00:00:00 IGIHE NETWORK KN KINYARWANDA EN ENGLISH FR FRANCAIS

Volleyball- Ibuye ryanzwe n’abubatsi kandi ari ryo ryagakomeje imfuruka

Yanditswe na Jah d’eau Dukuze
Kuya 31 May 2024 saa 03:09
Yasuwe :

Uyu munsi nari nakoze ibishoboka ngo sinifashije ingero zo muri Bibiliya cyane ko maze iminsi mpura n’inkuru zo mu Ruhango na Kimisagara zigaragaza ko ubu butumwa bwera ahari butakigera ku mitima ya bene Gihanga. Aha ariko, Umwana w’Imana ngo rimwe yigeze kubwira bene wabo wa Netanyahu ati "Ubwami bw’Imana muzabunyagwa, buhabwe ishyanga ryera imbuto zabwo."Aha yashimangiraga ibyanditswe muri Zaburi ko ibuye abubatsi banze ari ryo ryakomeje imfuruka.

Mu gihe nkomeza kuvuga nti "mwuka wera abasobanurire" njye reka nisubirire mu myaka 11 ishize tariki ya 17 Ukwakira 2013 ubwo mu cyumba cy’inama cy’icyahoze ari MINISPOC, kuri ubu hari kubakwa imwe mu ma stade meza mu karere, uwahoze ari Umuyobozi Mukuru ushinzwe Siporo Emmanuel Bugingo yarimo asobanurira abanyamakuru Politike nshya ya siporo yari imaze umwaka yemejwe.

Iyi yari yihaye intego zitandukanye aho nyinshi zabaye nka bya bitwenge by’inkoko kuko zaheze mu mpapuro gusa.

Aha hari hemejwe ko hari amashyirahamwe azahabwa ingufu kurusha ayandi, Ruhago twese dukunda, Basketball, Volleyball, Amagare, Gusiganwa ku maguru n’imikino y’abafite ubumuga.

Ibi byatumye ahabwa intego zidasanzwe zagombaga kugeza mu mwaka wa Covid na ko muri 2020.

Utitaye kuri byinshi bitagezweho, Politike ya Siporo yo mu mwaka wa 2012 yari yihaye intego z'uko u Rwanda ruzaba ruri mu bihugu bya mbere muri Afurika muri Siporo

Ikipe y’igihugu y’umupira w’amaguru “Amavubi” yagombaga kuba iri mu makipe icumi ya mbere muri Afurika, mu gihe amakipe y’igihugu ya Basketball, Volleyball, umukino w’amagare, gusiganwa ku maguru ndetse n’imikino y’abafite ubumuga yagombaga kuba mu makipe atatu ya mbere.

Aha, uretse umukino wa nyuma(Sitting Volleyball ni iya mbere mu bagore ikaba iya kabiri mu bagabo) iyindi yose ntabwo byakunze.

Gusa aha iyo urebye mu yindi mikino isigaye, Volleyball ni wo mukino wagerageje gukomanga kuri izo ntego igihugu cyari cyihaye. Ikipe y’igihugu yakuye umwanya wa kane mu mikino nyafurika mu gihe amakipe ya Gisagara n’icyari Kaminuza Nkuru y’u Rwanda yagiye agera mu myanya ine mu marushanwa nyafurika yabereye mu barabu.

Ibi byose, umukino wa Volleyball ukaba ubikora usa nk’uwirya ukimara.

Gisagara VC yakuye umwanya wa gatatu mu mikino ihuza amakipe yabaye aya mbere iwayo wagereranya na BAL muri Basketball

Mu Rwanda, birazwi ko ntako Leta itagira ngo ishyigikire Siporo ariko uramutse upimye ziriya eshanu twagarutseho, wasanga Volleyball ari yo ihabwa ubushobozi buke. Buri mwaka, leta ishyira Miliyoni zirenga 500 mu gutegura Tour du Rwanda mu magare, arenga miliyari buri mwaka mu makipe y’igihugu ya ruhago, arenga miliyoni 100 atangwa mu gutegura Peace Marathon buri mwaka mu gihe ikipe yatwaye shampiyona ya Basketball ihabwa miliyoni 200 zo kwitegura BAL.

Ese haba hari amafaranga ahoraho ahabwa Volleyball buri mwaka ngo uyu mukino utere imbere? Igisubizo ni uko ari ’Oya’, ari yo mpamvu ubwo shampiyona yari iryoshye kurusha izindi zakinwe mu Rwanda yari ishojwe, ikipe ya mbere yahawe miliyoni ebyiri.

Aya mafaranga ubanza asigaye ari umushahara w’umukinnyi ku kwezi.

Ibi nyamara bikorwa mu gihe umukino wa Volleyball ari umwe muri mbarwa isigaye mu Rwanda itagaragaramo ibyeze hanze aha byitwa “gutegura” , ya manyanga y’amarozi na Ruswa Umukuru w’Igihugu Paul Kagame akunda kugarukaho muri Volleyball ntiwabibona.

Ni umukino benshi batazira ko ari uw’intiti, ukaba ufite umwihariko ko ari wo wubakitse bigaragara ushingiye ku mashuri guhera mu y’abanza kugeza muri Kaminuza.

Abanyarwanda bakunda Volleyball!

Ni abakinnyi bangahe bakina mu makipe akomeye muri Basketball mu Rwanda tuzi mu myaka itandatu ishize babica muri “interscolaire”? Ni bangahe muri ruhago? Mu magare ho reka nceceke.

Nonese ko mu Rwanda abana barenga 97% bo munsi y’imyaka 18 bari mu mashuri, abo bo mu yindi mikino banyuze he? Bakuriye he? Bazamukiye he? Aho ni ho Volleyball ikosorera ahandi, kuko ni ho usanga shampiyona ikinwa n’ibigo by’amashuri gusa, aho utazumva bya birego by’abigize Abanyarwanda ku ngufu.

Kugira ngo ubisobanukirwe neza, APR VC iheruka kwegukana shampiyona yari ifite abakinnyi barenga batanu mu myaka itanu iheruka bakinaga imikino y’abanyeshuri uhereye kuri Gatsinzi wabujije Kepler ibyishimo.

Volleyball ni umukino abanyarwanda benshi baciye mu ishuri bakura bakina, aho muri ya ma saa tanu yo muri ’Weekend’ no muri ’Chômage’ benshi bifashisha uyu mukino ngo barwanye inzara yo muri ’Internat’ nubwo baba basanzwe batawukina ku rwego rwo hejuru.

APR ziheruka kwegukana shampiyona zari ziganjemo abakinnyi bamenyekaniye mu mikino ihuza ibigo by'amashuri

Mu gihe gukundwa k’uyu mukino no kuba uri muri mike Abanyarwanda bafitemo impano bitagirwaho impaka, kugeza n’uyu munsi uracyagongwa na ya mvugo ko ’Iyo amazi abaye make aharirwa Basketball na ko imfizi’.

Ejobundi ubwo Volleyball yirukanwaga shishi itabona, abenshi bibaje niba ariko byari kugenda iyo haza kuba hagiye gukinirwamo wenda umukino wa nyuma hagati ya APR BBC na Patriots…

Ntacyo mfa n’uyu mukino gusa hejuru y’ibiba byashowemo muri shampiyona n’ama-clubs, hejuru yo gushaka abatoza bahenze n’abakinnyi bakomoka hakurya ya Atlantique, ikipe y’igihugu mu myaka itandatu ishize yatsinzwe imikino 17 muri 25 yakinnye.

N’izo ntsinzi eshatu muri zo yazikuye mu mikino y’ejobundi ya AFRO CAN yavuzweho byinshi. Aha ugereranyije na Volleyball muri iyo myaka , yatsinzwemo inshuro eshanu zonyine!

Rero ngo habwirwa benshi hakumva bene yo, ubanza igihe ari iki cyo kwifashisha ya mvugo ya Yesu Umwana w’Imana yavuze agira ati ubwami bw’Imana muzabunyagwa, buhabwe ishyanga ryera imbuto zabwo kuko hari ibuye abubatsi banze kandi ari ryo rikomeza imfuruka.

Iki cyakabaye igihe ko umukino wa Volleyball ushyigikirwa cyane kuko uri muri mike abanyarwanda bafitemo impano karemano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .