Ku wa Gatanu, tariki ta 22 Gicurasi 2023, ni bwo FERWAFAKA yatangaje Kamuzinzi nk’Umutoza mushya, aho yasimbuye Nkuranyabahizi Noël wamaze kuri uyu mwanya imyaka umunani.

Mu Ukuboza, Nkuranyabahizi yasabye kuva kuri izi nshingano kugira ngo aharire abakiri bato, na bo batange inararibonye mu gutoza Ikipe y’Igihugu.

Aganira na IGIHE, Perezida wa FERWAKA, Niyongabo Damien, yavuze ko bahisemo Kamuzinzi nyuma yo gusanga hari icyo yafasha Ikipe y’Igihugu bijyanye n’ibyo asanzwe akora.

Ati "Ni ubusesenguzi busanzwe bwo kureba uwafasha Ikipe y’Igihugu, ibyo asanzwe akora n’ubushobozi afite. Ni umwanya twari tumaze iminsi nta muntu uwurimo."

Yakomeje agira ati "Ni umutoza ubimazemo igihe, afite ikipe atozamo ya The Warriors ndetse abakinnyi benshi bajya mu Ikipe y’Igihugu arabatoza."

Uretse gushyiraho Umutoza, FERWAKA yemeje kandi Ndayambaje Onesphore nk’Umuyobozi wa Komisiyo y’Abasifuzi, asimbuye Sensei Mwizerwa Dieudonné wari uherutse gusezera.

Kamuzinzi Christian yagizwe Umutoza mushya w'Ikipe y'Igihugu ya Karate

Kamuzinzi asanzwe atoza Ikipe ya The Warriors

Nkuranyabahizi Noël watoje Ikipe y'Igihugu imyaka umunani, yasezeye kuri uyu mwanya mu Ukuboza

Ndayambaje Onesphore (ubanza ibumoso) yagizwe Umuyobozi wa Komisiyo y'Abasifuzi muri FERWAKA