Abayoboke umunani bari mu bashinze itorero EPEMR (Eglise Pentecotiste de l’Emmanuel) rimaze igihe gito rishizwe, bamwe muri bo bakaba bari banafite imirimo y’ubuyobozi muri ryo batangaje ko bitandukanije naryo ku mugaragaro, bitewe n’ivanguramoko, ubuhanuzi butiza umwanzi umurindi ndetse n’ibindi byaha birangwa muri ryo.

Mu itangazo bashyize ahagaragara kuri uyu wa Kabiri IGIHE gifitiye kopi, aba bayoboke bavuze ko bitandukanije na EPEMR ndetse n’uwayitangije Pasiteri Gasarasi Samson n’ibitekerezo bye.

Muri iri tangazo bavuga ko impamvu nyamukuru yatumye basezera ari ibyaha biri muri iri torero; ivanguramoko, ubuhanuzi butiza umwanzi umurindi, gukoresha inkunga hatazwi aho zakomotse ndetse no gukora rwihishwa bitera abasezeye amakenga bagakeka ko hari indi mpamvu yaba yihishe inyuma yo gushinga iri torero bitari ukuyobora abantu mu mwuka.

Abashyize umukono kuri iri tangazo baboneyeho gusaba abamaze kwinjira muri EPEMR kuba maso bakamenya gutandukanya icyiza n’ikibi bakirinda icyabagusha mu mutego “maze nabo biyarure hakiri kare basezere muri iryo torero”.

Pasiteri Gasarasi Samson washinze EPEMR

Mu kiganiro IGIHE yagiranye na Sinzabakwira Elie ugaragara ku mwanya wa mbere mu bashyize umukono kuri iri tangazo, akaba yari Umubitsi wa EPEMR ndetse n’Umushumba wa EPEMR mu Ntara y’Iburengerazuba (yaherewe ubupasitoro muri EPEMR) yasobanuye ko ibi byaha uko ari bitatu banenga EPEMR akaba ari nabyo byatumye basezera byose bifite aho bihuriye.

Ivanguramoko kuri Pasiteri Gasarasi

N’ubwo ngo Pasiteri Gasarasi Samson atigeze ahagarara imbere y’abantu ngo agaragaze ibitekerezo by’ivanguramoko, ngo ibikorwa bye birarigaragaza. Sinzabakwira yasobanuye ko mu minsi ishize iri torero ryigeze gutegura gusengera bamwe mu bayoboke baryo ngo bahabwe ubupasiteri, hanyuma bukeye basanga Pasiteri Gasarasi yakuye ku rutonde uwitwa Mukurarinda Dominique batabizi, bagahamya ko yamuzizije ko yacitse ku icumu.

Sinzabakwira yemeza ibi avuga ko ubwo babazaga Gasarasi impamvu yakuye Mukurarinda ku rutonde, yabasobanuriye ko byatewe n’uko umugore we (Mukurarinda) Tuyishime Ruth (nawe yashyize umukono kuri iri tangazo) asanzwe ari umupasiteri muri iryo torero, bityo ngo ntibakwiriye kuba abapasiteri bombi; ibi bagasanga ari impamvu z’urwitwazo.

Abayoboke ba EPEMR bambaye FDLR

Sinzabakwira Elie yavuze ko abashyize umukono kuri iri tangazo batangiye kugira amakenga y’impamvu nyamukuru y’ishingwa ry’iri torero ubwo bumvaga ubuhanuzi bwasohotse mbere gato y’uko iri torero ritangira.

Elie avuga ko ubwo minisiteri (Ministere de l’Emmanuel iyoborwa na Gasarasi Samson) yabyaye iri torero yari yateguye amasengesho mu Karere ka Nyamagabe mu Ntara y’Amajyepfo, umwe mu bari bayitabiriye yateye ejuru, agahanura ibijyanye n’ivuka ry’iri torero, gusa ngo ibindi yongeyeho byateye urujijo rukomeye. Ngo uwahanuraga yavuze ko yabonye itorero EPEMR rivuka, abona abarigize bambaye imyenda y’umweru, mu bitugu byabo handitsemo “FDLR”.

Sinzabakwira avuga ko nyuma yo kumenya ibi, dore ko we atari ahari ubuhanuzi butangwa, bahise bagira impungenge bafata umwanzuro wo kuva muri iri torero ngo hato batazagwa mu ruzi barwita ikiziba.

Gukoresha umutungo utazwi inkomoko

Sinzabakwira Elie yemera ko Samson Gasarasi asanzwe afite amafaranga ku buryo yabasha gutera inkunga ibikorwa bya EPEMR ariko akavuga ko ibikorwa byose bikoreshwa amafaranga menshi batajya berekwa aho yaturutse.

Ibi abyemeza nk’ushinzwe umutungo, aho avuga ko aba akwiriye kwerekwa niba amafaranga ari inkunga, ideni cyangwa afite indi nkomoko, ariko ngo iyo babajije Pasiteri Gasarasi aho amafaranga yakoreshejwe ibikorwa runaka yakomotse, ngo araruca akarumira.

Sinzabakwira akavuga ko ibi bidakwiriye kuko ibitabo by’ibaruramutungo bigomba kuba bisobanutse, ku buryo nta gukorera mu rwihisho bikwiriye kubamo na gato.

Gusezera kwabo ntaho guhuriye na ADEPR

Byagiye bivugwa kenshi ko ibibazo EPEMR yagiye igira mu itangizwa ryaro birimo gukomwa mu nkokora mu gihe biteguraga gutangiza iri torero ku mugaragaro n’ibindi, itorero rya ADEPR aba bakomotsemo ryaba ryarabigiragamo uruhare; gusa ADEPR yakunze kugaragaza ko ntaho ihuriye n’ibi.

Icyemezo cy'umurenge wa Kimironko kibuza EPEMR guteranira mu nyubako yaho

Sinzabakwira Elie avuga ko ugusezera kwabo ntaho guhuriye na ADEPR na busa kuko bajya kuyivamo hari ibyo bayinengaga, ngo uyu munsi kuva ibyo bitarakemuka ntibiteguye kuyisubiramo, ndetse ngo na EPEMR ikemuye ibyavuzwe haruguru, bayigumamo kandi bagatuza. Yemeza ko gusezera muri EPEMR ari ubushake bwabo, nta n’aho bihuriye na politiki.

Pasiteri Gasarasi yahakanye ibyo aregwa

Ku murongo wa telefoni na IGIHE, Pasiteri Gasarasi Samson yabanje gutungurwa no kumvira bwa mbere mu itangazamakuru ko hari abantu basezeye muri EPEMR.

Naho ku birego bivugwa muri iri torero ndetse akaba ari we ushyirwa mu majwi cyane, yavuze ko nta vangura azi riba muri EPEMR, ko nta buhanuzi butiza umurindi umwanzi yigeze yumvamo; ku kuba agira urujijo inkomoko y’amafaranga bakoresha ibikorwa by’itorero, yasobanuye ko bayakura mu misanzu bakusanya mu banyamuryango nk’uko bigenda mu yandi matorero.

Itorero EPEMR ryashinzwe na Pasiteri Gasarasi yiyomoye kuri ADEPR, ajyana na bamwe mu bayoboke baryo. Ryari rimaze iminsi rishaka ibyangombwa bibemerera gutangira gukorera mu Rwanda, kuri ubu sitati yabo ikaba yaramaze gusinywaho na noteri. Kutagira ibyangombwa byagiye bibera imbogamizi zikomeye EPEMR n’abayoboke baryo, bigatuma batabasha gukora ibikorwa byabo nk’amateraniro n’ibindi.

Icyamenyekanye cyane muri ibi ni umunsi bagiye gukora ikoraniro ritangiza iri torero ku mugaragaro, ariko bangirwa guterana, basobanurirwa ko inyubako bari bagiye gukoreramo itemewe gukorerwamo ibikorwa by’ibyo. Ibi byababaje cyane abagize iri torero kuko bavugaga ko iyo nyubako ikorerwamo n’andi madini, ahubwo bavuga ko ari ADEPR ibiri inyuma, dore ko bavugaga ko Umuvugizi Wungirije wayo Pasiteri Tom Rwagasana yari hafi aho ibyo biba.