Uganda na Kenya byihariye imidali mu mikino ya FEASSSA

Yanditswe na Manzi Rema Jules
Kuya 18 Kanama 2018 saa 10:47
Yasuwe :
0 0

Uganda na Kenya bimaze kwegukana imidali 37 mu mikino y’amashuri abanza n’ayisumbuye mu Karere ka Afurika y’Iburasirazuba (FEASSSA) iri kubera i Musanze.

U Rwanda rwo n’ibiri gusa.

Ibi bihugu byamaze kwegukana imidali ya mbere mu mikino ngororamubiri irimo iyo kwiruka metero 100, 200, 1,500 no gusimbuka umurambararo.

Abakinnyi baserukiye Uganda bari imbere mu gutwara imidali myinshi kugeza ubu, aho bafite icyenda ya zahabu, itandatu ya feza n’ine y’umuringa.

Abanya-Kenya batwaye itatu ya Zahabu, itandatu ya feza n’icyenda y’umuringa mu gihe Abanyarwanda bo bamaze gutwara umwe wa Zahabu n’umwe wa feza.

Mu mupira w’amaguru mu bahungu, mu mukino wari ukomeye LDK (Lycee de Kigali) na Buddo SS yo muri Uganda warangiye ari 0-0.

Muri ½, Buddo SS izahura na Kimaya mu gihe Kakamega High yo muri Kenya izahura na LDK. Imikino yose iraba kuri uyu wa Gatandatu.

Muri Volleyball y’abakobwa, G.S. Indangaburezi ya Ruhango yageze ku mukino wa nyuma yihanije IPRC Kigali ku maseti atatu ku busa.

Izahura na Kwanthanze yo muri Kenya ifite iki gikombe inshuro eshatu zikurikirana, yasezereye Cheptil nayo yo muri Kenya ku maseti atatu kuri abiri.

Muri Basketball y’abahungu APE Rugunga, ihagarariye u Rwanda yageze ku mukino wa nyuma itsinze S Seta Main yo muri Uganda amanota 71-57 ikazahahurira na ETENI yatsinze Sigalame yo muri Kenya amanota 69-58.

Mu mikino y’intoki ya Handball mu bakobwa amakipe yo mu Rwanda atarahiriwe n’irushanwa, ku munsi wa Gatatu yakomeje gutsindwa aho APEGA, Gikonko na Kirambo, zose zatakaje imikino yazo, amahirwe yo kwegukana igikombe akayoyoka.

Mu bahungu muri ½, muri ane yageze muri iki cyiciro harimo atatu yo mu Rwanda ariyo ADEGI na College Gisenyi zigomba kwishakamo igera ku mukino wa nyuma na ES Kigoma izisobanura na Kanyawanga yo muri Kenya kuri uyu wa Gatandatu.

Aya marushanwa azasozwa ku Cyumweru tariki 19 Kanama ari kuba ku nshuro ya 17. Yitabiriwe n’abakinnyi hafi 2000 bo mu bihugu bya Kenya, Uganda na Tanzania.

Amakipe ya Kenya na Uganda ni yo amaze kwegukana imidali myinshi muri FEASSSA
Muri aya marushanwa hakinwa imikino itandukanye irimo no gusimbuka umurambararo
Muri Basketball amakipe atatu ahagarariye u Rwanda yageze muri kimwe cya kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza