00:00:00 IGIHE NETWORK KN KINYARWANDA EN ENGLISH FR FRANCAIS

Abatoza 10 bahuguriwe kwigisha abana Karate mu bigo birenga 50 mu Rwanda

Yanditswe na Iradukunda Olivier
Kuya 18 October 2023 saa 09:34
Yasuwe :

Abatoza b’Umukino wa Karate mu Rwanda batangiye guhabwa amahugurwa azabafasha gukarishya ubumenyi basanganwe bakabujyana mu bigo by’amashuri yisumbuye 56 byo mu ntara zitandukanye zo mu Rwanda.

Kuri uyu wa Kabiri, tariki ya 17 Ukwakira 2023, ni bwo Umuryango The Cornerstone wafatanyije n’abatoza bahiga abandi mu Rwanda basangira ku bumenyi buri wese afite kugira ngo bujyanwe mu bigo by’amashuri yisumbuye.

The Cornerstone ni Umuryango usanzwe ukora ibikorwa byo kuganiriza urubyiruko ku buryo rwakwiteza imbere mu mibereho ya buri munsi no kwishakamo ibisubizo ku bibazo ruhura na byo.

Kuri iyi nshuro wabinyujije muri siporo kugira ngo habeho kwegera abakiri bato cyane cyane abo mu mashuri yisumbuye kuko ari bo baba bari kwitegura kujya guhangana n’ubuzima hanze.

Aba batoza uko ari 10 bafite Dan zo hejuru mu mukino, bazongera ubumenyi bawufitemo, buri wese ajye guhugura aba muri munsi ye kugira ngo haboneke umubare uhagije w’abazagira uruhare mu mahugurwa.

Abatoza bazahererwaho ni abo mu mashuri yo mu ntara zose z’u Rwanda asanzwe afitanye imikoranire n’uyu muryango. Ahari amakipe akina Karate ahugurwe mu gihe aho atari azajya ahita ashingwa.

Uwashinze The Cornerstone, Umulisa Olive, yavuze ko mbere yo gutangiza iki gikorwa habanje gukorwa isuzuma ngo harebwe niba abana bazemera gufata amasomo, umubare uba mwinshi kurenza uko ubuyobozi bwabitekereje.

Ati “Mbere twari tuzi ko abana batazabikunda ariko hari ikigo kimwe twagiye kubigeragezaho mu Ntara y’Amajyepfo haza abana 200 mu gihe twari twateganyije ko batarenga 60. Izi ni ingaruka nziza zigaragaza ko ejo h’ibi bikorwa ari heza.”

Umulisa yongeyeho ko iyo urubyiruko ruje rukurikiye siporo ari ho hahererwaho rwigishwa uko rwakwibeshaho ndetse rukagirira umumaro abandi.

Ati “Tubazana twifashishije imikino ariko iyo baje tubaha amasomo. Urugero Karate twahereyeho ni umukino usaba ikinyabupfura mbere y’ibindi byose. Si ibyo gusa tubaha kuko tubigisha uko umuntu ukwiye agomba kwitwara, tubereka ibyiza byo kubungabunga ibidukikije ndetse n’uko babyaza umusaruro ibyo biga.”

Umutoza washinze ishuri rya Karate rya Kigali Elite Sports Academy, Uwase Delphine Ortha, yavuze ko ubufatanye bw’abatoza na The Cornerstone aburebera mu ndorerwamo yo kongera abana b’abakobwa bakora siporo.

Ati “Ibi mbibona mu buryo bwo gushishikariza igitsina gore kwitabira siporo kuko ijanisha ryabo riracyari hasi cyane. Tuzagera mu mashuri atandukanye kandi abo tuzahura ni bo batoza b’ejo hazaza. Iyo siporo bazakora ishobora no kuzabatunga kandi natwe twabikoze tugira icyo tuyikuramo.”

Ku nshuro ya mbere, uyu muryango uzegera abana bo mu Karere ka Muhanga mu Ntara y’Majyepfo hakurikireho aka Bugesera k’i Burasirazuba mbere yo kujya mu zindi ntara.

Aho The Cornestone izagenda ihugura abana, izajya isiga abakapiteni mu mikino yahafunguwe ari abakobwa kugira ngo na bo bibazamure.

Uwase Delphine umenyerewe muri Sinema Nyarwanda ahanganye na Umulisa Olive washinze The Cornerstone
Buri kigo kizakijya kigira umukobwa uhagarariye abandi mu mukino kugira ngo bitere imbaraga abandi
Buri mutoza azajya akomeza gukurikirana ibigo birimo abana bahawe amahugurwa
Uwase Delphine abona ko ubufatanye bw'abatoza ba Karate na The Cornerstone buzatanga umuti ku bakobwa bakiri bake muri siporo
Abatoza beza mu Rwanda ni bo bari kwitabira amahugurwa agamije kurenga gukina akagera no mu mibereho ya buri munsi
Abatoza bafite intego zo kuba mu myaka itanu hazaba habonetse abandi nka bo
Buri mutoza wese witabiriye amahugurwa asanzwe afite abandi bana yigisha
Abatoza bahuguwe bazajyana ubumenyi ku bana bari mu bigo by'amashuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .