00:00:00 IGIHE NETWORK KN KINYARWANDA EN ENGLISH FR FRANCAIS

Umutoza wa Gasogi United yahakanye ko akoresha ibyangombwa bihimbano, avuga ko ’bamwitiranyije’

Yanditswe na Iradukunda Olivier
Kuya 6 Ukwakira 2022 saa 08:23
Yasuwe :

Umunyamisiri Ahmed Adel Abdelrahman utoza Gasogi United FC yahakanye ko ari mu batoza bahagaritswe n’Impuzamashyirahamwe y’Umupira w’Amaguru muri Afurika, CAF, ahubwo avuga ko ari undi bitiranwa amazina yombi.

Ku wa Gatatu tariki ya 5 Ukwakira 2022, ni bwo amakuru yasakaye ko CAF yahagaritse abatoza batatu barimo Umunya-Tunisia Rafik Mhamdi, Umunya-Maroc Youssef Rossi n’Umunyamisiri Ahmed Adel utoza Gasogi United.

Aba uko ari batatu bahagaritswe imyaka itanu batagaragara mu bikorwa bya ruhago, bazira gukoresha ibyangombwa bihimbano.

Itangazo rihagarika aba batoza ryashyizweho umukono na Perezida w’Akanama gashinzwe Imyitwarire muri CAF, Raymond Hack.

Adel avuga ko ibyangombwa byagaragajwe na CAF ku mwirondoro we, bitandukanye n’ibyo afite kuko byanatangiwe mu bihugu bitandukanye.

Yagize ati "Aya makuru nayabonye. Icyemezo cya CAF ni cyo, ariko ntabwo ari njyewe, ni undi mutoza na we witwa nk’ayo mazina Ahmed Adel Abdelrahman Ibrahim. Uruhushya rwe (uwahagaritswe) yaruboneye muri Burkina Faso, urwanjye naruboneye mu Misiri."

Ahmed Adel akomeza avuga ko uruhushya rwe ari urwa kera, kandi ugereranyije n’urw’uwahagaritswe, zasinyweho n’abantu batandukanye.

Yongeyeho ko mu Misiri aho akomoka habayo abantu benshi bafite amazina nk’aye, bityo ko ibyo guhagarikwa kwe atari byo.

Ibyo kuba ibyangombwa bya Adel byemewe bishimangirwa na Perezida wa Gasogi United, Kakooza Nkuliza Charles (KNC).

Mu kiganiro yatangiye kuri Radio 1, yagize ati "Licence y’uyu mugabo (Ahmed Adel) iranditse, yakorewe i Cairo mu Misiri ku itariki 19 Nyakanga 2016, isinywaho n’uwitwa Hicham El Amrani wahoze ari Umunyamabanga wa CAF. Yasinyweho kandi n’uwahoze ari Perezida wa CAF, Issa Hayatou."

Perezida wa Gasogi United kandi yongeyeho ko uyu mutoza wabo yamaze kwandikira CAF kugira ngo ikureho icyasha yamushyizeho.

Ahmed Adel yageze muri Gasogi United nk’umutoza mukuru muri Nyakanga 2022. Yanyuze mu makipe atandukanye arimo Musanze FC yabayemo mu 2020, na Panthère du Ndé yo muri Cameroun.

Adel Ahmed na Perezida we Kakooza Nkuliza Charles bashimangira ko ibyo gukoresha ibyangombwa mpimbano ari ibinyoma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .