00:00:00 IGIHE NETWORK KN KINYARWANDA EN ENGLISH FR FRANCAIS

Imiterere ya ‘catch’, umukino ufatwa nk’urangwamo ubugome

Yanditswe na Blaise Mukwende Nziza
Kuya 5 April 2022 saa 05:56
Yasuwe :

Gukirana bizwi nka ‘Wrestling’ ni umwe mu mikino njyarugamba nka Karate, Kung-Fu, Taekwondo, Boxing n’indi itandukanye ikinwa n’ikiremwamuntu.

Gukirana cyari n’igikorwa cyifashishwaga kugira ngo impaka zabaga ziri hagati y’abahanganye zishyirwe ku iherezo nk’uko byagendekeye Yakobo ubwo yahindurirwaga izina akitwa Israel nyuma yo gukirana n’umumalayika.

Amateka avuga ko gukirana byatangiye gufatwa nk’umukino mu myaka ibihumbi 15 ishize ubwo abaturage b’i Babuloni n’abo mu bwami bwa Misiri bawukinaga.

Mu 1185 nyuma y’Urupfu rwa Yesu Kristo hatangijwe umukino wa ‘Sumo’ mu Buyapani. Uwo mukino ukinwa hashushanywa uruziga ruhanganiramo abantu babiri hategerejwe kureba uza kurusohoramo umwe mbere y’undi kugira ngo afatwe nk’uwatsinze.

Uko imyaka yagiye ishira indi igataha hagiye haduka uburyo butandukanye bwo gukirana burimo ubwatangijwe ku bufatanye bw’Abagereki n’Abaromani buzwi nka Greco-Roman Wrestling bwaje kugaragara mu mikino Olempike ya mbere yo mu 1896.

Uburyo Greco-Roman Wrestling ikinwamo ni uko umukinnyi uhanganye n’undi asabwa kumuterura akaba yamutanga gushyira hasi igice runaka cy’umubiri kugira ngo afatwe nk’uwegukanye intsinzi.

Inkomoko n’imikinire ya ‘catch’

Gukirana byatangiye gutakaza igisobanuro cyabyo ubwo mu 1953 umuryango w’abaherwe b’aba-‘Mc Mahons’ wo muri Leta Zunze Ubumwe za Amerika washingaga ishyirahamwe ryitwa Capitol Wrestling Corporation (CWC) rizwi nka World Wrestling Entertainment (WWE) ubu rikinirwamo ‘catch.’

Catch ikinirwa mu kibuga nk’icya Boxing kizwi nka ‘ring’ gikozwe mu buryo bwa mpande enye gipima hagati ya metero enye n’esheshatu kizengurutswe n’imigozi ikoze mu byuma.

Bene uku gukirana kurihariye bitewe n’uko bamwe babibona nk’urugomo kuruta uko byaba ari umukino. Impamvu nta yindi ni uko hemerwa gukoresha uburyo ubwo ari bwo bwose mu kwirwanaho nk’umutwe, urutugu, inkokora, ibipfunsi, imigeri n’ibindi bikoresho birimo inyundo, intebe, amezi, inzego n’ibindi.

Nk’uko bigenda mu yandi mashyirahamwe y’imikino njyarugamba, WWE na yo itegura amarushanwa atandukanye mu bagabo n’abagore aho abakinnyi bakina ku giti cyabo cyangwa se bagakina bari mu makipe, ibizwi nka ‘Tag Teams.’

Abakinnyi bahatana hagendewe ku byiciro bashyizwemo ari byo; RAW, Smack Down, NXT, Cruiserweight n’ibindi.

Gusa itandukaniro ryo muri WWE n’indi mikino nka Boxing ni uko umukinnyi ashyirwa mu cyiciro nka RAW cyangwa Smack Down hatagendewe ku biro apima cyangwa indeshyo ahubwo hagenderwa k’ubuhangange bwe n’igikundiro agaragarizwa n’abafana.

Ikindi ni uko umukinnyi washyizwe nko mu cyiciro cya Smack Down gikinwa buri wa Gatanu nijoro aba yemerewe kuba yahatanira mu kindi cyiciro nka RAW gikinwa buri wa Mbere nijoro.

WWE ihatanirwamo imikandara irimo WWE Champion na WWE Universal Champion iahatanirwa mu mihango itandukanye nka Royal Rumble, Hell in a Cell, Summer Slam na Wrestlemania ifatwa nka Champions League y’umukino wa ‘catch’.

Igitangaje kurusha ibindi ni uko imikino, amarushanwa n’imihango yo muri WWE bitegurwa hagendewe ku cyitwa ‘storylines’ bisobanuye ko imikino iba yateguwe guhera mu mizi kugeza ku gutoranya uri butsinde n’uri butsindwe.

Uburyo ibi bikorwamo ni nka filime, harebwa umukinnyi ukunzwe cyane n’abafana bakamuhuza n’undi w’igihangange ari ko wanzwe.

Igikurikiraho ni uko izi mpande zombi bazishakira ikibazo kiziteranya kugira ngo zizisobanure binyuze mu mukino. Mu rwego rwo gushimisha abafana hategurwa ko intsinzi iri bwegukanwe n’umukinnyi ukunzwe.

Icyakora hari igihe umukinnyi wanzwe n’abafana aba ari we utoranywa nk’uri butsinde bitewe n’impamvu zitandukanye harimo iyo gushaka gukomeza gukongeza ubukari mu mukino kugira ngo uzongere gutegurwa ari na ko abafana bakomeza kuwukurikirana kuri za Stade na televiziyo bityo bikinjiriza WWE amafaranga menshi.

Intsinzi yegukanwa mu buryo butandukanye burimo pin. Pin cyangwa se pinfall ni igihe umukinnyi afatira hasi uwo bahanganye hanyuma umusifuzi akabara inshuro eshatu. Iyo izo nshuro eshatu zirangiye uwafatiriwe hasi atinyagambuye birangira atsinzwe.

Submission yo ni igihe umukinnyi yemeye ko yatsinzwe nyuma yuko agaragaje ko ari kubabara bitewe n’uko aba ari gukandwa igice cy’umubiri nk’ijosi, ikiganza cyangwa ikirenge.

Knockout iba mu gihe habazwe inshuro 10 zikarinda zirangira umukinnyi yananiwe guhaguruka bikanzurwa ko atsinzwe.

Countout ni igihe umukinnyi aba yakubiswe akananirwa akarenga ikibuga hanyuma akananirwa kugisubiramo nyuma yo kumubarira inshuro 10.

Disqualification bisobanuye ko umukinnyi atsindwa iyo yarenze ku mabwiriza nk’urugero iyo atangiye kurwana n’uwo bahanganye hataravuzwa inzongera.

‘Catch’ ibamo imvune nk’indi mikino

Benshi bibwira ko abakinnyi batandukanye b’uyu mukino nka Roman Reigns, Brock Lesnar, Charlotte Flair n’abandi atari abantu bafite umubiri nk’uw’ikiremwamuntu bitewe n’uburyo bakubitwa cyane gusa bikarangira nta maraso bavuye.

Abategura iyi mikino bahora basobanura uburyo uyu mukino ari ingorabahizi basobanura imvune ziwubamo ari na ko basaba ababyeyi b’abana bakiri bato kubabuza kuba bagerageza kwigana ibyo bawuboneramo.

Zimwe muri izo mvune zizwi ni nk’iyo mu 1999 yasize Darren Drozdov agize paralysie kugeza n’ubu. Hari n’abagiye basiga ubuzima muri uyu mukino nka Owen Hart wapfuye mu 1999 nyuma yo gusimbuka ahantu hareshya na metero 24.

Nyuma y’ibyago nk’ibyo n’ibyagiye bibibanziriza, hashinzwe ibigo bitandukanye nka WWE Perfomance Center mu 2013. Ni ikigo cyita ku guhugura imikinire y’abakinnyi no kubavura hakoreshejwe imiti ibafasha gukomeza amagufwa n’imibiri yabo kugira ngo itibasirwa n’ibyago byo kuvunika cyangwa se kuva amaraso.

Bigaragarira amaso ko 'Catch' irenze kuba umukino bitewe n'ibikoresho byifashishwa mu kwirwanaho birimo intebe
Greco-Roman Wrestling ni ubundi buryo bwo gucyirana aho umukinnyi atanguranwa gushyira hasi igice runaka cy'umubiri cy'uwo bahanganye
'Sumo' ni bumwe mu bwoko bw'umukino ukinwa n'abagabo bo mu Buyapani bapima mu biro bigera muri 300
Ikirango cya WWE ikinirwamo umukino wa 'Catch'
John Cena ni umwe mu bakinnyi wakundwaga cyane n'abafana
Owen Hart yatwawe kwa muganga mbere yo gupfa bitewe n'impanuka yagiriye mu mukino ubwo yasimbukaga ahantu hareshya na metero 24 mu 1999
Vince McMahon ni we Munyamabanga Nshingwabikorwa wa WWE
Ubu buryo Sasha Banks yakoresheje gutsinda Charlotte Flair bwitwa submission
Wrestlemania niwo muhango ukomeye kuruta iyindi muri WWE. Wagereranywa nka Champions League, irushanwa ry'umupira w'amaguru rikomeye i Burayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .