00:00:00 IGIHE NETWORK KN KINYARWANDA EN ENGLISH FR FRANCAIS

Abanya-Côte d’Ivoire bihariye isiganwa ryo kugenda n’amaguru mu Rwanda

Yanditswe na Iradukunda Olivier
Kuya 27 May 2024 saa 11:23
Yasuwe :

Bwa mbere mu Rwanda habereye isiganwa ryo kugenda n’amaguru (Race Walking) ryegukanwa n’Abanya-Côte d’Ivoire barimenyereye.

Ni irushanwa ryabaye kuri iki Cyumweru, tariki ya 26 Gicurasi 2024, aho abasiganwa mu byiciro bitandukanye bahuriye mu mihanda y’icyanya cyahariwe inganda i Masoro.

Aba bari mu byiciro byiganjemo abakuze basanzwe bakina uyu mukino mu makipe atandukanye akorera siporo mu Mujyi wa Kigali guhera ku myaka 20 kuzamura.

Usibye abari hagati y’imyaka 20 na 34 bakoze ibilometero 10, abandi bose bakoze ibilometero bitandatu.

Muri iki cyiciro cy’abakiri mu myaka yo hasi ari nacyo cyari gikomeye,cyegukanywe n’Umunya-Côte d’Ivoire Zirignon Shadrack mu bagore akoresheje isaha imwe, iminota itandatu n’amasegonda 24.

Aha yakurikiwe n’Umunyarwandakazi Mugisha Ange warushijwe iminota 21 yose.

Mu bagabo Dje Bi Robert na we w’Umunya-Côte d’Ivoire, yanikiye abandi bagabo yegukana irushanwa akoresheje isaha imwe, iminota ibiri ndetse n’amasegonda 42. Yakurikiwe na Nsavyimana Vianney ku kinyuranyo cy’iminota itandatu.

Uwatunguye abantu benshi muri iri siganwa ni Kesse Koffi w’imyaka 58 wakoresheje umuvuduko udasanzwe ku myaka ye , akabasha kwihuta ku bilometero 6 akoresheje iminota 40 n’amasegonda 11.

Iri rushanwa kandi ryitabiriwe na nimero ya mbere muri Afurika, Coulibaly Myriam Yacine, wahatanye mu batarengeje imyaka 44 ndetse yegukana isiganwa ry’i Kigali.

Visi Perezida w’Impuzamashyirahamwe ry’imikino yo kugenda n’amaguru ariko batiruka (CARP), Jean Nyamuniga, yasobanuye ishingwa n’impamvu y’ishyirwaho ry’iri shyirahamwe n’impamvu imikino yabereye mu Rwanda.

Ati “Ishyirahamwe ryashingiwe muri Côte d’Ivoire mu 2019 ihita itangira no kuryakira ariko u Rwanda rwahise rushingwa kuba umuyobozi waryo wungirije. Twabasobanuriye uko igihugu cyacu cyorohereza abakora siporo yo kugenda n’amaguru, bahita baduha uwo mwanya.”

“Ibyo byatumye bashaka ko twakira iyi mikino ako kanya ariko ntitwabyemeye kuko imyiteguro yari gusa n’aho itunguranye ariko dufatanyije n’amakipe akina uyu mukino mu Rwanda, twabishyize ku murongo, turaryakira.”

Abakina uyu mukino kandi bagaragaje ko bacyifuza kwakira urubyiruko rwinshi rukina uyu mukino kugira ngo hajye haboneka n’abo kohereza mu marushanwa mpuzamahanga.

Umuyobozi w’irushanwa Col. Djimenou Rodrigue yavuze ko “ryagenze neza cyane , nta n’umwe wakwemera ko ibintu nk’ibi byabereye i Kigali. Gusobanura uko abakinnyi bitwaye biragoye gusa nkanjye wari urihagarariye nemeye.”

Nubwo byagenze neza ariko habayeho ikibazo cy’Umuyobozi wa CARP, Marrie Laure Essan utageze mu Rwanda kubera ikibazo cy’indege cyatumye ahera muri Kenya ndetse afite n’imidari yagombaga guhabwa abakinnyi ariko hakaba hari gutegurwa uburyo izabageraho.

Isiganwa rikurikiraho rizabera muri Côte d’Ivoire ndetse u Rwanda rwasabwe kuzohereza abakinnyi benshi.

Amakipe asanzwe akinira mu Mujyi wa Kigali niyo yitabiriye imikino
Ahagana saa Tanu nibwo abakinnyi ba mbere bahagurutse
Bamwe mu bakinnyi bateranaga ingabo mu bitugu bitewe n'amakipe bakinira
Dje Bi Robert yateraga intambwe ikomeye
Abakinnyi ba Kigali Walking Club bitabiriye isiganwa
Zirignon Shadrack yateraga intambwe ikomeye
Abari bashinzwe kubarura ibihe bakoze akazi kabo neza
Coulibaly Myriam Yacine yahize abandi mu bagore bari hagati y'imyaka 35 kugeza kuri 44
Hari kurebwa uko umukino wa Walking Race washyirwamo imbaraga
Bamwe basiganwaga byo kwishimisha
Abanyarwanda bishimiye irushanwa ryabaye ku nshuro ya mbere
Kesse Koffi yatunguye benshi ku buryo arushanwa n'imyaka ye
Kugeza ubu umubare munini w'abakina uyu mukino mu Rwanda wiganjemo abakuze
Nubwo Kesse Koffi akuze ariko yeretse igihandure urubyiruko
Umunya-Bénin Col. Djimenou Rodrigue niwe wari umuyobozi w'isiganwa ndetse yishimiye uko ryagenze
Twahirwa Patrick ni umwe mu bakinnyi bahatanye kugeza ku munota wa nyuma
Abo mu myaka yo hejuru ntibatanzwe mu irushanwa
Coulibaly Myriam Yacine niwe mukinnyi wa mbere muri Afurika ndetse yegukanye n'isiganwa ryabereye mu Rwanda

Amafoto: Dukundane Ildebrand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .