00:00:00 IGIHE NETWORK KN KINYARWANDA EN ENGLISH FR FRANCAIS

Christophe Pinna watwaye Shampiyona y’Isi yatangiye guhugura abakina Karate mu Rwanda (Amafoto)

Yanditswe na Eric Tony Ukurikiyimfura
Kuya 2 September 2023 saa 09:10
Yasuwe :

Umufaransa Christophe Pinna ufite izina rikomeye muri Karate aho yegukanye Shampiyona y’Isi mu 2000, ari guhugura abakina uyu mukino mu Rwanda mu mahugurwa y’iminsi itatu yateguwe na Japan Karate Association Rwanda (JKA-Rwanda) ari kubera muri Lycée de Kigali guhera ku wa Gatanu, tariki ya 1 Nzeri 2023.

Ni ku nshuro ya kabiri Christophe Pinna ahugura abakina Karate mu Rwanda kuko yahaherukaga muri Mata 2022. Kuri iyi nshuro, amahugurwa ari gutanga yibanda kuri tekiniki zo kurwana muri Karate “Kumite”.

Perezida wa JKA Rwanda, Rurangayire Guy, yavuze ko impamvu bateguye aya mahugurwa ari ukugira ngo bafashe abakina Karate mu Rwanda barimo abakiri bato kuzamura urwego, na bo bazagire aho bagera muri uyu mukino.

Ati “Ni igikorwa cyo kwiga tekinike zo kurwana, cyane cyane zikoreshwa mu marushanwa ya Karate. Ni inshuti yacu, agarutse ku nshuro ya kabiri gutanga ubumenyi bwe ku bakinnyi bacu bakiri bato kugira ngo turebe ko hari icyo bazageraho mu gihe kiri imbere. Amahugurwa yacu arafunguye, ni igikorwa cyateguwe na JKA Rwanda dufatanyije n’abafatanyabikorwa bacu, twafunguriye buri muntu akishyura ibihumbi 25 Frw yo kwiyandikisha, akitabira iminsi itatu.”

Ku kijyanye n’ibyitezwe muri aya mahugurwa ku ruhande rwa JKA Rwanda yayateguye, Rurangayire yavuze ko nyuma y’uko Christophe Pinna ageze mu Rwanda mu 2022, imikinire y’abakinnyi b’Abanyarwanda yazamutse ku buryo umusaruro wahise utangira kwigaragaza.

Ati “Ubushize dutangira gukorana [na Christophe Pinna] byahinduye imikinire y’abakinnyi bacu, abana babashije gukurikira amahugurwa ye bagiye mu marushanwa ya ‘Zone’, imidali yose yari ihari barayitwaye, ubu bavuye muri Shampiyona Nyafurika, baragerageje bitwara neza [u Rwanda ruba urwa gatanu], hari umukobwa wabonye umudali wa Bronze, ni icyizere. Iyo abana batoya batangiye kubona uwatwaye Shampiyona y’Isi uyu munsi, ni amahirwe akomeye. Turifuza kuzana n’abandi batwaye Shampiyona y’Isi ku buryo abana babona aho barebera.”

Abajijwe niba bidahenze kuzana umuntu uri ku rwego nk’urwa Christiphe Pinna i Kigali, Rurangayire yavuze ko “yaje kubera ubucuti” ariko hari abo bakinanye Karate muri Lycée de Kigali baba baramaze kugira aho bagera mu buryo bw’ubushobozi bagashaka uko bakomeza kuzamura uyu mukino.

Yongeyeho ati “Twamwitozaga hano turi muri iyi ‘Gymnase’, ni nko kumva ibintu by’ibitangaza. Nta kintu na kimwe adusaba, ni inshuti yacu, ariko turi kwiga uburyo tuzakomeza gukorana no guteza imbere uruganda rw’imikino muri rusange.”

Umutoza w’Ikipe y’Igihugu ya Karate, Nkuranyabahizi Noël, ni umwe mu bitabiriye aya mahugurwa. Yavuze ko ari amahirwe adasanzwe yongeye kugirwa n’abakina uyu mukino mu Rwanda, ashimira JKA Rwanda yagize igitekerezo cyo kongera gutumira Christophe Pinna.

Ati “Ni iby’agaciro kuba dufite umutoza nka Christophe Pinna, mu gihe cyacu twebwe tugikina, twamurebaga kuri za ‘videos’, tukamwigiraho ariko ku bw’ubufatanye bwa JKA Rwanda n’izindi nzego, ageze hano ku nshuro ya kabiri. Ni amahirwe akomeye kubona uwatwaye Shampiyona y’Isi cyangwa iy’u Burayi aza kutwigisha, ni ibintu bikomeye cyane.”

Ku bijyanye n’ibyo biteze, Nkuranyabahizi na we yashimangiye ko hari byinshi bazungukira kuri uyu Mufaransa wamamaye muri Karate ku buryo bazabisangiza abandi bataba kwitabira aya mahugurwa yitezwemo abagera ku 150.

Ati “Ikintu tugiye kwigiramo ni tekinike n’amayeri, n’uburyo bw’imigishirize. Nk’uko mwabibonye, mu bitabiriye harimo abatoza n’abakinnyi. Nk’abatoza, twe ni ukwiga, tukareba uburyo abandi bigisha, murabizi ko igihugu akomokamo kiri muri bitanu bya mbere ku Isi muri Karate. Byakongeraho ko yatwaye Shampiyona y’Isi, buriya baba bafite utuntu nakwita tw’amabanga, ni byo rero navuga ko nk’abatoza tugomba kwiga, tukazabyigisha n’abandi.”

Ku munsi wa mbere w’amahugurwa, ku mugoroba wo ku wa Gatanu, abakiri bato bakoranye n’abakuru.

Kuri uyu wa Gatandatu, tariki ya 2 Nzeri, abana barahugurwa hagati ya saa Tatu na saa Yine n’iminota 15 naho abakuru bakore hagati ya saa Yine n’Igice na saa Sita z’amanywa. Guhera saa Cyenda kugeza saa Moya z’umugoroba ni bwo haba amarushanwa yitabirwa n’abari hejuru y’imyaka 18.

Ku Cyumweru, tariki ya 3 Nzeri, naho hazaba amahugurwa y’abana n’abakuru nk’uko bizaba byagenze ku wa Gatandatu, guhera saa Kumi n’imwe kugeza saa Kumi n’ebyiri n’Igice habe imikino ya nyuma ya Kumite ku bari hejuru y’imyaka 18 gusa.

Uzegukana irushanwa ryateguwe muri aya mahugurwa, azahabwa ibihumbi 300 Frw, uwa kabiri abone ibihumbi 200 Frw mu gihe uwa gatatu azahabwa igihembo cy’ibihumbi 100 Frw.

Incamake kuri Christophe Pinna

Christophe Pinna uri gutanga aya mahugurwa, yatwaye Shampiyona y’u Burayi inshuro eshatu (1993, 1995 no mu 1997).

Ku rwego rw’Isi, yatwaye iyi shampiyona inshuro imwe mu 2000, atwara shampiyona eshatu z’u Burayi bakina nk’ikipe (1993, 1995 no mu 1997).

Pinna w’imyaka 55, yongeye kwandika izina atwara irushanwa rya ‘Goblet of the World’ inshuro ebyiri (1993, 1997) anatwara umudali mu mikino ya Méditerranéens mu 1992. Yanatwaye Shampiyona ya Mundo Equipos inshuro eshatu (1994, 1996 no mu 1998).

Ukinjira ahari kubera amahugurwa, hari imyambaro y'abakina Karate
Imikandara na 'gants' byambarwa n'abakina Karate
Rurangayire Guy uyobora JKA Rwanda, aha ikaze abitabiriye aya mahugurwa
Perezida w'Ishyirahamwe rya Karate mu Rwanda, Niyongabo Damien, yashimiye JKA Rwanda yateguye aya mahugurwa
Christophe Pinna yatangiye gutanga amahirwe ari kubera muri LDK
Umuyobozi wa JKA Rwanda, Rurangayire Guy, yavuze ko kuva aho Pinna atangiye guhugura mu 2022, abakinnyi b'Abanyarwanda bazamuye urwego
Umutoza w'Ikipe y'Igihugu ya Karate, Nkuranyabahizi Noël, yavuze ko ari amahirwe kongera kubona Christophe Pinna
Pinna watwaye Shampiyona y'Isi mu 2000, ari guhugura Abanyarwanda kuri tekinike zo kurwana muri Karate

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .