.

Umugabo yagize ati “Yabanje kwanga kuturaga ngo ntiturakiranuka n’ibya cumi, mubwira ko nta kazi mfite n’umudamu wanjye wari umunyamabanga w’itorero ubu nta kazi afite ahubwo ko bagombye kumufasha.”

Pasiteri Jean Marie Vianney Mutezintare yavuze ko atanze kubasezeranya ahubwo ko yabasabye mbere y’iminsi ine ko bagaragaza icyemezo cy’uko basezeranye mu murenge n’ibyemezo bya muganga bigaragaza ko umukobwa adatwite ntibabizane.
Mutezintare avuga ko yaje kumenya ko umukobwa atwite kandi itorero ryabo ritemera ko basezeranya umukobwa utwite.

Ikindi kibazo Rev Pasiteri Mutezintare agaragaza ko cyatambamiye ubu bukwe ni amakuru yamenye avuga ko umugabo afite abana 2 agasanga bishobora guteza amakimbirane mu miryango baramutse bamusezeranyije babizi.

Rev Pasiteri Mutezintare yahakanye ko atanze gusezeranya aba bageni kubera ikibazo cy’amafaranga y’icya cumi.

Ati “Twatunguwe n’uko bavuze ngo ni amafaranga y’icya cumi, ayo atangwa n’umuntu ku bushake njye nta n’aho mpurira nayo ngo mbe namenya uwayatanze n’utarayatanze.”

“Impamvu ntabasezeranyije ni ukuba batarerekanye impapuro z’aho basezeraniye muri Leta, kuko umugabo tutamuzi neza, twanabasabye ko bazana ibyangombwa byo kwa Muganga bigaragaza ko adatwite, twari dufite ayo makuru ko atwite ndetse nawe yaje kubyemera ku munota wa nyuma.”

Avuga ko ibi babikora hagamijwe gukumira imico mibi yateye mu rubyiruko ya gutaha mu ngo batwite akenshi bigateza amakimbirane.

Abageni bavuga ko Pasiteri yabahemukiye cyane kuko yakabaye yarabamenyesheje mbere ntibirirwe bapfusha amafaranga yabo ubusa.

Umugore yagize ati “Iyo adusobanurira tukamenya niba itorero umuntu aririmo cyangwa ataririmo wenda akajya mu rindi cyangwa se akijyana, nyuma akaziga akaza nk’umugarukiramana. Reba iyi kanzu, ikodeshwa amafaranga menshi, imodoka n’abantu twatumiye byose byaduhenze, araduhemukiye cyane!”

Bavuga ko bari bwitabaze amategeko kubera iki gihombo. Pasiteri we avuga ko igihombo kitamureba kuko mbere y’iminsi ine ngo umunsi w’ubukwe ugere yabahamagaye akabamenyesha ko niba ibyo yabatumye bitabonetse ubukwe butakibaye.

Ati “Twarabaranze mu rusengero ni byo, ariko narabahamagaye bari babizi ko ubukwe butakibaye. Bagiye hariya bagiye kureba abandi ba Pasiteri babasezeranya, ariko nabo banze”

Aba bageni bafashe icyemezo cyo kubana badasezeranye imbere y’Imana. Bavuga ko ari icyaha bakoze ariko ko Imana ikwiye gushishoza ku wabateye icyo cyaha. Umugore avuga ko aramutse yanze gutaha mu rugo umugabo we yajya kumurega kuko basezeranye mu mategeko.