Iyi mikino yabaye mu ijoro ryo ku wa Gatatu, tariki ya 18 Werurwe 2026.

Umukino wa Barcelone na Newcastle wari utegerejwe cyane kuko ubanza amakipe yombi yanganyije igitego 1-1.

Urugendo rwo muri Espagne ntirwahiriye iyi kipe yo mu Bwongereza kuko ku munota wa gatandatu gusa, Raphinha yari afunguye amazamu. Uyu Munya-Brésil yatsinze ibitego bibiri we na Robert Lewandowski, mu gihe ibindi byatsinzwe na Lamine Yamal, Marc Bernal, na Fermín López.

Impozamarira za Newcastle zatsinzwe na Anthony Elanga. Umukino warangiye FC Barcelone yanyangiye Newcastle United ibitego 7-2, iyisezerera ku giteranyo cy’ibitego 8-3 mu mikino yombi.

Undi mukino wari uhanzwe amaso ni uwo Liverpool yakiriyemo Galatasaray kuri Anfield Road. Umukino ubanza iyi kipe yo muri Turikiya yari yatsinze igitego 1-0.

The Cops yajyanye imbaraga nyinshi muri uyu mukino, ku munota wa 25 Dominik Szoboszlai afungura amazamu, akorerwa mu ngata na Hugo Ekitike, Ryan Gravenberch na Mohamed Salah.

Umukino warangiye Liverpool yanyagiye Galatasaray ibitego 4-0, iyisezerera ku giteranyo cy’ibitego 4-1.

Indi mikino yabaye, Bayern Munich yatsinze Atalanta ibitego 4-1 iyisezerera iyandagaje ku giteranyo cy’ibitego 10-2, mu gihe Tottenham yatsinze Atletico Madrid ibitego 3-2, icyakora ntabwo byari bihagije kuko Spurs yasezerewe ku giteranyo cy’ibitego 7-5.

Muri ¼ hateganyijwe imikino ikomeye cyane, aho Real Madrid izakina na Bayern Munich, Paris Saint Germain izakina na Liverpool, FC Barcelona izakina na Atletico Madrid, mu gihe Arsenal izahura na Sporting Lisbon.

Imikino ibanza iteganyijwe tariki ya 7 n’iya 8 Mata 2025, mu gihe iyo kwishyura iri ku ya 14 Mata 2026.

Barcelone yanyagiye Newcastle ibitego 7-2

Raphinha yatsinze ibitego bibiri muri birindwi, Barcelone yanyangiye Newcastle United

Liverpool yanyagiye Galatasaray ibitego 4-0

Mohamed Salah yabaye Umunyafurika wa mbere wujuje ibitego 50 muri UEFA Champions League

Tottenham yatsinze Atletico Madrid ariko isezererwa ku kinyuranyo cy'ibitego 7-5

Bayern Munich yasezereye Atalanta iyiitsinze ibitego 10-2 mu mikino yombi