Brazil yatangiye iri rushanwa ihabwa amahirwe yo kuryegukana, akiyongera umunsi ku wundi nyuma yaho ibihugu bikomeye byasezererwa kimwe ku kindi.

Mu mukino wa ¼ wabaye mu ijoro ryo kuri uyu wa Gatandatu, u Bubiligi butahabwaga amahirwe nibwo bwafunguye amazamu ku gitero cyitsinzwe na Fernandinho ku munota wa 13.

Brazil yahererekanyaga umupira neza kurusha u Bubiligi, yagerageje uburyo bwinshi bwo gushaka uko yishyura ariko ba myugariro b’u Bubiligi bari benshi imbere y’izamu ryabo barayizibira.

Ku munota wa 30, Brazil igishakisha uko yakwishyura, abasore b’u Bubiligi baje kuyica mu rihumye maze bazamukana umupira ugera kuri Kevin De Bruyne maze nawe atera ishoti rikomeye umuzamu wa Brazil ayoberwa uko bigenze.

Igice cya mbere cyarangiye ari ibitego bibiri ku busa. Mu gice cya kabiri, Brazil yakoze impinduka ishaka uko ibona intsinzi, umutoza wayo Tite yinjiza mu kibuga abasore barimo nka Roberto Firmino, Douglas Costa na Renato Augusto.

Basatiriye bikomeye bashaka kwishyura, Neymar agerageza uburyo bwinshi imbere y’izamu ariko byose biranga biba iby’ubusa kugeza ubwo Renato Augusto yatsinze igitego kimwe ku munota wa 73.

Abasore ba Brazil bakomeje gusatira, biharira umupira karahava ariko banarema uburyo bwateje impaka basaba guhabwa penaliti n’ibindi ariko iminota 90 irangira ari ibitego bibiri kuri kimwe.

Brazil ibaye indi kipe ikomeye nyuma ya Espagne, u Budage, Argentine, na Portugal isezerewe.

U Bubiligi bwakatishije itike buzahura muri ½ n’u Bufaransa mu mukino uzagena ikipe igomba kugera ku mukino wa nyuma w’iri rushanwa.

Ab’i Kigali bawurebye bisanzuye

Uretse ibihumbi by’abafana bari bicaye muri Kazan Arena mu Burusiya, abandi barebeye uyu mukino muri Radisson Blu Hotel, ahari amatereviziyo manini yerekana ikibuga cyose, bamwe bishimiye gukomeza k’u Bubiligi bafanaga abandi batahana agahinda katangira ingano kubera Brazil bihebeye.

Gasana Clever wafanaga Brezil aganira na IGIHE yagize ati “Ndababaye cyane, sinzi uko nabivuga. Natangiye gufana Brazil mu 2002 ari nabwo duheruka kwegukana iki gikombe, numvaga ko aya ari andi mahirwe tubonye ariko biranze. Umukinnyi wadupfiriye ubusa ni Gabriel Jesus kuko yahawe umwanya ariko atashye nta n’igitego atsinze.”

Henry Rwema wafanaga u Bubiligi we yagize ati “U Bubiligi ntibwari mu makipe yahabwaga amahirwe cyane ariko kuba bugeze aha butaratsindwa umukino ntibyabaye ku mpanuka. Gusezerera Brazil ni ubutumwa dutanze kandi n’u Bufaransa ntibwadutera ubwoba, mfite ikizere ko hamwe n’iyi kipe dushobora kwandika amateka.”

Kurebera umupira muri Radisson Blu Hotel nta mafaranga umuntu asabwa kwishyura uretse gufata icyo kunywa agasangira ibyishimo by’Igikombe cy’Isi n’inshuti n’abavandimwe.

Hagati aho, kuri uyu wa Gatandatu u Burusiya bwakiriye irushanwa buzakina na Croatia, naho u Bwongereza buhure na Suède.

Kevin De Bruyne ni we watsinze igitego cyashimangiye intsinzi y'u Bubiligi

Abakinnyi b'u Bubiligi bishimira igitego cya mbere babonye kuri Brazil

Eden Hazard yishimira gufasha u Bubiligi kugera muri 1/2 aho bugomba kuzisobanura n'u Bufaransa

Ibyishimo byari byose nyuma y'aho iyi kipe igereye muri 1/2

Agahinda kari kose kuri Neymar wari witezweho ibitangaza n'Abanya-Brazil bose

Amafoto y’uko byari byifashe muri Radisson Blu

Kuri Kigali Convention Center hari ahantu heza ho kurebera Igikombe cy'Isi

Abakunzi ba Brazil agahinda kari kose bitangiriye itama

Abarebeye umukino wa Brazil n'u Bubiligi muri Radisson Blu Hotel babaga bafata ibinyobwa n'amafunguro

Barebera ku mateleviziyo manini yerekana ikibuga cyose

Hari ahantu hanini ho kwicara abantu bareba umupira

Inshuti n'abavandimwe barebera igikombe cy'isi muri Radisson Blu Hotel