Uyu mukino wabimburiye indi yose ya Shampiyona izakinwa muri iki cyumweru, wakiniwe mu mvura nyinshi yaguye mu bice bitandukanye bya Kigali nyuma ya saa Sita.

Nyuma yo kugaragaza inyota yo gutera za coup-franc, ariko akarekera bagenzi be barimo Muvandimwe Jean Marie Vianney na Iradukunda Elie Tatou ntibazibyaze umusaruro, Umunyezamu Sebwato Nicholas yabaye intwari y’umukino wo kuri uyu wa Kane.

Uyu Munya-Uganda yishimiwe na bagenzi be nyuma y’uko kuri koruneri yatewe na Muvandimwe Jean Marie Vianney ku munota wa kane w’inyongera, yasumbye abakinnyi ba Kiyovu Sports, atsindisha umutwe mu izamu ryari ririnzwe na Nzeyurwanda Djihad.

Sebwato yari yigaragaje kandi mu minota yabanje, aho yabujije Muhozi Fred gutsinda kandi bari basigaranye barebana umwe kuri umwe. Hari mbere y’uko kandi akuramo umupira ukomeye watewe na Hakizimana Félicien.

Gusa, uyu munyezamu yinjijwe igitego ku munota wa 67, aho Kilongozi Richard Bazombwa yahawe umupira na Mugiraneza Frodouard ari inyuma y’urubuga rw’amahina, acenga Kayumba Soter mbere yo gutera ishoti rikomeye Sebwato atagezeho.

Shami, Iradukunda Elie na Niyonkuru Ramadhan bahushije ubundi buryo bwabonetse muri uyu mukino ku mpande zombi.

Abafana batageze kuri 250, utabariyemo abakinnyi n’abandi bari bafite inshingano zitandukanye ku kibuga, ni bo barebye uyu mukino. Bose hamwe bageraga muri 360.

Kunganya byatumye Mukura VS igira amanota 44 ku mwanya wa kane naho Kiyovu Sports igira amanota 38 ku mwanya wa karindwi.

Mbere y'umukino habanje gufatwa umunota wo Kwibuka ku nshuro ya 30 Jenoside yakorewe Abatutsi mu 1994

Umutoza wa Gorilla FC, Ivan Minnaert (ubanza ibumoso) ni umwe mu barebye uyu mukino

Umunyezamu Sebwato Nicolas afata umupira ubwo Mukura VS yari isatiriwe na Kiyovu Sports

Umukino wakiniwe mu mvura nyinshi

Kapiteni wa Kiyovu Sports, Mugiraneza Frodouard asatira Mahoro Fidel

mutoza wa Mukura VS, Afahamia Lofti, agerageza gutoza yugamye imvura

Kilongozi Richard yishimira igitego yatsindiye Kiyovu Sports ku munota wa 67

Umunyezamu Sebwato Nicolas yishyuriye Mukura VS ku munota wa nyuma, ku gitego yatsindishije umutwe

Byari ibyishimo kuri Mukura VS yishyuye ku munota wa nyuma

Gahunda y'imikino y'Umunsi wa 28 wa Shampiyona

Amafoto: Ntare Julius