Rwatubyaye Abdul yageze mu Amavubi, atuganiriza uko abayeho muri Amerika

Yanditswe na Eric Tony Ukurikiyimfura
Kuya 20 Werurwe 2019 saa 07:40
Yasuwe :
0 0

Myugariro w’ikipe ya Sporting Kansas City yo muri shampiyona ya Leta Zunze Ubumwe za Amerika, Rwatubyaye Abdul yageze mu Rwanda, aho aje gufatanya na bagenzi mu ikipe y’igihugu ‘Amavubi’ ikomeje kwitegura umukino usoza amatsinda yo gushaka itike ya CAN ya 2019, u Rwanda ruzakirwamo na Côte d’Ivore ku wa Gatandatu.

N’ubwo ikipe ye yari yabanje gusaba FERWAFA ko bamureka, agasiba uyu mukino kubera ko atari yamenyerana na bagenzi be bo muri Sporting Kansas City, baje kumureka, yitabira ubutumire bw’ikipe y’igihugu.

Mu rukerera rwo kuri uyu wa Mbere, ikipe ye yari ifite umukino wa shampiyona bakiriwemo na Colorado Rapids, banganya igitego 1-1. Nyuma y’uyu mukino, Rwatubyaye yakoze urugendo rw’amasaha 12 mu ndege, aza mu Rwanda ndetse ku mugoroba wo kuri uyu wa Kabiri, nibwo yageze mu ikipe y’igihugu.

Rwatubyaye Abdul ni umwe muri ba myugariro ngenderwaho mu ikipe y’igihugu dore ko amaze gutangira imikino ine muri itanu Amavubi amaze gukina muri uru rugendo rwo gushaka itike ya CAN 2019 izabera mu Misiri.

Kagere Meddie wa Simba SC muri Tanzania, ni we mukinnyi ukina hanze wahamagawe utaragera mu ikipe y’igihugu, aho biteganijwe ko ahagera mu gitondo cyo kuri uyu wa Gatatu.

Amavubi azahaguruka i Kigali ku wa Kane, yerekeza mu Mujyi wa Abidjan, ahazabera uyu mukino. Guinea na Côte d’Ivoire nizo zabonye itike yo gukina CAN 2019 mu itsinda H mu gihe Centrafrique n’u Rwanda bo bamaze gusezererwa.

Bite bya Rwatubyaye muri Amerika?

Uyu myugariro wavuye muri Rayon Sports mu kwezi gushize yaganiriye na IGIHE, adutangariza uko abayeho nyuma yo kugera muri shampiyona ya Amerika.

IGIHE: Wakiriye gute guhamagarwa mu ikipe y’igihugu aribwo ukigera mu ikipe nshya?

Rwatubyaye: Yego ikipe yari inkeneye, mu bijyanye no kumenyereza muri byinshi bya hariya bitoroshye kubimenyera ariko wenda navuga ko wafashe umwanya wawe neza nta cyakugora. Kuba barabanje gushidikanya ku butumire ni uko hari gahunda bari bamfitiye. Kuri njye kongera guhamagarwa n’ikipe y’igihugu nta kibazo mbifiteho, ni agaciro.

IGIHE: Ukimara kugurwa na Sporting Kansas City, wabyakiriye gute?

Rwatubyaye: Uko nabyakiriye n’ubu biracyari kumbaho kuko ntabwo navuga ko ari ibintu biri ku rwego rwo hasi, urwego nagiyeho ruri hejuru, rurashimishije. Shampiyona iri hejuru, imyitozo bakora, umujyi, imyitwarire n’umuco waho n’ibintu umuntu atavuga ko biciriritse, biri hejuru cyane.

Byari ibyishimo, byari iby’agaciro kuri njye kuba nari ngiye gukina muri iriya kipe, atari no kuyikinamo gusa ahubwo n’abakinnyi ngiye gukinana nabo bari ku rwego rwo hejuru, navuga ko hari ibyo nungutse mu buzima bwanjye.

IGIHE: Kumenyera muri Amerika, byarakoroheye?

Rwatubyaye: Ntabwo byanyoroheye, n’ubu ntabwo biranyorohera kubera ko mazeyo ibyumweru hafi bitatu, mbere y’uko ngaruka inaha. Ntabwo biranyorohera, nabanje kugerayo mba muri Hotel, bajya kunshakira ahandi natura, nahabonye ejo bundi mu byumweru bibiri. Nibwo nari nkimara kwimuka, hashize iminsi nk’itatu nimutse, ntabwo ndamenyera neza, haracyarimo ingorane nke, ariko ndakeka bitazamfata igihe kirekire.

IGIHE: Ugereranyje n’ubuzima bwo mu Rwanda, ni irihe tandukaniro rihari?

Rwatubyaye: Ikintu navuga bitandukaniyeho ni imitekerereze y’abantu, uko umukinnyi abayeho n’uko umuntu usanzwe abayeho, itandukaniro ni rinini cyane. Muri Amerika uburyo babaho biri hejuru cyane, ni ahantu buri mukinnyi ushaka kuba uwabigize umwuga yakwifuza gukina.

IGIHE: Ni ikihe kintu cyakugoye ukigerayo, uzahora wibuka?

Rwatubyaye: Ni mu buryo bwo gukoramo ibintu, urebye bafite uburyo bakoramo ibintu, biratandukanye cyane. Ku mazina yanjye, hano mu Rwanda tubanza Rwatubyaye, hariya ho babanza Abdul kuko niryo zina ryabo rya mbere, hagakurikiraho Rwatubyaye.

Ahantu bakorera hararenze ukuntu, kuhinjiramo nabanje kuyoba. Kwinjiramo barahanyeretse, nisubijemo ndayoba. Ni byo byantonze. Ikindi cyantonze ni imirire ya hariya, byarantonze cyane kugeza n’ubu sindayisobanukirwa neza, gusa ndacyafite igihe n’iminsi yo kumenyera, ndakeka mu bihe bizaza nzaba meze neza.

Rwatubyaye ntabwo aratangira gukinira Sporting Kansas City, ariko amaze kugaragara ku ntebe y’abasimbura mu mikino itatu bamaze gukina kuva ageze muri Amerika.

Rutanga Eric asuhuza Rwatubyaye bakinanye muri APR FC, Rayon Sports no mu ikipe y'igihugu
Byari ibyishimo kuri aba bakinnyi bose
Rwatubyaye aganira na Kimenyi bakinanye muri APR FC
Rwatubyaye yasanze bagenzi be ku mugoroba wo kuri uyu wa Kabiri
Rwatubyaye yishimiye kugaruka mu Amavubi, ahura n'abakinnyi bakinanye barimo umunyezamu Kimenyi Yves

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza