Irushanwa rya Sunshine Development Tour rihuza abakinnyi bakomeye muri Afurika muri Golf, muri uyu mwaka rizakinirwa mu bihugu bine ari byo Kenya, Uganda, Nigeria n’u Rwanda.

Kuri uyu wa Kabiri, tariki ya 18 Kanama, bakinnye agace ka nyuma k’iri rushanwa ryiswe ABSA Invitational Ruiru, ribera ku kibuga cya Ruiru Sports Club, kuva tariki ya 18 Kanama 2026.

Nyuma y’iminsi itatu riri gukinwa, Nsanzuwera uri muri iri rushanwa ni we Munyarwanda rukumbi, yayoboye abandi n’amanota 200, arusha atatu Godwin Okoko wo muri Nigeria wagize 203.

Ku munsi wa mbere Nsanzuwera yagize amanota 69 arushwa inota rimwe na Nduva Daniel wo muri Kenya, ku munsi wa kabiri ari na wo uyu Munyarwanda yitwayeho neza, yagize amanota 66 arusha ane uyu Munyakenya wagize amanota 70.

Nduva ntiyahiriwe n’umunsi wa gatatu kuko yakoze amanota 71, Nsanzuwera akora amanota 65, Okoko witwaye neza ku munsi wa gatatu agakora amanota 65, ahita azamuka ku rutonde aba uwa kabiri inyuma y’uyu Munyarwanda.

Muri rusange Nsanzuwera yagize amanota 200, akurikirwa na Okoko wakoze amanota 203 mu nshuro 210 zikinwa muri iki kibuga. Ikibuga cy’imyobo 18 bakiniragamo gikinwamo inshuro 70.

Nyuma yo guhanganira muri Kenya, abakinnyi bazakomereza mu Rwanda, aho bazakina irushanwa rya Sportbiz Africa Championships na ryo riri muri Sunshine Development Tour 2026/27.

Uyu mukinnyi wa mbere mu mukino wa Golf mu Rwanda, ni na we wegukanye agace ka ’Sunshine Development Tour - East Africa Swing’ na ko kakiniwe muri Kenya, aho kamuhesheje umwanya wa kabiri ku rutonde rusange.

Sunshine Development Tour itanga amanota azamura abakinnyi ku rutonde rw’Isi, imaze gukinwamo uduce turindwi muri 15. Izagera mu Rwanda kuva tariki ya 11 kugeza 13 Nzeri 2026, ibere kuri Kigali Golf Resorts & Villas.

View this post on Instagram

A post shared by Sunshine Development Tour EA (@sunshinedevelopmenttourea)

Nsanzuwera Célestin ayoboye urutonde rwa Sunshine Development Tour mu gace karyo kari kubera muri Kenya

Nsanzuwera Célestin yegukanye irushanwa rya Sunshine Development muri Kenya