00:00:00 IGIHE NETWORK KN KINYARWANDA EN ENGLISH FR FRANCAIS

JKA-Rwanda yegukanye imidali ibiri mu marushanwa ya Karate i Las Vegas (Amafoto)

Yanditswe na Eric Tony Ukurikiyimfura
Kuya 1 April 2024 saa 08:06
Yasuwe :

Abahagarariye Japan Karate Association Rwanda (JKA-Rwanda) mu marushanwa ya "North American Open/ International Karate Tournament" yabereye i Las Vegas muri Leta Zunze Ubumwe za Amerika, begukanye imidali ibiri y’Umuringa irimo uwo mu gice cya Kata (kwiyerekana) na Kumite (kurwana).

Aya marushanwa yabaye iminsi ibiri, tariki ya 30 n’iya 31 Werurwe 2024, mu byiciro birimo iby’abana n’iby’abakuru, iby’ababigize umwuga n’iby’abakanyujijeho muri Karate.

Yari yitabiriwe n’amakipe asaga 120, agizwe n’abakinnyi baturutse mu bihugu 20 birimo Leta Zunze Ubumwe za Amerika, Canada, Mexique, u Bwongereza, Mali, Écosse, Romania n’u Rwanda.

JKA-Rwanda yari ihagarariwe n’abakinnyi bane ndetse n’Umutoza Ganziteka Didier Pascal wanarushanyijwe, yayegukanyemo imidali ibiri y’Umuringa; umwe muri Kata n’undi muri Kumite.

Umudali wa mbere wegukanywe na Kabango Jean Pierre wabaye uwa gatatu muri Kata Shotokan ku wa Gatandatu, tariki ya 30 Werurwe. Abandi barushanyijwe ni Niyongabo Fils David (wabaye uwa 11), Ndayishimiye Christian (13) na Ganziteka Didier Pascal (12).

Ku Cyumweru, tariki ya 31 Werurwe, JKA-Rwanda yabonye undi mudali muri Kumite, wegukanywe na Murenzi David nyuma yo kuba uwa gatatu. Ni mu gihe Niyongabo Fils David yabaye uwa gatanu muri icyo cyiciro.

Umuyobozi wa JKA-Rwanda, Rurangayire Guy, yavuze ko bishimiye kwitabira aya marushanwa, ashimangira ko intego ari ugushaka uburyo byaba inshuro nyinshi kuko bizamura urwego rw’abatoza n’abakinnyi.

Ati “Twishimiye kwitabira amarashanwa yarimo abantu 700 mu by’iciro bitandukanye. Turifuza gukomeza gushaka abafatanyabikorwa benshi kugira ngo dukomeze kwitegura amarushanwa menshi uko ubushobozi buzajya buboneka. Bizafasha kuzamura urwego rw’abatoza bacu, abakinnyi muri gahunda zacu ku buryo tuzazana n’umudali wa Zahabu vuba cyane.”

JKA-Rwanda yari yajyanye itsinda ry’abantu barindwi barimo n’Umuyobozi Mukuru wa KTN Rwanda, Hagenimana Philémon, aho iki kigo ari umufatanyabikorwa wayo kuva mu myaka ibiri ishize.

Aya marushanwa yari yateguwe na Amateur Athletic Union (AAU) ku bufatanye n’Ishyirahamwe Mpuzamahanga rya Karate (WUKF), yabanjirijwe n’amahugurwa yo ku wa 29 Werurwe 2024 aho muri Kata yayobowe na Sensei Mirza J B naho muri Kumite ayoborwa na Sensei Christophe Pinna.

Kabango Jean Pierre ashimirwa n'Umutoza Ganziteka Didier Pascal nyuma yo kwegukana umudali ku wa Gatandatu
JKA-Rwanda yabonye umudali wa Bronze muri Kata yakinwe ku wa 30 Werurwe
Niyongabo, Kabango, Ganziteka na Ndayishimiye bakinnye Kata ku munsi wa mbere w'amarushanwa
Sensei Christophe Pinna hamwe n'Umutoza Ganziteka Didier Pascal
Christophe Pinna umaze kugera mu Rwanda inshuro ebyiri ari hamwe na Rurangayire Guy uyobora JKA-Rwanda (ibumoso) na Kabango Jean Pierre (iburyo)
Aya marushanwa yari yitabiriwe n'abaturutse mu bihugu 20
Kabango Jean Pierre yifotozanya umudali yegukanye
Murenzi David yegukanye umudali wa Bronze muri Kumite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .