Julian Assange yemerewe kongera gukoresha internet

Yanditswe na Mukaneza M.Ange
Kuya 15 Ukwakira 2018 saa 08:13
Yasuwe :
0 0

Guverinoma ya Equateur yemereye Julian Assange washinze urubuga rwa WikiLeaks, uri mu buhungiro muri Ambasade y’iki gihugu mu Bwongereza kuva mu myaka itandatu ishize, kongera gukoresha Internet.

Muri Werurwe 2018 nibwo Equateur yafungiye Internet Assange, nyuma y’uko hari ibibazo yagarutseho ku mbuga nkoranyambaga ze birimo ibirebana n’u Bwongereza, u Burusiya ndetse no kwigenga kw’intara ya Catalogne muri Espagne.

Guverinoma ya kiriya gihugu yavuze ko ibi bishobora kugira ingaruka ku mibanire ya Equateur n’ibindi bihugu, bituma ifata umwanzuro wo kubuza uyu munya-Australia kongera gukoresha Internet aho yari yemerewe kuvugana n’abanyamategeko be gusa.

Urubuga rwa WikiLeaks rwifashishije konti ya Twitter mu gutangaza ko kuri ubu Assange yakuwe mu kato akaba yemerewe kongera gukoresha itumanaho rya internet.

Reuters ivuga ko aya makuru yanahamijwen’umwunganizi we, Greg Barns, wavuze ko ari intambwe ikomeye.

Mu 2012 nibwo Assange uherutse guhabwa ubwenegihugu bwa Equateur yahungiye muri ambasade y’iki gihugu, nyuma y’uko urukiko rwo mu Bwongereza rwari rwategetse ko yoherezwa muri Suède guhatwa ibibazo ku byaha byo guhohotera umwana.

Nubwo ibi birego byaje guhagarikwa, inshuti z’uyu mugabo zivuga ko afite ubwoba ko aramutse avuye mu buhungiro ashobora gutabwa muri yombi akoherezwa muri Leta Zunze Ubumwe za Amerika.

Assange na WikiLeaks yashinze bakurikiranyweho kumena amabanga arebana n’ububanyi n’ibikorwa by’igisirikare cya Amerika.

Nubwo mu 2016 Perezida Donald Trump yagaragaje ko yishimiye kuba WikiLeaks yarashyize hanze amabanga ya Hillary Clinton bari bahaniye kuyobora Amerika.

WikiLeaks iherutse gutangaza ko mu gihe Assange akiri mu buhungiro, Kristin Hrafnsson bakoranye igihe kirekire ari we wamusimbuye ku mwanya w’umwanditsi mukuru.

Julian Assange amaze imyaka itandatu mu buhungiro muri ambasade ya Equateur mu Bwongereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza