U Bufaransa bugiye gukora iperereza ry’uko Qatar yahawe kwakira Igikombe cy’Isi cya 2022

Yanditswe na Ndayikunda Josué
Kuya 12 Ukuboza 2019 saa 09:28
Yasuwe :
0 0

Ubuyobozi bw’u Bufaransa bwatangiye iperereza ku byaha bya ruswa byatumye Qatar yegukana amahirwe yo kuzakira imikino y’Igikombe cy’Isi mu 2022.

Iri perereza rije rikurikira irindi ryakozwe imyaka itatu n’abashinjacyaha mu bijyanye n’ibyaha by’imitungo kuva mu 2010 ubwo Qatar yemererwaga kuzakira Igikombe cy’Isi. Bamwe mu bayobozi ba FIFA batoye iki gihugu gikungahaye kuri peteroli bagiye bashinjwa ruswa.

Kimwe mu biri gukorwaho iperereza ryimbitse ni inama yabereye mu Ngoro ya Perezida w’u Bufaransa ukwezi kumwe mbere y’uko amatora yo kumenya uzakira Igikombe cy’Isi cya 2022 amenyekana, icyo gihe Nicolas Sarkozy akaba ariwe wari Perezida.

Iyo nama yahuriwemo na Nicolas Sarkozy n’abajyanama be babiri, Michael Platini wayoboraga UEFA na Sheikh Tamim bin Hamad Al Thani, Umuyobozi w’Ikirenga wa Qatar. Platini avuga ko yatunguwe cyane ubwo yasangaga Amim bin Hamad Al Thani na we ari kwa Sarkozy.

Platini utemera ibirego bya ruswa ashinjwa akomeza avuga ko yarazi ko agiye kugirana ibiganiro byihariye na Sarkozy, atungurwa no kubona abantu baturutse muri Qatar.

Ati “Naje guhura na Sarkozy kugira ngo mubwire ko nzatora Qatar n’u Burusiya. Nyuma nahamagaye Sepp Blatter (uwahoze ari Perezida wa FIFA) kugira ngo mumenyeshe ko ndi mu bibazo kubera ko nafashe ifunguro rya saa sita kwa Sarkozy, ntabwo nari nziko abantu baturutse muri Qatar bahari.”

Kuva Qatar ihawe uburenganzira bwo kwakira Igikombe cy’Isi, yagiye ishinjwa ibirego bya ruswa, gusa iki gihugu gihakana ibi birego byose.

Hakomeza kandi kwibazwa uburyo Qatar yabashije kwemeza abanyamuryango ba FIFA kudatora u Buyapani, Leta Zunze Ubumwe za Amerika, Australie na Korea y’Epfo nyamara byari ibihugu byari bifite amahirwe menshi.

Nyuma y’uko Qatar ihawe kwakira Igikombe cy’Isi cya 2022 binyuranyije n’amategeko, hari abantu benshi bagiye bahanwa.

Mu bahanwe harimo abayobozi bahoze bayobora umupira w’amaguru muri Brésil bahagaritswe kutongera kugaragara mu bikorwa by’umupira ubuzima bwabo bwose, Planiti uheruka kurangiza imyaka ine atagaragara mu mupira w’amaguru ndetse na Sepp Blatter.

Michel Platini ni umwe mu bavugwa mu manyanga yo guha Qatar kwakira Igikombe cy'Isi cya 2022

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza