Uwayezu ayobora Rayon Sports guhera ku wa 24 Ukwakira 2020, aho yari yatorewe manda y’imyaka ine.

Mu kiganiro yagiranye na Televiziyo y’Igihugu kuri uyu wa Gatandatu tariki ya 29 Nyakanga 2023, Uwayezu Jean Fidèle, yatangaje ko atazongera kwiyamamariza kuyobora Rayon Sports.

Ati "Nsigaje umwaka umwe n’amezi abiri, imyaka ine ukorera Rayon Sports harimo imvune, hari n’ibindi byinshi uba warigomwe. Ku bwanjye nifuza ko ntakongera gukomeza, ahubwo twashaka undi nk’Aba-Rayons na we akaza akagerageza imyaka ine. Nibabe bitegura bashake uzansimbura."

Mu myaka itatu Uwayezu amaze ku buyobozi bwa Rayon Sports, iyi kipe yabaye yatwaye Igikombe cy’Amahoro cya 2023 nyuma yo gutsinda APR FC igitego 1-0 ku mukino wa nyuma.

Muri Shampiyona ya 2020/21, iyi kipe yabaye iya karindwi, mu 2021/22 iba iya kane mu gihe mu 2022/23 yabaye iya gatatu.

Kuri ubu, Rayon Sports iri kwitegura umwaka w’imikino mushya wa 2023/24 aho izakina CAF Confederation Cup ihereye mu ijonjora rya kabiri, ikazahura n’ikipe izakomeza hagati ya Al Hilal yo muri Libya na Kakamega Home Boyz FC yo muri Kenya.

Ikipe y’Abagore ya Rayon Sports izakina Icyiciro cya Mbere mu mwaka w’imikino wa 2023/24 nyuma yo gutwara Shampiyona y’Icyiciro cya Kabiri mu mwaka wayo wa mbere kuva ishinzwe.

Perezida wa Rayon Sports, Uwayezu Jean Fidèle, yavuze ko atazongera kwiyamamaza nasoza manda yatorewe mu 2020

Mu myaka amaze ku buyobozi bwa Rayon Sports, Uwayezu aragenda yigarurira imitima y'abafana

Uwayezu mu byishimo ubwo Rayon Sports yari imaze kwegukana Igikombe cy'Amahoro itsinze APR FC

Rayon Sports yegukanye Igikombe cy'Amahoro cya 2023 nyuma yo gutsinda APR FC ku mukino wa nyuma