Umukino wa PSG na Man City wari utegerejwe cyane kuko amakipe yombi yarwaniraga kwisanga mu mwanya mwiza wo kuzabona itike y’icyiciro gikurikira.

Iyi kipe yo mu Bufaransa yabyitwayemo neza, itsinda iy’i Manchester ibitego 4-2, bituma iyi kipe yo mu Bwongereza ijya mu mazi abira kuko kugeza ubu iri mu yasezerewe.

Man City iri ku mwanya wa 25 n’amanota umunani, gusa mu gihe yatsinda umukino wa nyuma ifitanye na Club Brugge yazajya mu makipe azanyura mu mikino ya kamarampaka.

Ku rundi ruhande, Real Madrid iri kugaruka mu bihe byayo bya Champions League, yanyagiye Salzburg ibitego 5-1 birimo bibiri bya Rodrygo na Vinícius Júnior, n’ikindi cya Kylian Mbappé.

Iyi ntsinzi yatumye iyi kipe ifite igikombe giheruka yiyongerera amahirwe yo kuzaboneka mu makipe umunani abona itike y’imikino yo gukuranwamo kuko ubu iri ku mwanya wa 16 n’amanota 12, irushwa rimwe na Bayer Leverkusen iri ku wa munani.

Bayern Munich yatunguwe na Feyenoord Rotterdam, itsindwa ibitego 3-0, yibuza amahirwe yo kwishyira mu mwanya mwiza mbere y’umukino wa nyuma.

Iyi kipe yo mu Budage iri ku mwanya wa 15 irushwa inota rimwe na Leverkusen iheruka mu makipe atazanyura mu mikino ya kamarampaka.

Gutsinda kwa Feyenoord kwayongereye amahirwe yo kuzaboneka mu makipe umunani afite itike y’ikindi cyiciro, kuko inganya amanota 13 n’izisoza urutonde rw’abashobora gukomeza muri icyo cyiciro, bityo mu gihe yazatsinda umukino wa nyuma uzayihuza na Lille yahita ikomeza.

Indi mikino ni iyahuje Arsenal yatsinze Dinamo Zagreb ibitego 3-0, Inter de Milan yatsinze Sparta Praha igitego 1-0 na RB Leipzig yatsinze Sporting CP ibitego 2-1.

Shakhtar Donetsk yatsinze Brest igitego 1-0, AC Milan yatsinze Girona igitego 1-0, mu gihe Celtic yatsinze Young Boys igitego 1-0.

Kugeza ubu habura umukino umwe gusa, Liverpool na FC Barcelone ni yo makipe yamaze kubona itike ya 1/16. Zikurikiwe na Arsenal ya gatatu, Inter de Milan, Atlético de Madrid, AC Milan, Atalanta na Bayer Leverkusen ya munani.

Amakipe azanyura mu mikino ya kamarampaka, ni ari ku mwanya wa cyenda kugeza ku wa 24. Ayo arimo Aston Villa, Monaco, Feyenoord, Lille, Brest, Borussia Dortmund, Bayern Munich, Real Madrid, Juventus, Celtic, PSV Eindhoven, Club Brugge, Benfica, PSG, Sporting CP na Stuttgart.

Kuva kuri Manchester City ya 25 kugeza kuri Young Boys ya 36 ni amakipe ari mu byago byo gusezererwa. Aya arimo kandi Bologna, Sparta Prague, Leipzig, Girona, Red Star Belgrade, Sturm Graz, Salzburg, Slovan Bratislava.

Umunsi wa nyuma uteganyijwe ku wa Gatatu, tariki ya 29 Mutarama 2025, imikino yose uko ari 18 izakinwa saa Yine z’ijoro.

PSG yatsinze Man City, isubira mu murongo muzima

Abakinnyi ba PSG bishimira gutsinda Man City

Kugeza ubu Man City iri mu makipe yasezerewe

Ibitego bya Rodrygo, Vinícius Júnior na Kylian Mbappé byafashije Real Madrid gutsinda Salzburg

Real Madrid yagaruye icyizere cyo kuzaboneka mu makipe umunani ya mbere

Feynoord yatunguye Bayern Munich

Arsenal yatsinze Dinamo Zagreb biyoroheye