Fethi Nourine w’imyaka 30, yagombaga guhura n’Umunya-Sudani Mohamed Abdalrasool mu murwano we wa mbere mu bagabo bafite ibilo 73 ndetse gutsinda kwe byari kumuhesha guhura n’Umunya-Israel, Tohar Butbul, mu ijonjora rikurikiraho.

Nourine yavuze ko mu bijyanye na politiki ashyigikiye Abanya-Palestine mu ntambara bahuriramo n’Abanya-Israel bityo atari gukinana na Butbul.

Icyo gihe, Komite Olempike ya Algeria yahise isaba ko uburenganzira Nourine n’umutoza we Amar Benikhlef bahawe bitabira Imikino Olempike ya Tokyo 2020 buteshwa agaciro, bahita boherezwa mu rugo.

Ishyirahamwe Mpuzamahanga ry’Umukino wa Judo ryari ryahagaritse Nourine na Benikhlef by’agateganyo rivuga ko bakoresheje imikino nk’uburyo bw’imyigaragambyo no gushyigikira gahunda za politiki n’amadini kandi binyuranyije n’amategeko ngengamyitwarire yaryo.

Kuri ubu, bahagaritswe mu bikorwa byose bya IJF kugeza ku wa 23 Nyakanga 2031, ariko bemerewe kujuririra icyo cyemezo mu Rukiko rwa Siporo ku Isi (CAS).

Si ubwa mbere Nourine yari yikuye mu irushanwa ngo adahura n’Umunya-Israel. Yabikoze mu 2019 muri Shampiyona y’Isi kubera impamvu nk’iziheruka.

Intambara hagati ya Israel na Palestine imaze imyaka myinshi ndetse haherutse kubaho gushyamirana gukomeye kwavuyemo gutana mu mitwe mu gace ka Jerusalem karwanirwa n’ibihugu byombi.

Fethi Nourine n'umutoza we, bombi bahagaritswe imyaka 10 mu bikorwa bya Judo kuko yanze gukina n'Umunya-Israel mu mikino Olempike ya Tokyo 2020