Umutoza w’ikipe y’igihugu ya Karate asanga hageze ngo siporo y’u Rwanda ishingire ku bushakashatsi

Yanditswe na Eric Tony Ukurikiyimfura
Kuya 1 Ugushyingo 2019 saa 06:10
Yasuwe :
0 0

Umutoza w’ikipe y’igihugu ya Karate, Nkuranyabahizi Noël, wari umaze iminsi muri Leta zunze Ubumwe za Amerika, aho yari yitabiriye inama, yavuze ko kimwe mu bituma siporo y’u Rwanda idatanga umusaruro ari uko hadakurikiranwa ivugururamibereho ry’abakinnyi.

Nkuranyabahizi yitabiriye inama y’ihuriro ry’abafasha mu by’ivugururamibereho muri siporo, yabereye mu Mujyi wa Denver mu ntara ya Colorado hagati ya tariki ya 21 na 23 Ukwakira.

Ni inama yari yahuje abashakashatsi baturutse muri za Kaminuza zose zo muri Amerika n’abandi banyarwamuryango ba ‘Alliance of Social Workers in Sports”, Ihuriro ry’abakora ivugururamibereho ry’abakinnyi.

Uyu mutoza w’ikipe y’igihugu, Umunyafurika rukumbi witabiriye iyi nama, yavuze ko bimwe mu bigomba guhinduka kugira ngo abakinnyi batange umusaruro ari uburyo bategurwamo, aho bakagombye kujya bitabwaho ndetse bagakurikiranwa mu buryo bwihariye no mu buzima bwabo bwa buri munsi,

Ati “Umutoza ategura umukinnyi byagera mu irushanwa ukabona biranze kandi usanzwe uziko abizi. Si abakinnyi kuko n’abatoza bakwiye gutegurwa mu mutwe kuko ashobora kutakira imyitwarire y’umukinnyi ugasanga arimo kumubwira nabi n’ibindi.”

Nkuranyabahizi yabwiye IGIHE ko mu kiganiro yatanze muri iyi nama, yasangije abayibitabiriye uko ubuzima bwa siporo muri Afurika no mu Rwanda buhagaze, uko abakinnyi babayeho n’icyo siporo imariye sosiyete.

Ati“ Nagezeyo ntanga ikiganiro cyanjye, hari abahanga benshi, naberetse uburyo dukora mu ishuri ry’abana muri Karate n’icyo bifasha abana muri rusange, kandi barabishimye cyane.”

Yakomeje avuga ko mu byo yungukiye muri iri nama harimo gukora ibikorwa byinshi bijyane na siporo birimo gutegura abakinnyi hashingiwe ku bushakashatsi.
Ati“ Abateye imbere bakora ubushakashatsi bakareba ikibazo gihari hanyuma bakabona kugishakira umuti.”

“Tugomba kumenya ngo umukinnyi uhereye hasi ategurwa gute? Yaba mu mbaraga, imitekerereze n’imibereho. Tukamenya iyo akuze ahura n’ikihe kibazo? Nyuma y’ikibuga abaho gute? ibyo byose iyo byagenze neza ni bwo umukinnyi amera neza akanatanga umusaruro.”

Biteganyijwe ko mu minsi iri imbere, mu Rwanda hazatangizwa iyi gahunda y’ivugururamibereho kugira ngo abantu bimenyereza gukora ubushakashatsi ku bibazo birangwa muri siporo.

Umutoza w’ikipe y’igihugu ya Karate, Nkuranyabahizi Noël, akubutse mu nama y'ihuriro rya ‘Alliance of Social Workers in Sports” muri Amerika
Nkuranyabahizi Noël yasangije abitabiriye iyi nama uko siporo ikorwa mu Rwanda no muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza