Abana bigira Karate muri Petit Samurai batangiye ibizamini bibazamura mu ntera (Amafoto)

Yanditswe na Eric Tony Ukurikiyimfura
Kuya 22 Ukuboza 2019 saa 01:49
Yasuwe :
0 0

Abana bigira, bakanakinira mu ikipe ya Karate izwi ku izina rya Petit Samurai Karate do club, batangiye gukora ibizamini bigamije kubazamura mu ntera.

Aya marushanwa y’ibizamini ari kubera mu Kigo cy’imikino cya Cercle Sportifs de Kigali mu Rugunga guhera kuri uyu wa Gatandatu, aho yitabiriwe n’abana bagera kuri 70.

Iki gikorwa kiba buri mwaka mu rwego rwo kuzamura mu ntera abana baba bamaze umwaka bigishwa umukino wa Karate ndetse no kubifuriza Noheli Nziza hamwe n’ababyeyi babo nk’uko IGIHE yabitangarijwe na Rurangayire Guy ubatoza.

Ati ’’Buri kwezi kwa 12 iyo dusoza umwaka, tugira umunsi mukuru tukanakora ibizamini byo kubazamura mu ntera, hanyuma tukishimira hamwe n’ababyeyi, tugakora ikintu kimeze nko kwifuriza abana abacu Noheli Nziza n’umwaka mwiza tuba tugiye gutangira.’’

Samurai igira ikipe y’abana yitwa ‘’Petit Samurai’’ ndetse n’ikipe y’abakuru ari yo yitwa Samurai.

Rurangayire Guy usanzwe ari n’Umuyobozi w’agateganyo ushinzwe Siporo muri Minisiteri ya Siporo, yavuze ko iri shuri ryatangiye mu 2012 ndetse kuri ubu bishimira ibyo bamaze kugeraho mu gihe basatira mu myaka 10.

Ati "Iyi kipe yacu y’abana yatangiye mu Ukuboza 2012, ubu iri gusatira imyaka 10. Aba ari umukoro wo kwishimira umusaruro w’ibyo tuba tumaze kugeraho mu mwaka. Dukora amasaha umunani mu cyumweru kuko twitoza ku wa Gatatu, ku wa Gatandatu no ku Cyumweru. Tuba tugira ngo turebe aho abana bageze.’’

Petit Samurai karate do club ni ikipe y’abana bari hagati y’imyaka itanu kugeza ku myaka 14. Kuva itangiye mu 2012, hari abana babiri bamaze kubona imikandara y’umukara ndetse n’abafite marron.

Biteganyijwe ko guhera mu mwaka utaha, aba bana bazatangira gukora amarushanwa atandukanye bagahura n’abo mu yandi makipe, aho bazanashakirwa ibyangombwa by’ubwirinzi mu gihe bari gukina.

Abana bakinira Karate mri Petit Samurai batangiye gukora ibizamini byo kubazamura mu ntera
Rurangayire Guy ubatoza, abafasha kumenya guhagarara neza bakumva bakomeye
Petit Samurai ibarizwamo abana bari hagati y'imyaka itanu na 14
Iyi kipe ibarizwaho abahungu n'abakobwa
Abana barakomeza ibizamini no kuri iki Cyumweru
Ababyeyi baherekeje abana bafata amashusho y'imyiyereko bakoraga

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .