StarTimes izerekana umukino wa nyuma wa FA Cup

Yanditswe na Kabera Haruna
Kuya 28 Nyakanga 2020 saa 02:01
Yasuwe :
0 0

Ku wa Gatandatu tariki ya 1 Kanama 2020 nibwo hateganyijwe umukino wa nyuma wa FA Cup uzahuza Chelsea na Arsenal, uzabera kuri Stade Wembley.

Ni umukino utegerejwe n’abatari bake, uzerekanwa kuri StarTimes.

Arsenal izaba iri ku gitutu kuko ishaka guca agahigo ko gutwara iki gikombe inshuro 14 mu gihe Chelsea imaze kwegukana iri rushanwa inshuro umunani.

Arsenal yaherukaga gutsinda Watford ibitego 3-2 mu gihe Chelsea yatsinze Wolverhampton Wanderers ibitego 2-0 mu mikino yo gusoza Shampiyona y’Icyiciro cya Mbere mu Bwongereza, yarangiye mu mpera z’icyumweru gishize.

Chelsea yasoreje ku mwanya wa kane biyiha amahirwe yo gukina Champions League mu mwaka utaha w’imikino mu gihe Arsenal iramutse yegukanye iki gikombe cya FA Cup, yazakina Europa League.

Mikel Arteta utoza Arsenal, yayifashije kugera ku mukino wa nyuma wa FA Cup mu mwaka w’imikino wa 2013/14 ubwo yari akiri umukinnyi.

Amakuru meza avugwa mu ikipe ye ni uko umunyezamu Bernd Leno ashobora gukina uyu mukino nyuma yo gukira imvune yahuye nayo mu mukino wabahuje na Brighton ku wa 9 Nyakanga.

Arsenal izakina ifite abakinnyi bayo bari bamaze iminsi baravunitse nka Héctor Bellerín na Shkodran Mustafi wavunikiye mu mukino wa ½ na Manchester City.

Avuga ku mvune ya Shkodran Mustafi, umutoza Mikel Arteta yavuzeko uyu mukinnyi amaze igihe yaravunitse bakeneye kubanza kumusuzuma neza niba koko yakinishwa kuko na we abishidikanyaho.

Ati “Mustafi yaravunitse dukeneye ku musuzuma tukareba niba azashobora gukina umukino wa nyuma simbizi, dufite kureba uko azaba ameze mu minsi iri imbere. Nanjye ndabishidikanyaho.”

Mikel Arteta yizeye ko rutahizamu we, Pierre Emerick Aubameyang, watsinze ibitego bitandatu mu mikino itatu iheruka, azakorera amateka kuri Stade Wembley.

Umutoza wa Chelsea, Frank Lampard, azishimira gutwarana n’iyi kipe iki gikombe ku nshuro ya gatanu dore ko yanagitwaye nk’umukinnyi inshuro enye mu gihe yayikiniraga.

Umwe mu bakinnyi Frank Lampard ahanze ijisho muri uyu mukino ni Christian Pulisic uri gukinira Chelsea umwaka we wa mbere.

Christian Pulisic yagize ati” Biragaragara ko dufite amahirwe yo gutwara igikombe kuko turayabona imbere yacu bizaba ari iby’agaciro gakomeye kuri twe.”

Abakunzi b’umupira w’amaguru muri Afurika bazabasha kureba uyu mukino mu mashusho acyeye ya HD kuri StarTimes nk’ikigo kimwe rukumbi gifite uburenganzira bwo kwerekana iri rushanwa.

Arsenal na Chelsea zizahurira ku mukino wa nyuma wa FA Cup uzerekanwa kuri StarTimes

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .