00:00:00 IGIHE NETWORK KN KINYARWANDA EN ENGLISH FR FRANCAIS

Mu Rwanda hagiye kubera irushanwa rishya ry’abakinnyi bakanyujijeho n’abatarabigize umwuga

Yanditswe na Mihigo Saddam
Kuya 5 June 2022 saa 09:01
Yasuwe :

Amashyirahamwe y’imikino itandukanye mu Rwanda yemeranyije ko hategurwa irushanwa rizahuza abakinnyi bakanyujijeho n’abagikina, badafite ibyangombwa by’amakipe yabigize umwuga.

Ni imikino izakinwa kuva tariki 11 Kamena 2022 kugeza ku wa 3 Nyakanga 2022, ku bibuga n’imihanda itandukanye mu Mujyi wa Kigali.

Aya marushanwa yiswe "Rwanda Re-Birth Celebration" azakinwa muri gahunda yo kwizihiza Umunsi wo Kwibohora. Biteganyijwe ko imikino yayo izasozwa haba igitaramo kizitabirwa n’abahanzi bakomeye mu Rwanda.

Rwigema Gédeon wazanye igitekerezo akaba ari na we Muyobozi Mukuru wa "Rwanda Re-Birth Celebration", yavuze ko buri mukino bagiye bashaka uwawukinnye, bakamushinga kumenya ibyawo.

Yagize ati "Muri rusange amashyirahamwe y’imikino izaba iri mu irushanwa yose yemeye ko igikorwa cyaba kandi ko hazabaho gufatanya. Nta mukinnyi usanzwe akina nk’uwabigize umwuga uzemererwa kwiyandikisha."

Akomeza avuga ko mu isozwa ry’irushanwa, ibihembo bizatangirwa mu gitaramo cy’imbaturamugabo.

Ati "Ku munsi wo gusoza, abatsindiye ibikombe n’imidali bazahemberwa mu gitaramo kizaba kirimo abahanzi bakomeye. Abakinnyi bose bitabiriye irushanwa bazinjirira ubuntu."

Aya marushanwa agiye kuba ku nshuro ya mbere azitabirwa n’amakipe arenga 60 nko mu mupira w’amaguru.

Mu mikino itanu izakinwa muri aya marushanwa, hazemerwa abahoze ari abakinnyi, abagikina badafite amakipe n’abakiri bato.

Rwigema usanzwe ari Umuyobozi wa East Gold avuga ko muri siporo hari ibikorwa byinshi abantu bakora bategura amarushanwa bigakura abantu mu bwigunge.

Mu mikino izatangiza iri rushanwa harimo umupira w’amaguru, Volleyball, amagare, Koga [Swimming] no gusiganwa ku ntambwe [marche].

Mu mikino ikinwa mu buryo bw’amakipe, hazahembwa atatu ya mbere kimwe n’uko mu bakina umuntu ku giti cye hazahembwa batatu ba mbere.

Kugeza ubu Kwizera Pierre Marshall utoza REG Volleyball Club wanabaye umukinnyi ukomeye w’Ikipe y’Igihugu y’u Rwanda kugeza mu 2017, ni we ushinzwe umukino wa Volleyball muri iri rushanwa.

Kayiranga Salima ni we ushinzwe Amagare; Ahimana Straton usanzwe uhagarariye abasifuzi mu Ishyirahamwe Nyarwanda rya Basketball [FERWABA] ashinzwe Basketball; Karenzi Patient ashinzwe Gusiganwa ku Ntambwe; Umuhuzabikorwa w’Umukino wo Koga ni Ndori Jimmy, umaze imyaka 20 yoga ndetse akaba ari Umutoza w’Ikipe y’Igihugu y’Umukino wo Koga kuva mu 2012 mu gihe Nshimiyimana Emmanuel uzwi nka Matic ari we ushinzwe Umupira w’Amaguru.

Mu Rwanda hagiye kubera irushanwa rishya ry’abakinnyi bakanyujijeho n’abatarabigize umwuga
Mu cyiciro cy'umupira w'amaguru hitezwe amakipe 60 azahatanira igikombe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .