00:00:00 IGIHE NETWORK KN KINYARWANDA EN ENGLISH FR FRANCAIS

Amakipe ya APR VC yatangiye atsindwa mu mikino ya nyuma ya Play Offs

Yanditswe na Jah d’eau Dukuze
Kuya 25 May 2024 saa 08:03
Yasuwe :

Imikino ya nyuma ya kamarampaka mu mukino wa Volleyball isize amakipe ya APR VC mu bagabo n’abagore atunguwe kuko yatsinzwe imikino ya mbere yaberaga imbere y’abafana bayo benshi, bari baje kuri Ecole Notre Dame des Anges i Remera.

Iyi mikino ku ikubitiro ikaba yagombaga kubera mu nyubako nshya y’ishuri rya Ecole Belge ku Gisozi, gusa ubwumvikane buke hagati y’iki kigo n’Umujyi wa Kigali bituma yimurwa ijyanwa i Remera ku mugoroba wo kuri uyu wa gatanu.

Iyi mikino ya nyuma ikaba yabanjirijwe no guhatanra umwanya wa gatatu aho ’Rwanda Revenue’ mu bagore yatsinze Ruhango amaseti 3-1 igatera intambwe yo kwegukana uyu mwanya. Mu bagabo, undi mukino utari woroshye wahuje Police VC yaje gutsindwa na REG bigoranye seti 3-1 (29-27, 17-25, 19-25, 23-25).

Umukino wa nyuma wa mbere ukaba wahuje ikipe ya Police VC mu bagore na APR VC maze iyi kipe y’ingabo z’igihugu ikaza gutungurwa dore ko yatsinzwe Seti 3-0 (12-25, 17-25, 22-25), nyamara yari yarigaruriye Police itozwa na Hatumimana Christian.

Umukino wa nyuma mu bagabo wo wahuje amakipe abiri yagize umwaka mwiza wa shampiyona, aho Kepler iheruka kwegukana irushanwa rya Memorial Kayumba i Huye, yateye intambwe igana ku gikombe cyayo cya mbere cya shampiyona ubwo yatsindaga APR VC seti 3-1.

Uyu mukino washojwe saa munani z’ijoro, ikipe ya Nyirimana Fidele yagaragaje urwego rwo hejuru by’umwihariko umukinnyi wayo Mutabazi Yves watsinze amanota menshi yatumye ikipe yahozemo itakaza umukino kuri izo seti 3-1 (25-14, 25-18, 19-25, 25-18).

Imikino ikaza gukomeza kuri uyu munsi ku wa gatandatu ndetse nayo ikaza kubera muri Ecole Notre Dame des Anges i Remera. Amakipe ya APR VC mu bagabo n’abagore akaba asabwa gutsinda kugira ngo hazakinwe umukino wa kamarampaka ku cyumweru, bitabaye ibyo akaba yahita atakaza igikombe kuri uyu munsi.

Federasiyo y'umukino wa Volleyball mu Rwanda yasabye imbabazi kubera ibibazo by'ikibuga byatumye imikino yimurwa ndetse ikanatinda kurangira
APR ntabwo yashoboye kwitwara neza mu kubuza imipira kugana mu kibuga cyayo (Block) nk'uko byari byagenze ku mukino wa REG
Abafana kuri Notre Dame des Anges bari bakubise buzuye
Kepler ni yo yari ishyigikiwe kurusha izindi
Umuyobozi wa Kaminuza ya Kepler yari yaje gutiza umurindi ikipe ye
Kepler VC yongeye kwerekana urwego rwo hejuru muri uyu mukino
APR VC ntabwo yashoboye kwihagararaho imbere ya Kepler
Ikipe ya Police WVC yatunguye APR iyitsinda umukino wa mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .