Mu irushanwa ry’amakipe yabaye ayambere iwayo ku mugabane w’Afurika(Champions league), ikipe y’umupira w’amaguru TP Mazembe yasezerewe na Espérance de Tunis ku gitego kimwe ku busa mu mukino wa ½ wo kwishyura wabereye muri Tunisiya ku wa 20 Ukwakira 2012.

Nk’uko Jeune Afrique yabitangaje, iki gitego kimwe rukumbi cyabonetse ku munota wa 70 cyatsinzwe na Mohamed Mansour n’umutwe ku ipasi nziza ya coup franc.

Mu mukino ubanza wabereye muri Congo, ikipe zombi zari zanganyije ubusa ku busa bisobanuye ko impuzandengo y’ibitego ku mikino yombi ari kimwe ku busa.

Espérance de Tunis izakina umukino wa nyuma n’iza kurokoka hagati ya Al Alhy yo mu Misiri na Sun Shine yo muri Nigeriya, zifitanye umukino kuwa 21Ukwakira 2012.

Esperance de Tunis yasezereye TP Mazembe yo muri Repuburika Iharanira Demukasi ya Congo, yatwaye Champions league inshuro ebyiri (mu 1994 no mu 2011).