00:00:00 IGIHE NETWORK KN KINYARWANDA EN ENGLISH FR FRANCAIS

Karate: Flying Eagles yihariye imidali muri Shampiyona y’Igihugu y’Abana

Yanditswe na Byiringiro Osée Elvis
Kuya 18 September 2023 saa 11:49
Yasuwe :

Ikipe ya Flying Eagles yegukanye imidali 17 muri Shampiyona y’Igihugu y’Abana muri Karate “National Children Karate Championships” yasojwe mu mpera z’icyumweru gishize.

Iyi shampiyona y’iminsi ibiri, yakinwaga mu buryo bw’imyiyereko (Kata) ndetse no kurwana (Kumite).

Mu gice cy’imyiyereko, mu bakobwa bafite imyaka irindwi kugeza ku munani, Ikipe ya Flying Eagles yegukanye imidali itatu ya mbere yatwawe na Irinatwe Kellia, Iradukunda Chantal na Ishimwe Joy. Ni mu gihe umwanya wa kane wegukanywe na Ishimwe Teta Sheilla wa Kigali Karate Academy.

Mu cyiciro cy’abafite imyaka icyenda kugeza ku 10, Impayimpundu Kesia yegukanye umwanya wa mbere, akurikirwa na Kamanzi Alvine bose bakinira iyi kipe yo ku Gisozi.

Iyi kipe yakomeje no kwegukana imidali yo mu bindi byiciro aho Habimana Emelyne na Umumararungu Emelyne begukanye imyanya ya mbere mu batarengeje imyaka 12 naho Kaliza Makrine na Asifiwe Ange ba Imena Karate Do begukana umwanya wa gatatu.

Muri rusange, mu makipe yitwaye neza mu cyiciro cy’imyiyereko mu bakobwa, ayobowe na Flying Eagles, The Champions Sports Academy ndetse na Bright Kids Karate Academy na Imena Karate Do zombi zaje ku mwanya wa gatatu.

Muri Kumite cyangwa se kurwana, iyi kipe na bwo yihariye imidali kuko mu myanya ine ya mbere mu batarengeje imyaka 12, Flying Eagles yegukanye umwanya wa kabiri n’uwa gatatu. Mu batarengeje imyaka 15, Irakoze Aline na Ineza Jehonanie begukanye imidali ibiri ya mbere.

Mu cyiciro cy’abahungu muri Kata, Flying Eagles yabaye ikipe ya mbere, ikurikirwa na Wisdom School Karate Do, mu gihe Musambira Victory Karate na The Champions Nyanza Karate Do zombi zabaye iza gatatu.

Mu cyiciro cy’abahungu batarengeje imyaka 12 muri Kumite, Irampaye Fred wa Les Petits Samourai yegukanye umudali wa zahabu, akurikirwa na Cyusa Renatus wa Kamikazi. Nsengimana Djami wa Hero Karate na Kanze Elouhit wa The Champions Sports begukanye umudali w’Umuringa.

Mu cyiciro cy’abatarengeje imyaka 15, Rubayiza Chris ukinira The Champions Sports yahize abandi, Gatari Denis Alex wa Hero Karate Club Rafiki yegukana umwanya wa kabiri. Sheja Hirwa Ausny ukinira Honbu Dojo na Izere Mugisha Rich Bryan wa The Champions Nyanza begukanye umwanya wa gatatu.

Nyuma y’irushanwa, Umutoza wa Flying Eagles, Habakwizera Antoine Marie Claret, yavuze ko amarushanwa basanzwe bategura imbere mu ikipe ari yo yabafashije kwegukana imidali myinshi muri Shampiyona y’Igihugu.

Yagize ati “Ni ibintu twishimiye cyane kuko intego zacu twazigezeho ku kigero cya 80%. Amarushanwa dusanzwe dutegura imbere mu ikipe ntekereza ko ariyo yadufashije kwitwara neza muri iri rushanwa.”

Yakomeje avuga ko no mu busanzwe abakobwa bo mu ikipe ye basanzwe barusha basaza babo, bityo batatunguwe no kubona biharira imidali.

Ati “Abakobwa bacu bari mu bihe byiza kandi si aba gusa kuko hari n’undi uherutse kwegukana umudali w’umwanya wa gatatu muri Maroc. No mu ikipe, abakobwa baba barusha abahungu.”

Iyi Shampiyona yakinwaga ku nshuro ya kabiri, muri uyu mwaka yitabiriwe n’abakinnyi 260 barimo abahungu 173 n’abakobwa 87 baturutse mu makipe 32.

Shampiyona y'Igihugu y'Abana yakinwaga ku nshuro ya kabiri
Perezida wa FERWAKA, Niyongabo Damien, yambika imidali abana baje mu myanya y'imbere muri Shampiyona y'Igihugu
Irakoze Aline ukinira Flying Eagles yambikwa umudali w'umwanya wa mbere yegukanye mu batarengeje imyaka 15
Habimana Emelyne yambikwa umudali w'umwanya wa mbere yegukanye mu myiyereko "Kata" mu batarengeje imyaka 12
Irakoze Aline na Ineza Jehovanie bari baherekejwe n'ababyeyi babo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .