Ku Cyumweru, tariki ya 18 Mutarama 2026, ni bwo kuri Mundi Center hakiniwe imikino ya nyuma ya Shampiyona y’u Rwanda muri Billard yahuriyemo amakipe yo mu Mujyi wa Kigali.

Amakipe 16 ni yo yakinnye Shampiyona y’u Rwanda ari mu matsinda ane, hakomeza imwe muri buri tsinda. Ayo ni Drums, RGP, Snipers na Eza Breakers.

Muri ½, RGP yahuye na Drums yegukanye shampiyona ebyiri ziheruka irayisezerera, naho Eza Breakers ikuramo Snipers iheruka gukina umukino wa nyuma.

RGP yatsinze Eza Breakers ihita yegukana Shampiyona y’u Rwanda ku nshuro ya mbere, ihabwa miliyoni 1 Frw, Eza Breakers ihabwa ibihumbi 700 Frw, mu gihe Drums yabaye iya gatatu yahawe ibihumbi 400 Frw.

Perezida w’Ishyirahamwe rya Billard mu Rwanda, Shema Jean Claude, yavuze ko shampiyona yagenze neza kandi igiye kongerwamo andi makipe yo hanze ya Kigali.

Ati “Nyuma yo gutegura neza shampiyona ku nshuro ya gatatu, byerekana ko ahazaza hacu ari heza. Ubu turi mu nzira zo kwandikisha Ishyirahamwe ry’Imikino mu buryo bwemewe n’amategeko, aho twiteze ko mu mpeshyi tuzaba twanditswe mu Rwego rw’Igihugu rushinzwe imiyoborere.”

“Indi gahunda turi gutegura ni ukuzengura intara zose z’igihugu dutegura amarushanwa tunahashyira amakipe.”

Imikino ya Shampiyona y'u Rwanda yabereye Mundi Center

Ishyirahamwe rya Billard mu Rwanda rigiye kongera amakipe yo mu ntara muri Shampiyona y'u Rwanda

Shampiyona ya Billard yakinwe ku nshuro ya gatatu

Ishyirahamwe ry'abakina Billard risaba abakinnyi bose kugira amakipe babarizwamo

Abakina Billard batangiye kumeyera shampiyona ikinwa bihoraho

Eza Breakers yabaye iya kabiri muri shampiyona

Imidali yahembwe abakinnyi ba RGP yabaye iya mbere

Perezida w'Ishyirahamwe rya Billard, Shema Jean Claude, Umuyobozi wa Mundi Center, Olivier Costa n'Umuyobozi ukuriye Iyamamazabikorwa muri Bralirwa, Lieke Bouwhuis bakurikiye imikino ya nyuma

RGP yegukanye Igikombe cya Shampiyona muri Billard