00:00:00 IGIHE NETWORK KN KINYARWANDA EN ENGLISH FR FRANCAIS

Abatoza ba Karate mu Rwanda batyarijwe ubumenyi kuri tekinike zo kurwana (Amafoto)

Yanditswe na IGIHE
Kuya 19 February 2024 saa 06:50
Yasuwe :

Abatoza 55 baturutse mu makipe yose yo mu Rwanda batyarijwe ubumenyi kuri tekinike zo kurwana (Kumite) mu mahugurwa yabaye ku wa Gatandatu, tariki ya 17 Gashyantare, yari yateguwe n’Ishyirahamwe ry’Umukino wa Karate mu Rwanda, ayoborwa Nkuranyabahizi Noël wahoze ari Umutoza w’Ikipe y’Igihugu akaba ari n’umutoza mpuzamahanga wabyize mu ishuri rya Sports Academy Lausanne mu Busuwisi rifite ubunararibonye mu guhugura abatoza bo muri siporo zinyuranye bavuye mu makipe y’ibihugu byo ku Isi yose.

Aya mahugurwa yabereye mu cyahoze ari Hotel Sportsview i Remera, yari agamije guhugura abatoza mu cyiciro cya Kumite cyangwa kurwana, ndetse no kubasobanurira gahunda nshya ya Federasiyo ya Karate yo kongera umubare w’abatoza b’abanyamwuga binyuze muri gahunda ya “National Karate Coaching Certification” aho abo batoza bazajya bahugurwa bihoraho kandi bakazamurwa mu ntera hagendewe ku buryo bazakurikirana ayo masomo.

Perezida w’Ishyirahamwe ry’Umukino wa Karate mu Rwanda, Niyongabo Damien, yashimiye abatoza bitabiriye aya mahugurwa anabasobanurira ko abazajya bigisha mu makipe anyuranye ari abazakurikirana iyo gahunda ya “certification” mu rwego rwo gukomeza kongera ireme ku bakina uyu mukino uri mu ikunzwe n’abakiri bato mu Rwanda.

Yakomeje agira ati “By’umwihariko, abo batoza bazafasha Federasiyo kuvumbura impano nshya muri uyu mukino no gutegura abakinnyi bazajya batoranywamo abakinira Ikipe y’Igihugu ya Karate.”

Nkuranyabahizi Noël wayoboye aya mahugurwa, yavuze ko urwego abatoza bariho rushimishije cyane, bikaba bitanga icyizere ku hazaza ha Karate kuko abatoza ari yo nkingi ya mwamba muri siporo.

Yashoje asaba abatoza guhesha agaciro akazi kabo ko gutoza mu buryo bwa kinyamwuga, abakangurira kujya bajyanisha ubumenyi batanga n’indangagaciro nziza.

Ikipe y’igihugu y’u Rwanda ya Karate ihagaze neza muri iki kiciro cyo kurwana (Kumite) dore ko iherutse kwegukana umwanya wa gatanu muri Afurika ubwo yarii yitabiriye “African Karate Championship” yabereye i Casablanca muri Maroc muri Kanama 2023.

Abatoza ba Karate mu Rwanda batyarizwa ubumenyi muri tekinike zo kurwana, ibizwi nka Kumite muri uyu mukino
Abagikina bifuza gutanga umusanzu mu butoza na bo bitabiriye aya mahugurwa yabereye i Remera
Shihan Sinzi Tharcisse aganira na Nkuranyabahizi Noël wayoboye amahugurwa
Perezida w’Ishyirahamwe ry’Umukino wa Karate mu Rwanda, Niyongabo Damien (ibumoso), yakurikiye aya mahugurwa
Umutoza Nkuranyabahizi Noël ahugura abandi batoza 55 mu rwego rwo kugira ngo barusheho kuzamura abakinnyi bafite ubumenyi kuri Karate
Abatoza bitabiriye aya mahugurwa bahawe 'certificats'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .