Mu rukerera rwo ku cyumweru ikipe y’Igihugu y’umukino w’amagare”Team Rwanda” yahagurutse mu Rwanda yerekeza muri Burkina Faso, aho igiye kwitabira shampiyona y’Afurika.

Shampiyona y’Afurika ”African continental championships 2012” mu mukino w’amagare izatangira ku wa Kabiri tariki 6 Ugushyingo 2012, i Ouagadougou muri Burkina Faso.

Nk’uko tubikesha urubuga rw’ishyirahamwe ry’umukino w’amagare mu Rwanda (FERWACY), Team Rwanda yahagurutse i Kanombe saa munani na mirongo ine n’itanu (2H45’) z’ijoro mu rucyerera rwo kuri iki Cyumweru n’indege ya Ethiopian Airlines, biteganyijwe ko inyura i Addis Ababa bakahava berekeza muri Burkina Faso.

Team Rwanda yahagurukanye mu Rwanda abakinnyi batanu, barimo Adrien Niyonshuti, Ruhumuriza Abraham, Hadi Janvier na Biziyaremye Joseph ni bo bagiye bagize Team Rwanda y’abakuru, na ho Ndayisenga Valens we akazahagararira u Rwanda mu mikino y’abakiri bato.