00:00:00 IGIHE NETWORK KN KINYARWANDA EN ENGLISH FR FRANCAIS

Umutoza wa US Monastir yanze kuvuga ku kababaro yatewe no gutsindwa na APR FC ngo adahanwa

Yanditswe na Byiringiro Osée Elvis
Kuya 11 September 2022 saa 02:36
Yasuwe :

Umutoza wa US Monastir, Darko Nović, yatangaje ko nubwo batishimiye imisifurire y’umukino wayihuje na APR Fc, ngo ntacyo yayivugaho kuko ashobora kubihanirwa n’Impuzamashyirahamwe y’Umupira w’Amaguru muri Afurika (CAF).

Mu mukino wabereye i Huye ku wa Gatandatu, APR FC yatsinze US Monastir igitego 1-0, mu mukino wateje impaka ndende kubera igitego cya US Monastir cyanzwe.

Igitego rukumbi cyabonetse muri uyu mukino cyatsinzwe na Mugunga Yves ku munota wa 17.

Mu gice cya kabiri, US Monastir yaje yahindutse irusha APR bigaragara, maze ku munota wa 78 Heykeur Chikhaoui atsinda igitego cyo kwishyura ariko umusifuzi Kakunze Hervé wo ku ruhande avuga ko habayeho kurarira.

Kwanga icyo gitego ni byo byateje impaka ndende kuko abakinnyi n’abatoza ba US Monastir ntibemeraga icyemezo cy’umusifuzi.

Mu kiganiro n’itangazamakuru, Umutoza wa US Monastir, Darko Nović, yavuze ko avuze ku musifuzi yasabwa ibisobanuro na CAF.

Yagize ati “Ndakeka buri wese hari uko yabibonye. Ngize icyo mbivugaho najya kwisobanura ku bantu b’i Cairo.”

Yakomeje avuga ko atari ubwa mbere bimubayeho kuko yanahuye na byo mu bindi bihugu bitandukanye muri Afurika.

Ati “Bimaze imyaka myinshi, nabibonye muri Mali, Congo, Kenya n’ahandi, abasifuzi ntibatuma amakipe yo muri Afurika y’Amajyaruguru akina umupira.”

Umukino wo kwishyura uteganyijwe ku Cyumweru, tariki 18 Nzeri 2022, uzabera i Monastir muri Tunisie.

Ikipe izakomeza hagati ya APR FC na US Monastir, izahura na Al Ahly SC yo mu Misiri mu cyiciro gikurikira.

Umusifuzi wo ku ruhande Kakunze Hervé yamanitse igitambaro mu kwerekana ko umukinnyi wa US Monastir yatsinze igitego yaraririye
Byasabye ko umusifuzi wo hagati aza guhosha imvururu
Igitego cya US Monastir cyanzwe biteza impaka mu bakinnyi n'umusifuzi
Abasifuzi basohotse barinzwe na Polisi y'Igihugu kugira ngo badasagarirwa n'abakinnyi ba US Monastir bari bafite umujinya w'umuranduranzuzi

Amafoto: Rwanda Magazine


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .