Karate: Misiri yegukanye imidali 26, u Rwanda rusigarana umunani

Yanditswe na Manzi Rema Jules
Kuya 3 Nzeri 2018 saa 11:43
Yasuwe :
0 0

Shampiyona ya Afurika y’umukino wa karate mu bato n’abakuru yabereye mu Rwanda, yasojwe Misiri ihiga ibindi bihugu n’imidali 26 harimo 16 ya zahabu.

Iri rushanwa rikomeye kuri uyu mugabane muri karate ryatangiye kuwa Gatanu tariki 31 Kanama risozwa ku Cyumweru tariki 2 Nzeri 2018, ryitabiriwe n’ibihugu 25.

Misiri ifatwa nk’umwami wa Afurika ndetse ikaba mu bihugu 15 bikomeye ku Isi muri uyu mukino, niyo yegukanye imidali myinshi mu byiciro 27 yakinnye, bivuze ko hamwe gusa ariho itabonye umudali ifitemo umukinnyi.

Muri iyi midali harimo 16 ya zahabu, itatu ya Feza n’irindwi y’umuringa bikaba byatumye yegukana irushanwa muri rusange.

Ku mwanya wa Kabiri haje Algeria yegukanye imidali 15 muri rusange irimo irindwi ya zahabu, umwe wa Feza n’irindwi y’umuringa, naho Maroc iba iya Gatatu n’imidali irindwi irimo umwe wa zahabu, ine ya Feza n’ibiri y’umuringa.

U Rwanda rwasoje ari urwa karindwi n’imidali umunani irimo uwa zahabu umwe watwawe na Ndutiye Shyaka Maic mu cyiciro cy’abatarengeje ibiro 55 muri Kumite, Feza ebyiri n’imiringa itanu.

Umuyobozi w’Ishyirahamwe ry’umukino wa Karate mu Rwanda, Uwayo Théogène, yavuze ko irushanwa ryagenze neza cyane, by’umwihariko yishimiye uko abakinnyi b’u Rwanda bitwaye n’umusaruro babonye.

Yagize ati “Kwegukana imidali umunani irimo uwa zahabu na Feza ebyiri ni ibintu bikomeye kandi igishimishije ni uko twabigezeho mu gihe gito. Ikigaragara ni uko ibikenewe kugira ngo tugere ku musaruro tubifite”.

Yashimye abatoza b’abanyarwanda bafashije ikipe igitangira, anashimira Muhamed Hashim Muhamed, wavuye mu Misiri aje kongera ubumenyi bwabo.

Uwayo yavuze ko bazaganira na Minisiteri ya Siporo n’Umuco uburyo abakinnyi b’ikipe y’igihugu ya Karate bakomeza kwitabwaho cyane, ku buryo mu marushanwa ataha umusaruro waziyongera.

Abafana bitabiriye iri rushanwa babonye ihangana rikomeye
Karate ni umukino usaba kwihangana gukomeye kuko hari n'abavunika
Abafana bitabiriye iri rushanwa babonye ihangana rikomeye
Misiri niyo yabaye iya mbere ku mugabane nyuma yo kwegukana imidali 26
Mu bakobwa Algeria niyo yabaye iya mbere
Umutoza w'Umunya Misiri Muhamed Hashim Muhamed wari waraje gufasha abakinnyi b'u Rwanda bitabiriye iri rushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza