00:00:00 IGIHE NETWORK KN KINYARWANDA EN ENGLISH FR FRANCAIS

‘Serviette’ yasinyiweho amasezerano ya mbere ya Messi na FC Barcelone yagurishijwe asaga miliyari 1.2 Frw

Yanditswe na IGIHE
Kuya 18 May 2024 saa 11:42
Yasuwe :

Agatambaro kifashishwa ku meza kugira ngo amafunguro atanduza uyafata, ‘serviette,’ kasinyiweho amasezerano ya mbere ya Lionel Messi yerekeza muri FC Barcelone, ubwo yari afite imyaka 13, kagurishijwe ibihumbi 969 by’Amadolari ya Amerika [asaga miliyari 1.2 Frw] muri cyamunara yabaye ku wa Gatanu.

Iyi cyamunara yabereye mu nzu y’igura n’igurisha yo muri Leta Zunze Ubumwe za Amerika ya Bonhams.

Mu Ukuboza 2000 ni bwo amasezerano ya Lionel Messi yasinywe mbere y’ukwezi kumwe kugira ngo yerekeze i Catalonia, bigizwemo uruhare rukomeye n’uwari Umuyobozi wa Siporo, Carles Rexach.

Uyu mugabo wakiniye ndetse akanatoza FC Barcelone, yatumiye Se wa Messi ari we Jorge Messi, kugira ngo basangire amafunguro ya ku manywa ariko afite intego yo kumuganiriza ku hazaza h’umuhungu we.

Si aba gusa bari bahari ahubwo hari hari ushinzwe gushakira abakinnyi FC Barcelone, Josep Maria Minguella, abahagarariye Messi bavuye muri Argentine ari bo Fabian Soldini na Martin Montero.

Muri ako kanya kubona urupapuro rwo kwandikaho ntibyari gukunda mu buryo bwihuse, biba ngombwa ko iby’ingenzi bishyirwa kuri ‘Serviette’ isanzwe yifashishwa mu isuku yo ku meza.

Amagambo yanditse kuri iyi ’serviette’ agira ati “I Barcelone, ku wa 14 Ukuboza 2000, turi kumwe na Maria Minguella, Horacio, Carles Rexach ushinzwe Siporo muri FC Barcelone, twemeranyije ko mu bubasha ahabwa duhisemo gusinyisha Lionel Messi nk’umukinnyi, ku giciro twumvikanye.”

Messi yabaye umwe mu bakinnyi b’ibihangange ku Isi, aho yegukanye ibikombe birenga 30, ndetse yavuye muri FC Barcelone ari we umaze kuyitsindira ibitego byinshi, 672.

Yatwaye kandi Ballon d’Or umunani nk’umukinnyi mwiza ku Isi, anafasha Argentine kwegukana Igikombe cy’Isi cya 2022.

Kuri ubu, Lionel Messi akinira Inter Miami yo muri Major League Soccer, Shampiyona y’Icyiciro cya Mbere muri Leta Zunze Ubumwe za Amerika.

Iyi serviette yagurishijwe arenga miliyari y'amafaranga y'u Rwanda
Ni aha amasezerano ya mbere ya Lionel Messi yasinyiwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .