RRA VC ntiyahiriwe n’umukino wa mbere, itsindirwa mu Misiri seti 3-0

00:00:00 IGIHE NETWORK

KINYARWANDA

ENGLISH

FRANCAIS

RRA VC ntiyahiriwe n’umukino wa mbere, itsindirwa mu Misiri seti 3-0

Yanditswe na

IGIHE

Kuya 28 March 2015 saa 01:40

Yasuwe :

Yavuzweho:

Ikipe y’Ikigo cy’Imisoro n’amahoro ihagarariye u Rwanda mu irushanwa nyafurika ry’amakipe yabaye aya mbere iwayo ririmo gukinirwa mu Misiri, mu mukino wa Volley Ball mu bari n’abategarugori ntiyabashije gukura intsinzi kuri Shams yo muri icyo gihugu.

Ikipe Shams yakiniraga imbere y’abafana bayo batari benshi i Cairo mu Misiri, yatsinze RRA VC seti 3-0 (25-19; 25-17; 25-17), ukaba wari umukino wa mbere mu ijonjora muri iri rushanwa rihuriyemo amakipe 13.

Kapiteni w’Ikipe ya RRA Hakizimana Judith yatangaje ko ikibazo bagize ari ikijyanye no gukingira (block) kutakozwe neza, ikindi na cyo cyatumye batakaza amanota ni ikijyanye na “services”.

Yagize ati “Kugira ngo dutsindwe byatewe n’uko gukingira (block) itakoze nk’uko isanzwe ibikora na serivisi (uburyo bwo gusubiza umupira mu kibuga) zacu ntabwo zari zikomeye nk’uko dusanzwe tubikora ku buryo byaboroheye gukora reception (kwakira no gukina imipira iturutse ku wo bahanganye).”

Uyu mukino RRA itangiranyemo amahirwe make yo kubona tike izatuma ibasha kwinjira muri ¼, urakurikirwa n’undi uyihuza n’ikipe yaturutse muri Senegal kuri uyu wa Gatandatu tariki ya 28 Werurwe 2015.

Umutoza w’iyi kipe Jean Luc Ndayikengurukiye yemeza ko abakobwa atoza, batagize igihunga bagakora ibyo basanzwe bakora mu myitozo nta kabuza batsinda ikipe yo muri Senegal, kuko bayikeneyeho itike yo kwinjira muri 1/4.

Ati “Guhura n’iriya kipe ni yo mahirwe dusigaranye, birasaba rero ko twishyira mu mutuzo tugakora ibyo dusanzwe dukora mu myitozo twirinda igihunga. Dukoze nk’uko biba mu myitozo twazitsinda.”

Aya makipe nyafurika uko ari 13 ari mu matsinda 4, ateye ku buryo bukurikira:

Itsinda A ririmo RRA VC (Rwanda), Shams (Egypt) na Saltigue (Senegal);

Itsinda B ririmo GSP (Algerie), KCB (Kenya) na AHL (Egypt);

Itsinda C ririmo Pipeline (Kenya), FAP (Cameroun) Kutliwano (Botswana);

Itsinda D ririmo Carthage (Tunisia), Vision (Uganda), Injis (Cameroun) na ARSU (Seychelles).

Ikipe ya RRA ni yo yonyine ihagarariye u Rwanda muri iri rushanwa, ikaba ibikesha kuba yaratwaye igikombe cya Shampiyona ya 2014.

Mu yandi makipe yabonye intsinzi harimo Vision ya Uganda, Carthage ya Algerie, Pipeline ya Kenya.

Umukino wo gufungura wayihuje na ngenzi yayo Shams yo mu Misiri wabaye nyuma gato y’imihango yo gufungura iyi mikino ya 2015 ku mugaragaro aho yari yitabiriwe n’abayobozi baturutse mu mpuzamashyirahamwe y’umukino wa Volley Ball muri Africa ndetse n’Intumwa za Ministeri ya Sport mu Misiri.