00:00:00 IGIHE NETWORK KN KINYARWANDA EN ENGLISH FR FRANCAIS

Imidali 11 ya Zahabu, ubwandu bwa COVID-19 n’umunsi utazibagirana kuri USA: Ibyaranze umunsi wa mbere i Tokyo (Amafoto)

Yanditswe na Eric Tony Ukurikiyimfura
Kuya 25 Nyakanga 2021 saa 01:20
Yasuwe :
0 0

Umunsi wa mbere w’Imikino Olempike ya Tokyo 2020, wasize u Bushinwa ari cyo gihugu cyegukanye umudali wa mbere wa Zahabu cyo kimwe n’u Buyapani bwakiriye iyi mikino.

Imikino Olempike ya Tokyo 2020 ni iya 32 ibaye ndetse yitabiriwe n’abakinnyi basaga ibihumbi 11 bo mu bihugu 207, bazarushanwa mu mikino 50.

Muri iyi mikino ikomeje kubera i Tokyo mu Buyapani, abakinnyi barimo aba Tennis binubiye ubushuye buhari ndetse basabye ko imikino yabo yajya itangira mu masaha akuze.

Umunya-Equateur Richard Carapaz ari mu begukanye imidali kuri uyu munsi wa mbere, aho yabaye uwa mbere mu isiganwa ry’amagare ryo mu muhanda, ahesha igihugu cye umudali wa kabiri wa Zahabu mu mateka y’Imikino Olempike.

Umushinwakazi Yang Qian ni we wabaye uwa mbere wegukanye umudali wa Zahabu kuri uyu wa Gatandatu ubwo yatsindaga mu kurasa mu ntera umwuka uremereye hifashishije imbunda yabugenewe muri uwo mukino ‘Air gun’.

Nyuma yaho gato, mugenzi we, Hou Zhihui, yegukanye umudali wa Zahabu aciye agahigo mu Mikino Olempike kuko yarushanyijwe mu bagore bari munsi y’ibilo 49 mu guterura ibiremereye, agatsinda ku manota 210.

Umuyapani Naohisa Takato yegukanye umudali wa Zahabu atsinze Umunya-Taiwan Yang Tung-wei muri Judo mu cyiciro cy’abafite ibilo 60.

Umuforomo wo muri Iran, Javad Foroughi, yegukanye umudali wa Zahabu mu kurasa umwuka muri metero 10 hifashishijwe imbunda nto ‘air pistol’ mu gihe Abanya-Korea y’Epfo, An San na Kim Je-deok batwaye umudali mu kumasha abahungu bavanze n’abakobwa.

Mu yindi mikino yabaye, Novak Djokovic usanzwe ari nimero ya mbere muri Tennis y’abagabo, yatangiye neza kuko yasezereye Umunya-Bolivia kuri 6-2 6-2, akomeza urugendo rwo gushaka ‘Golden Slam’ [kwegukana amarushanwa yose ane akomeye ya Grand Slam n’umudali wa Zahabu mu Mikino Olempike mu mwaka umwe].

Umuyapani Kohei Uchimura umaze kwegukana imidali irindwi mu Mikino Olempike, yasezerewe mu ijonjora ryo kwizengurutsa ku ntera ndende yo hejuru.

Daiya Seto wari icyizere cy’Abayapani cyo kwegukana umudali wa Zahabu mu koga metero 400, na we yananiwe kurenga ijonjora ryakinwe kuri uyu wa Gatandatu.

Umuholandi Finn Florijin yagombaga kurushanwa kugashya ubwato mu cyiciro cya kabiri, ariko bigaragara ko yanduye COVID-19 nubwo yari yakinnye ijonjora rya mbere.

Uyu musore w’imyaka 21 yahise ajya mu kato ndetse ntazongera gukina muri iyi Mikino. Florijin yabaye kandi umukinnyi wa mbere usanzwemo COVID-19 nyuma yo kurushanwa i Tokyo.

Nk’uko byagenze kuri Yang washyikirijwe umudali yatsindiye na Perezida wa Komite Olempike Mpuzamahanga, Thomas Bach, akawumuha ku ipalato, ni na ko bizajya bigenda ku bayihabwa muri iyi mikino kubera ingamba zo kwirinda COVID-19, aho abakinnyi bazajya bayiyambika ndetse bakambara neza agapfukamunwa.

Imikino ya Tokyo 2020 ntizibagirana kuri Leta Zunze Ubumwe za Amerika kuko ari inshuro ya mbere kuva mu 1972, aho zitabashije kwegukana umudali uwo ari wo wose ku munsi wa mbere w’iyi mikino.

Nyuma y’umunsi wa mbere, ibihugu bimaze kubona umudali wa Zahabu ni u Bushinwa (3), u Butaliyani, u Buyapani, Koreya y’Epfo, Equateur, Hongria, Iran, Kosovo na Thaïande.

U Bushinwa buyoboye urutonde rusange n’imidali ine (harimo umuringa), bukurikiwe n’u Butaliyani bufite ibiri (harimo feza), u Buyapani bufite ibiri (harimo feza) na Koreya y’Epfo ifite imidali itatu irimo ibiri y’umuringa.

Umushinwakazi Yang Qian yabaye umukinnyi wa mbere wegukanye umudali wa Zahabu mu Mikino ya Tokyo 2020
Abashinwa bari bashyigikiye Yang Qian
Javad Foroughi wegukanye umudali mu kurasa umwuka muri metero 10 asanzwe ari umuforomo muri Iran
Umushinwakazi Zhihui Hou yishimira umudali wa Zahabu yegukanye mu guterura ibiremereye
Umunya-Serbia Novak Djokovic ari mu batangiye neza muri Tennis
Djokovic yishimira intsinzi yabonye kuri Hugo Dellien wo muri Bolivia
Umurusiya Daniil Medvedev akina na Alexander Bublik wo muri Kazakhstan
Umunya-Equateur Richard Carapaz yegukanye umudali wa Zahabu nyuma yo kugera ku murongo ari uwa mbere, yasize abandi umunota umwe n'amasegonda arindwi ku ntera y'ibilometero 234
Umubiligi Wout van Aert (ibumoso) yatwaye Feza, Richard Carapaz (hagati) yambara Zahabu mu gihe Todej Pogacar (iburyo) yatwaye umudali w'Umuringa
San An na Je Deok Kim bo muri Koreya y'Epfo batwaye umudali wa Zahabu mu kumasha
Imidali ihabwa abakinnyi bari kwitwara neza mu Mikino Olempike ya Tokyo 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .