U Rwanda mu bihugu bizatangiriramo gahunda ya FIFA yo kugeza imikino mu mashuri

Yanditswe na Eric Tony Ukurikiyimfura
Kuya 24 Mata 2019 saa 05:51
Yasuwe :
0 0

U Rwanda ni kimwe mu bihugu bitatu bya Afurika bizatangiriramo gahunda nshya y’Ishyirahamwe ry’Umupira w’Amaguru ku Isi, FIFA, yo kugeza imikino mu mashuri abanza, aho kuri uyu wa Gatatu ku cyicaro cya FERWAFA hatangiye inama izamara iminsi ibiri ihuje inzego zose zizabigiramo uruhare.

Iyi nama yitabiriwe n’intumwa za FIFA zirimo Myriam Burkhard ushinzwe itumanaho n’ibikorwa rusange, Philip Zimmermann ushinzwe iterambere ry’abakiri bato na Marie-Florence Mahwera ushinzwe iri terambere mu karere. Hari kandi abahagarariye Ishami ry’Umuryango w’abibumbye ryita ku biribwa (WFP) n’izindi nzego zo mu Rwanda.

Iyi gahunda nshya igenewe amashuri abanza izatangizwa mu Rwanda muri Gicurasi ku bufatanye na Minisiteri y’Umuco na Siporo na Minisiteri y’Uburezi, aho izagera ku bana bose yaba abahungu cyangwa abakobwa nk’uko byatangajwe na Philip Zimmermann.

Ati “Uyu ni umushinga twifuza ko ugera ku mashuri yose abanza mu gihugu, ku Isi yose turashaka ko uzagera ku bana miliyoni 700 kandi u Rwanda ni kimwe mu bihugu bitatu bya Afurika byatoranyijwe ku ikubitiro. 20% by’abaturarwanda ni abanyeshuri mu mashuri abanza kandi bose turashaka kubageraho.”

“Tuzatanga imipira miliyoni 11 ku Isi hose, u Rwanda ruzabona imipira isaga ibihumbi 49. Buri shyirahamwe rizahabwa ubufasha bwo gutegura amarushanwa y’amashuri.”

Umuvugizi w’Ishami ry’umuryango w’abibumbye ryita ku biribwa (UN WFP), Hervé Verhoosel, yavuze ko FIFA yagiranye ubufatanye n’uyu muryango kugira ngo abana bakine bafite ubuzima bwiza.

Ati “Umuyobozi wa FIFA, Infantino, yahuye n’uwa UN WFP baganira uburyo bahuriza hamwe mu mishinga ya FIFA, ni muri urwo rwego byahujwe na gahunda yacu dufite yo kugeza ibiribwa mu mashuri ya hano mu Rwanda akaba ariyo mpamvu turi gushaka uburyo byanozwa hamwe n’inzego bireba zirimo minisiteri.”

Umunyamabanga Mukuru wa FERWAFA, Uwayezu François Régis, yavuze ko bashimishijwe no kuba u Rwanda ruri mu bihugu bitatu bya Afurika bizatangiririramo iyi gahunda, uruhare rwabo rukazaba ari ugukomeza gukorana n’inzego zose bireba, bagategura amarushanwa y’amashuri ndetse n’amahugurwa ku barimu n’abatoza.

Umuyobozi ushinzwe Siporo muri Minisiteri ya Siporo n’umuco, Rurangayire Guy, yavuze ko iyi minisiteri isanzwe ishyigikira ibikorwa nk’ibi mu mikino itandukanye irimo Volleyball na Basketball, bityo izanabikora mu mupira w’amaguru.

Ati “Muri MINISPOC dufite inshingano zo kwita ku bana muri siporo zitandukanye, turareba aho tuzahuza imbaraga tugendeye ku byo FIFA yazanye, kureba ibyo FERWAFA ifite muri gahunda zayo hanyuma duhuze kugira ngo dukomeze kuzamura impano z’abana bacu.”

Ingengo y’imari ya FIFA muri iyi gahunda ingana na miliyoni 100 z’amadolari, aho izagera ku bana bo muri Afurika, Asia, na Amerika y’Epfo kugeza mu 2022. Uretse u Rwanda, ibindi bihugu byatoranyijwe muri iyi gahunda ku ikubitiro ni Botswana, Mauritania, u Buhinde, Liban, Myanmar, Chile, Paraguay na Puerto Rico.

Iyi nama yahuje inzego zitandukanye zizagira uruhare muri iyi gahunda nshya ya FIFA mu mashuri
Abitabiriye iyi nama y'iminsi ibiri kuri gahunda nshya ya FIFA mu mashuri, basuye urwibutso rwa Jenoside rwa Kigali
Philip Zimmermann ushinzwe iterambere ry’abakiri bato muri FIFA
Umunyamabanga Mukuru wa Ferwafa, Uwayezu François Régis, yavuze ko bashimishijwe no kuba u Rwanda ruri mu bihugu bitatu bya Afurika bizatangiririramo iyi gahunda
Umuvugizi wa WFP, Hervé Verhoosel, yavuze ko FIFA yagiranye ubufatanye n’uyu muryango kugira ngo abana bakine bafite ubuzima bwiza
Umuyobozi wa Siporo muri MINISPOC, Rurangayire Guy yavuze ko isanzwe ishyigikira ibikorwa nk’ibi byo kuzamura impano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza