Karate: Ibihugu 23 bizitabira Shampiyona Nyafurika i Kigali

Yanditswe na Manzi Rema Jules
Kuya 23 Kanama 2018 saa 08:15
Yasuwe :
0 0

Ibihugu 23 birimo ibikomeye ku mugabane wa Afurika, ni byo bimaze kwemeza ko bizitabira irushanwa rya “African Seniors & Juniors Karate Championships 2018” rizabera i Kigali.

Iri rushanwa rikomeye mu mukino wa Karate, rizatangira tariki 28 Kanama risozwe ku wa 02 Nzeri 2018, mu cyumba cya Intare Conference Arena i Rusororo.

Perezida w’Ishyirahamwe ry’umukino wa Karate mu Rwanda, Théogène Uwayo, yabwiye IGIHE ko kugeza ubu ibihugu 23 birimo ibikomeye byose muri uyu mukino bimaze kwemeza ko bizaryitabira.

Yagize ati “Ni irushanwa rikomeye kandi kugeza ubu ibihugu 23 ni byo bimaze kwemeza ko bizitabira, gusa bishobora kurenga kuko mubizi ko no ku munsi wa nyuma hari ibishobora gusubiza.”

Muri ibyo bihugu harimo nk’iby’Abarabu byose uretse Libya, Afurika y’Epfo, Bostwana n’ibindi.

Ibi ngo biratanga ishusho nziza ko irushanwa rizagenda neza kandi rizabamo guhangana cyane.

Mu gutegura ikipe y’u Rwanda izakina iri rushanwa, Uwayo yavuze ko abakinnyi 30 batoranyijwe mu byiciro byose bamaze ibyumweru hafi 12 bitegura.

Yavuze ko ibijyanye n’ibikoresho abarushanwa bazakenera nka tapi zo gukiniraho, byose byamaze gutegurwa ku buryo nta kibazo gihari.

Amakipe azitwara neza muri iri rushanwa azabona amanota azayafasha mu gushaka itike yo kuzahagararira Afurika mu mikino Olempiki izabera i Tokyo mu Buyapani mu 2020.

Abakinnyi bazaserukira u Rwanda muri shampiyona ya Afurika ya Karate bamaze igihe bitoza
Muri iri rushanwa hazaba harimo ibyiciro by'abato n'abakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza