Shampiyona ya Kung-Fu irasozwa kuri iki Cyumweru

Yanditswe na Yvonne Mpinganzima
Kuya 6 Ugushyingo 2015 saa 09:16
Yasuwe :
0 0

Shampiyona y’umukino wa Kung-Fu mu Rwanda izasorezwa kuri Petit stade i Remera kuri iki Cyumweru itariki 8 Ugushyingo 2015, hazakinwa imikino izahuza amakipe 15 yitwaye neza mu gihugu hose.

Imikino ya Kung Fu yari imaze iminsi ikinwa mu gihugu hose izasozwa ku Cyumweru, amakipe atanu avuye mu Ntara ndetse n’andi icumi yo mu Mujyi wa Kigali ahatanira ibihembo bitandukanye.

Perezida w’ishyirahamwe ry’uyu mukino mu Rwanda, Mucyo Jackson yavuze ko imyiteguro yose yarangiye bakaba bategereje umunsi nyawo ko ugera bakereka Abanyarwanda uburyo uyu mukino ugeze ku rwego rwo hejuru.

Yagize ati: “Tumaze iminsi dutegura umunsi wa nyuma wa shampiyona kandi byose byagenze neza. Aya marushanwa azaba ari ku rwego rwo hejuru ugereranyije n’ayo twari dusanzwe dukora.”

Yakomeje avuga ko tumwe mu dushya tuzagaragara kuri uyu munsi ari abakinnyi b’Abashinwa bazereka ubuhanga butandukanye abazaba bitabiriye iyi mikino.

Ati: ”Ntibisanzwe ko Abanyarwanda babona amaso ku maso Abashinwa barimo gukina uyu mukino. Abazaza bazaryoherwa cyane kuko ni cyo gihe cyo kubereka urwego rwiza n’Abanyarwanda bagezeho.”

Yavuze ko ibihembo bishobora kuzagera nko kuri miliyoni ebyiri, ariko ngo zishobora no kurenga kuko bashaka ko utsinze yashimirwa bihagije.

Kuri uyu munsi hazanatangizwa bwa mbere mu Rwanda ubundi bwoko bw’imikino nk’iyi bwitwa ‘Taichi’ busanzwe bukoreshwa mu bindi bihugu, bakaba babuzanye no mu Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza