Karate: U Rwanda rwegukanye imidali ine irimo uwa zahabu muri shampiyona ya Afurika

Yanditswe na Manzi Rema Jules
Kuya 2 Nzeri 2018 saa 11:31
Yasuwe :
0 0

Ku munsi wa kabiri wa shampiyon ya Afurika ya Karate iri kubera i Kigali, u Rwanda rwegukanye imidali ine irimo uwa zahabu umwe indi yiharirwa na Misiri.

Shampiyona ya Afurika y’uyu mwaka yatangiye ku wa Gatanu tariki 31 Kanama ikaba igomba gusozwa kuri iki Cyumweru mu “Intare Conference Arena” i Rusororo.

Muri iri rushanwa ryitabiriwe n’ibihugu 25 birimo ibihangange byose muri Afurika, ku munsi wa mbere u Rwanda rwegukanye imidali ine itarimo uwa zahabu n’umwe kuko yihariwe na Misiri yatwaye 10.

Ku munsi wa kabiri kuri uyu wa Gatandatu, Abanyarwanda bongeye kwihagararaho by’umwihariko babasha no kubona umudali wa mbere wa zahabu.

Watwawe na Ndutiye Shyaka Maic mu cyiciro cy’abatarengeje ibiro 55 muri Kumite, atsinze Umunya-Misiri Aboukara Amr Alaa mu buryo butari bworoshye.

Mu kiganiro yagiranye n’itangazamakuru, Shyaka yavuze ko ibanga ryamufashije guhesha u Rwanda umudali wa mbere wa zahabu ari ishyaka yari afite no gushaka kwereka abanyamahanga ko n’Abanyarwanda bashoboye.

Ati "Ibanga nta rindi ni imyitozo myinshi twakoze nanjye nkora uko nshoboye kubera urukundo rw’igihugu no kugira ngo ntere imbere, nkora uko nshoboye mbasha kubona iyi zahabu, ndashimira Imana.”

Shyaka yavuze ko umudali wa mbere wa zahabu yegukanye kuva yatangira gukina karate usobanuye byinshi kuri ejo he hazaza ukazamufasha kwigirira icyizere no mu yandi marushanwa.

U Rwanda rwanabonye umudali wa Silver wegukanwe na kapiteni w’ikipe y’igihugu Ngarambe Vanily watsinzwe n’Umunya-Misiri, El Kotby Mohamed muri Kumite mu icyiciro cy’abari munsi y’ibiro 84.

Niyitegeka Lucky yatwaye umudali wa Bronze mu cyiciro cy’abato bari hejuru y’ibiro 59 atsinze umunya-Afurika y’Epfo Van Wyk Danielle naho Ntungane Espoir awutwara muri Kumite mu cyiciro cy’abari munsi y’ibiro 75 atsinze umunya-Algeria Achache Mouad.

Iri rushanwa rirasozwa kuri iki Cyumweru ari nabwo hahembwa muri rusange abakinnyi n’ibihugu byahize ibindi.

Ndutiye Shyaka Maic wegukanye umudali wa mbere wa zahabu ku ruhande rw'u Rwanda
Misiri ni cyo gihugu kimaze kwegukana imidali myinshi
Abanya Misiri bishimira imidali begukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza