00:00:00 IGIHE NETWORK KN KINYARWANDA EN ENGLISH FR FRANCAIS

Ruhango yiyemeje guteza imbere Volleyball no kubaka ‘gymnase’

Yanditswe na Prudence Kwizera
Kuya 21 Ukuboza 2022 saa 12:13
Yasuwe :

Nk’uko biteganyijwe ko buri karere ko mu Ntara y’Amajyepfo kagomba kugira umwihariko w’umukino byibura umwe gateza imbere mu gufasha abato gukuza impano no gufasha abaturage kwishima, aka Ruhango kahisemo kuzamura Volleyball.

Nk’uko biteganyijwe ko buri karere ko mu Ntara y’Amajyepfo kagomba kugira umwihariko w’umukino byibura umwe gateza imbere mu gufasha abato gukuza impano no gufasha abaturage kwishima, aka Ruhango kahisemo kuzamura Volleyball.

Byatangajwe ubwo mu Karere ka Ruhango hakinirwaga Agace ka Gatandatu ka Shampiyona y’Umukino wa Volleyball y’u Rwanda ku wa 18 Ukuboza 2022.

Umuyobozi w’Akarere ka Ruhango, Habarurema Valens, yashimiye Ishyirahamwe Nyarwanda rya Volleyball ryahisemo akarere ngo kakire uwo mukino kandi byabateye umurava wo gukomeza gahunda batangiye yo kuwuteza imbere.

Yagize ati “Nshimiye ‘Federasiyo’ ya Volleyball yahisemo ko Akarere ka Ruhango kakwakira agace ka gatandatu ka shampiyona. Ibi bisobanuye ko abaturage b’Akarere ka Ruhango bagomba gukora ariko bakagira ibyishimo muri weekend.”

Yakomeje avuga ko Akarere ka Ruhango kagiye guteza imbere Volleyball by’umwihariko.

Ati “Turashaka guteza imbere imikino ya Volleyball kuko twashinze ikipe y’abagore yitwa Ruhango Women Volleyball Club. Twari dusanzwe dufite ibibuga ariko ubu tugiye kubaka inzu y’imikino (Gymnase) izajya ikinirwamo Volleyball ku buryo taliki ya 1 Nyakanga 2023 izaba yatangiye gukinirwamo.’’

Yasobanuye ko iby’ingenzi kugira ngo iyo nyubako yubakwe byateguwe ndetse imirimo igiye gutangira.

Yaguze ati "Mu Karere ka Ruhango dufite umushinga wa “Sports Complex” cyane cyane ugizwe na “Gymnase” izubakwa haherewe ku kuvugurura inzu mberabyombi y’Akarere isanzwe, ariko ishaje. Iyi nyubako iherereye iruhande rw’Ibiro by’Akarere mu Murenge wa Ruhango. Mu kuyivugurura izakorwa mu buryo yakira inama n’imikino nka VolleyBall na BasketBall n’imyidagaduro."

Yavuze ko izaba yakira abantu 1.400 mu nama bicaye neza mu gihe mu mikino ari abantu 500 barimo 300 bicaye neza na 200 bahagaze.

Ati "Izatwara ingengo y’imari ikabakaba 450.000.000 Frw."

Habarurema yavuze ko iyo nyubako y’imikiji ari kimwe mu bikorwa by’Akarere bigamije gushyigikira ibyishimo by’abaturage no kuzamura ubukungu kuko hazajya hateranira abantu benshi ari nabo baguzi b’ibikorerwa mu Ruhango.

Biteganyijwe ko izaba yuzuye mu mpera z’Ukwezi kwa Nyakanga 2023.

Agace ka Gatandatu muri Shampiyona ya Volleyball kabereye mu Karere ka Ruhango kitabiriwe n’amakipe umunani mu bagabo n’arindwi mu bagore.

Gisagara Volleyball Club ni yo yakegukanye mu bagabo itsinze APR Volleyball Club amaseti 3-0 mu gihe APR Women Volleyball Club yatsinze Forefront Women Volleyball Club amaseti 3-1.

Aha ni ho Umuyobozi w’akarere ka Ruhango, Habarurema Valens, ahera avuga ko Ruhango Women Volleyball Club na yo igomba kuba mu makipe yitwara neza.

Ati “Turashaka kubaka ikipe ikomeye igomba gutwara igikombe. Turifuza ko umwaka utaha ikipe ya Ruhango izaba iri ku rwego ruruta ikipe zose zo mu Rwanda kuko turifuza ko iza ari ikipe itwara ibikombe.”

Agace ka Mbere ka Shampiyona y’Icyiciro cya Mbere muri Volleyball kabereye mu Karere ka Gisagara, aka kabiri gakinirwa mu Mujyi wa Kigali; aka gatatu kajyanwa i Kirehe mu gihe aka kane n’aka gatanu twakiniwe i Kigali.

Ikipe ya REG VC na Gisagara VC kugeza ubu ziranganya amanota ariko REG VC ni yo iyoboye nk’uko amategeko abigena iyo amakipe anganyije amanota harebwa uduce cyangwa amaseti yatwaye.

REG VC yatwaye agace ka gatatu, itwara aka kane n’aka gatanu, mu gihe Gisagara VC yo yatwaye agace ka mbere n’aka gatandatu gusa.

Akarere ka Ruhango kagiye kubaka ‘gymnase’ izajya yakira imikino ya Volleyball
Iyi gymnase izatwara ingengo y’imari ikabakaba 450.000.000 Frw
Biteganyijwe ko izuzura mu mpera za Nyakanga 2023
Iyi gymnase ifite ubushobozi bwo kwakira abantu 1.400 mu nama bicaye neza mu gihe mu mikino ari abantu 500
Akarere ka Ruhango kiyemeje guteza imbere Volleyball gahereye no ku kubaka ibikorwaremezo by'uyu mukino
Ishusho ya gymnase igiye kubakwa mu Ruhango uyirebeye hejuru
Ruhango yiyemeje guteza imbere Umukino wa Volleyball

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .