Tariki ya 15 Kanama ni imwe mu matariki akomeye Kiriziya Gatorika yizihirizaho umunsi wa Bikira Mariya Nyina wa Jambo (Assomption).

By’umwihariko mu Rwanda, haba hari ibirori byakataraboneka i Kibeho ku musozi wa Nyarushishi, mu Murenge wa Kibeho, Akarere ka Nyaruguru ho mu Ntara y’Amajyepfo, ahabereye amabonekerwa ya Bikira Mariya ku bakobwa batatu ari bo: Anathalie Mukamazimpaka, Alphonsine Mumureke na Marie Claire Mukangango.

Ayo mabonekerwa afatwa nk’aya mbere akomeye yabaye muri aka gace k’ibiyaga bigari akaba yarabaye mu 1981, kandi yagize ingaruka nziza ku Bakirisitu ba Kiliziya Gatolika, ndetse n’Abanyarwanda muri rusange, dore ko ngo byanatumye i Kibeho haba ahantu hakomeye, ndetse n’Akarere ka Nyaruguru karamenyekana ku Isi hose, kugeza ubu hanasurwa na ba mukerarugendo, ndetse hanubatswe ishusho ya mbere nini muri Afurika no ku Isi yose ya Yezu, ifite uburebure bwa metero 6 n’ibiro 950.

Mumureke Alphonsine

Hari ku itariki ya 28 Ugushyingo 1981, ubwo mu ishuri ryisumbuye ry’abakobwa ry’i Kibeho mu masaha ya nyuma ya saa sita habaye ibitangaza, aho umwana w’umukobwa wo mu kigero cy’imyaka 16 yabonekewe na Bikira Mariya.

Mumureke Alphonsine yagiye kumva yumva ijwi rito rimuhamagara rigira riti “Mwana wanjye”, nawe ntiyazuyaza ahita arikurikirana mu kirongozi cy’inzu, niko kubona umugore ufite ubwiza budasanzwe imbere ye.

Mu myambaro yera, n’umwenda w’ubururu yari yitwikije mu mutwe, Alphonse yamubajije n’ubwoba bwinshi ati “Uri nde?”, uwo mugore yamusubije ko ari Nyina wa Jambo, muri ako kanya Alphonsine yahise asa n’ufashwe n’imbaraga zidasanzwe, yitegereza uwo mugore yibaza uko yageze aho.

Uwo mubyeyi yongeye kumubaza ati “Ni nde ukunda kurusha abandi ?”, Alphonsine ngo yamushubije vuba cyane dore ko yanavukaga mu muryango w’Abakirisitu ati” Nkunda Imana na Bikira Mariya”,

Bikira Mariya yashimishijwe n’icyo gisubizo ni ko kumubwira ko azanywe no kumukomeza, ko yumvise amasengesho ye, ati “Ndifuza ko inshuti zawe zikomera mu kwemera”.

Uwo mubyeyi ngo yazamutse ajya hejuru ari nako arembera, Alphonsine nawe akomeza gusenga, ayo mabonekerwa akaba yarabaye mu gihe cy’iminota nka 15.

Icyatangaje abari aho ni ukuntu Alphonsine yari yemye, yewe banagerageje kumuvugisha no kumunyeganyeza ntibyakunda, bigaragara ko yari afite imbaraga zidasanzwe.

Bamwe baketse byinshi birimo n’amarozi, dore ko ngo kubera ko yanakomokaga i Kibungo, bamwe baketse ko ari amarozi yakundaga kuhavugwa.

Ku nshuro ya kabiri, ubwo yari mu cyumba abanyeshuri bararagamo, Bikira Mariya yongeye kumubonekera noneho afite ibara ridasanzwe, ndetse buri wa Gatandatu ayo mabonekerwa akajya akomeza kumubaho.

Gusa, muri icyo gihe cyose ngo uwo mwana yahuye n’ibigeragezo bikomeye mu bandi bana, bamwe bavugaga ko yasaze ariko abandi bakumva ari ibitangaza byanageze n’aho abandi bana basenga bagiye bamuzanira amashapure ngo ayahe uwo mubyeyi ayabahere umugisha.

Mukamazimpaka Anathalie:

Ntibyatinze, Bikira Mariya aba abonekeye undi mwana w’imyaka 21, wagaragaragaho imyitwarire idasanzwe kuko we yikundiraga amaraha, ndetse ntakozwe ibyo gusenga, dore ko ari mu ba mbere banabereye ikigeragezo Alphonsine.

Nathalie nawe yagiye kumva yumva ijwi rimuhamagara riti “Nathalie mwana wanjye” Nawe aramwikiriza, niko kongera kumuvugisha amuha ubutumwa bukurikira.

Ati “Nimusenge cyane kuko Isi ari mbi , mukunde ibyo mu ijuru kuko iby’Isi bishira vuba. Mwitonde kandi murangwe n’urukundo, kwitanga no kwiyoroshya kandi mugarukire Imana”.

Ayo magambo yamuteye ubwoba, ariko yayafashe nk’ubutumwa bukomeye bwanahise bumuhindura, abari bamuzi mbere batangazwa cyane n’ibyamubayeho.

Mukangango:Marie Claire

Mu mabonekerwa 15 yahuye nayo kugeza mu kwezi k’Ukuboza 1982, Marie Claire Mukangango nawe yagiye ahabwa ubutumwa bwo kwamamaza ishapure y’ububabare.

Uwo mubyeyi yanamuhishuriye byinshi birimo ko Isi igenda imera nabi cyane, kandi ko u Rwanda rugeze ahakomeye (muri icyo gihe), amubwira ko abantu bakwiriye guhinduka no gusenga cyane.

Abantu batandukanye bagize icyo bavuga:

Manirakiza Sosthene (Umukirisitu):

Ku bwe, asanga i Kibeho ari ahantu hatagatifu ku buryo adashobora gusiba amasengesho yaho ku wa 15 Kanama, ndetse ngo we na bagenzi be banashaka igihe bakahakorera urugendo rutagatifu.

Ati : “Amabonekerwa yabereye i Kibeho ni ay’agaciro gakomeye, kuko Bikira Mariya yatwiyeretse ndetse akaba yaratugaragarije ko aturi hafi kandi adusabira”.

Uwihayimana:

Umwe mu bihayimana utarashatse ko amazina ye atangazwa yabwiye ikinyamakuru Izuba Rirashe dukesha iyi nkuru ko umunsi wa Bikira Mariya ari umwe mu minsi ikomeye yizihizwa na Kiliziya Gatolika.

Yavuze ko abakirisitu basubiza amaso inyuma bagashima uwo mubyeyi, ndeste bakanaboneraho kumusaba imbaraga mu Bukrisitu bwabo.

Yongeyeho ko i Kibeho ari ahantu hatagatifu, hafasha abahagiye gusabana n’Umubyeyi Bikira Mariya.

Ubuyobozi bw’Akarere ka Nyaruguru:

Binyuze ku rubuga rw’Akarere ka Nyaruguru, ubuyobozi bw’ako Karere buratangaza ko ubukerarugendo bwabo bwibanda cyane ku bantu baturuka i mihanda yose baje gusura ubutaka butagatifu.

Baragira bati “Ubukerarugendo mu Karere ka Nyaruguru bwibanda i Kibeho aho Abakirisitu bahurira buri mwaka gusura ubutaka butagatifu, aho abagore babiri babonekewe na Bikira Mariya, Umubyeyi wa Kirisitu. Abantu bava impande zose z’Isi gusura uyu mwanya mutagatifu.

Ariko, hari ikibazo cy’umuhanda mubi ujya kuri uyu mwanya mutagatifu ukeneye gushirwamo kaburimbo, kugira ngo horoshywe ingendo z’aba ba mukerarugendo no kugabanya ivumbi ryangiza ibidukikije bitewe n’imodoka nyinshi zihajya”.

Ku itariki ya 15 Kanama, abantu benshi cyane bahurira ikibeho bagiye gusenga ndetse abandi bakajyanwa n’amatsiko, by’umwihariko usanga abenshi bavuye kure cyane ndetse abandi bakiyemeza gukora urugendo n’amaguru baturutse hirya no hino mu Ntara z’igize igihugu.

Ikindi kihagaragara ni ukuntu abagiyeyo batahana utwatsi, amabuye, itaka ndetse n’amazi bahavomye kuko bemeza ko biba birimo umugish,a kuko baba babivanye ku musozi mutagatifu.

Mu gutegura iyi nkuru hifashishijwe izi mbuga:

www.avmdki.org/ibonekerwa.15.05.04, na www.nyaruguru.gov.rw