Shema ukina mu Bubiligi yisabiye guhamagarwa mu Mavubi

Yanditswe na Ngabo Roben
Kuya 21 Ukwakira 2018 saa 02:21
Yasuwe :
0 0

Shema Trésor, ukina ku ruhande asatira mu ikipe yo mu cyiciro cya Gatatu mu Bubiligi, yemeza ko yifuza guhamagarwa mu ikipe y’igihugu Amavubi, ngo nawe atange umusanzu we.

Uyu mukinnyi yavukiye mu Rwanda tariki 14 Kanama 1997. Afite umwaka umwe n’igice, umuryango we wimukiye mu Buholandi aho yakuriye kugera ubu.

Shema yatangiye gukina umupira afite imyaka icyenda, yinjira mu ishuri ry’umupira w’amaguru rya FC Den Bosch yo mu cyiciro cya kabiri mu Buholandi, ikipe yazamuye ibihangange bizwi ku isi nka; Rutgerus Johannes Martinus uzwi ku mazina ya ‘Ruud Van Nistelrooy’.

Kuzamukira muri iyi kipe byatumye aterwa imboni n’amakipe atandukanye yo mu Buholandi anajya mu mwiherero w’ikipe y’igihugu z’abana y’iki gihugu, ariko ntiyabona umwanya wo kugikinira.

Nyuma yo kurangiza imyaka yo gukina mu mashuri ya ruhago, Shema afite imyaka 17 yabengutswe TOP Oss Football club nayo yo mu cyiciro cya kabiri mu Buholandi ayimaramo imyaka ibiri gusa ihita imutiza muri Blauw Geel ’38 Football Club yo mu cyiciro cya gatatu.

Mu mpeshyi y’uyu mwaka yerekeje muri Torhout 1992 KM Football club yo mu cyiciro cya gatatu mu Bubiligi.

Shema yabwiye IGIHE ko abona igihe kigeze ngo ahamagarwe mu ikipe y’igihugu Amavubi.

Ati “Navukiye mu Rwanda mfite umwaka n’igice gusa. Nongeye kuhagaruka mfite imyaka 18 nje mu kiruhuko cy’ibyumweru bitanu. Umuntu uzwi mu Rwanda ufitanye isano n’umupira tuvugana ni Jimmy Gatete gusa. Ajya anshishikariza kuvugana n’abayobora Ferwafa kuko yifuza ko nkinira Amavubi ariko ntabwo birakunda. Nanjye ndabyifuza nizeye ko nzabigeraho vuba.”

Imyaka 22 afite imwemerera guhamagarwa mu ikipe y’igihugu y’abatarengeje imyaka 23 izakina na Repubulika iharanira Demokarasi ya Congo (RDC) mu gushaka itike y’igikombe cya Afurika, umukino ubanza ukazabera kuri Stade de Kigali tariki 18 Ugushyingo 2018.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza