Kuri uyu wa Mbere, tariki ya 10 Kanama 2026, ni bwo igitangazamakuru cya Sky News, yatangaje ko uyu mushoramari ukomoka muri Leta Zunze Ubumwe za Amerika ageze kure uyu mushinga.

Umushinga wo kugura imigabane muri Liverpool, Jeffrey Preston Bezos awufatanyije n’abarimo Eduardo Saverin, umwe mu bashinzwe Facebook, na ​Amit Bhatia wigeze kuba umunyamigabane muri Queens ​Park Rangers, yo mu Cyiciro cya Kabiri mu Bwongereza.

Kugeza ubu Liverpool ifitwe n’ikigo cya Fenway Sports Group, ndetse kikaba gishobora gutangaza umunyamigabane mushya, mu ri iki cyumweru.

Bezos ariyongera ku kigo cya Dynasty Equity, na cyo cyaguze imigabane muri Liverpool mu 2023, kuko Fenway yifuza ko muri iyi kipe hajyamo abanyamigabane benshi.

Bivugwa ko ishoramari rya Jeff Bezos muri Liverpool rizaba rifite agaciro ka miliyari 5.9$, akaba amafaranga menshi azaba atanzwe mu kugura imigabane mu ikipe y’umupira w’amaguru ku Isi.

Fenway yaguze Liverpool mu 2010, iyitangaho miliyoni 400$. Mu gihe iyimaranye yayifashije gutwara Premier League inshuro ebyiri (2019/20 na 2024/25), UEFA Champions League ya 2018/19, FA Cup ya 2021/22, Carabao Cup eshatu (2011/12, 2021/22 na 2023/24), UEFA Super Cup ya 2019, FIFA Club World Cup ya 2019 na FA Community Shield ya 2022/24.

Ikindi kigo Bezos afite ni igikora iby’ikoranabuhanga ry’ubwenge buhangano, AI, Project Prometheus. Afite The Washington Post, bikanavugwako yaguze imigabane muri NFL n’ikipe ya Seattle Seahawks byo muri Leta Zunze Ubumwe za Amerika.

Ubu Jeff Bezos ni we uri ku mwanya wa gatatu nk’utunze amafaranga menshi kurusha abandi ku Isi, aho abarirwa miliyari 256$.

Umuherwe Jeff Bezos yifuza kugura imigabane muri Liverpool