Umwuka uri muri Rutsiro FC iri mu makipe azahatanira kuzamuka mu Cyiciro cya Mbere

Yanditswe na Kabera Haruna
Kuya 24 Nyakanga 2020 saa 10:52
Yasuwe :
0 0

Bamwe mu bakinnyi bakinira Rutsiro FC yifuza kuzamuka mu cyiciro cya Mbere, bari mu bagowe n’ibihe bikomeye bya Guma mu Rugo ubwo icyorezo cya Coronavirus cyabasangaga aho ikipe yabo yari icumbitse.

Muri Werurwe nibwo imikino yahagaze kubera icyorezo cya Covid-19, bamwe mu bakinnyi bava aho bari bacumbitse hamwe n’amakipe bakinamo, basubira iwabo mu miryango.

Rutsiro FC ni imwe mu makipe yitegura imikino ya Playoffs yo gushaka amakipe abiri azazamuka mu Cyiciro cya Mbere mu mwaka w’imikino.

Umutoza wayo, Munyeshema Gaspard, yabwiye IGIHE ko hari abakinnyi bacye gahunda ya Guma mu Rugo yasanze aho bacumbikiwe n’ikipe ariko ngo byari bigoye kubona ibibatunga.

Ati "Urumva ibintu byari bihindutse abakinnyi bamwe batashye, imirimo yose ihagaze abantu bashyizwe muri guma mu rugo, kuri twe kimwe n’abandi ntitworohewe na kiriya gihe ariko ubu ibintu biri kugenda bisubira mu murongo byahozemo”.

Abajijwe icyo bafashije abakinnyi n’uko babafashaga, Munyeshema yavuze ko abari mu miryango bagiye baboherereza amafaranga yo kubafasha.

Yakomoje kandi ku myiteguro y’imikino iyi kipe ifite mu minsi iri imbere dore ko iri no muzihabwa amahirwe yo kuzamuka mu cyiciro cya mbere.

Ati “Abakinnyi twagiye tugerageza kubafashiriza aho bari mu miryango yabo nko kuboherereza amafaranga yo kwifashisha muri ibi bihe bitoroshye turimo ,twabahembye igihe bakoze icyo batabonye ni agahimbazamusyi kuko bagahabwa ari uko bakinnye.”

“Turi kugerageza kubafasha gukora imyitozo ya buri umwe ku giti cye no kubategura mu mutwe mu gihe dutegereje amabwiriza atwemererera kuba twakora hamwe nk’ikipe. Abari mu miryango tuboherereza imyitozo bagomba gukora n’uko bayikora. Bacye basigaye aho ikipe iba nabo barakora ariko buri umwe akikorana kuko tutaremererwa gukorera hamwe.”

Rutahizamu wa Rutsiro FC, Nshimyumuremyi Olivier, yavuze ko na we nk’umukinnyi, yagowe n’ibihe bamazemo iminsi badakina kuko ari ko kazi kabo kandi bahembwa ari uko bakoze.

Ati”Ntabwo twari tworohewe n’ubuzima muri kiriya gihe kimwe nk’abandi bose bahembwa ari uko bakoze gusa ubuyobozi bw’ikipe bwaradufashije cyane kandi n’ubu baracyadufasha. Twiteguye neza imikino dufite kandi hamwe n’Imana byose bizagenda neza tuzazamuka.”

Rutsiro FC yabaye iya mbere mu itsinda A, iri mu makipe umunani azavamo abiri azamuka mu Cyiciro cya Mbere mu mwaka uta w’imikino wa 2020/21, aho iyi mikino ya play-offs yitabitwa n’ikipe enye za mbere muri buri tsinda.

Andi makipe azakina iyi mikino ni Amagaju FC, Gorilla FC, Rwamagana FC, Alpha FC, Vision, Interforce Fc na Étoile de l’Est.

Kugeza ubu ntiharamenyekana igihe iyi mikino isoza Shampiyona y’Icyiciro cya Kabiri, izakinirwa bitewe n’uko umupira w’amaguru uri mu bikorwa by’imikino bitarakomorerwa ndetse hakaba hadashobora kuba amarushanwa.

Rutsiro FC ni imwe mu makipe azakina imikino ya Playoffs yo gushaka izatanga abiri azakina icyiciro cya Mbere mu mwaka utaha w'imikino
Nshimyumuremyi Olivier ukinira Rutsiro FC, yizeye ko ikipe ye ishobora kuzamuka mu Cyiciro cya Mbere.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .