Karate: U Rwanda rwizeye imidali muri shampiyona ya Afurika yitabiriwe n’ibihugu 25

Yanditswe na Manzi Rema Jules
Kuya 31 Kanama 2018 saa 12:56
Yasuwe :
0 0

U Rwanda rwizeye kuzasigarana imidali muri shampiyona ya Afurika ya Karate yatangiye kuri uyu wa Gatanu i Rusororo ahazwi nko mu "Ntare Arena" ikazamara iminsi itatu.

Iri rushanwa rya mbere rikomeye u Rwanda rwakiriye muri karate, ryitabiriwe n’ibihugu 25 bihagarariwe n’abakinnyi 282 bazahiganwa mu byiciro bitandukanye mu bagabo n’abagore.

Mbere yo kurifungura ku mugaragaro, Perezida w’ishyirahamwe ry’umukino wa karate ku Isi, Antonio Espinos, yashimiye u Rwanda uko rwariteguye neza.

Yagize ati "U Rwanda ni igihugu cyiza, rwakoze byinshi byiza mu gutegura iri rushanwa kandi nta kabuza rizagenda neza. Shampiyona ya Afurika ni ubwa mbere igiye kwitabirwa n’ibihugu byinshi, bigaragaza uburyo izaba ikomeye cyane."

Antonio Espinos ukomoka muri Espagne uyobora Karate ku Isi kuva mu 1998, yanavuze ko mu nama yagiranye n’abayobozi b’uyu mukino muri Afurika bemeranyije ku buryo watera imbere kuri uyu mugabane bihereye mu bato.

Yagize ati "Twaganiriye ku iterambere ry’umukino wa karate duhereye mu bato bigakorwa mu duce dutandatu dufite duhuza Amashyirahamwe ya Afurika."

Umuyobozi w’Ishyirahamwe ry’umukino wa Karate mu Rwanda, Uwayo Théogène, we yavuze ko abakinnyi batoranyijwe guserukira igihugu muri iri rushanwa biteguye neza ku buryo hari icyizere bazegukana imidali.

Yagize ati "Sinavuga ngo tuzaba aba kangahe ariko mu mezi hafi ane abakinnyi bamaze bitoza, turumva ibyo Abanyarwanda babitezeho bazabigeraho."

Iri rushanwa ryitabiriwe n’abakinnyi 97 b’igitsina gore na 185 mu bagabo bakazarushanwa mu byiciro bitandukanye hakurikijwe imyaka n’ibiro.

Misiri niyo yazanye abakinnyi benshi (31), ikurikiwe n’u Rwanda (28), Cameroun (26), Afurika y’Epfo (21), Algeria na Congo Brazzaville bikaba bifite 20 buri kimwe ibindi bihugu bikaba byarazanye abakinnyi bitewe n’ibyiciro bizarushanwamo.

Iri rushanwa rizasozwa ku Cyumweru rirabera mu Ntare Arena i Rusororo kwinjira bikaba ari ubuntu.

Abayobzi batandukanye ba Karate ku Isi, muri Afurika no mu Rwanda banaganiriye ku iterambere ry'uyu mukino bihereye mu bakiri bato
Antonio Espinos uyobora Karate ku Isi ari mu Rwanda gukurikirana shampiyona ya Afurika
Umuyobozi w'Ishyirahamwe ry'umukino wa Karate mu Rwanda, Uwayo Théogène, yavuze ko abakinnyi b'u Rwanda biteguye neza ku buryo bizeye imidali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza